Nejemias 13 - Biblia ande chib Romani

O Nejemias pharruvel nesave ezgode

¹ Ande gola llivesa chitisarde e llenenge o lil katar o Moises, ta andre saia pisime kai e amonitura ta e moabitura saia te na aven nikada katar o foro e Devleko.

² Soke iek drom von ni likiste te den len ni jape ni pipe, von pochinde e Balaameke te del len armaia, a amaro Del pharruda gola armaia ta cherda len blagosipe.

³ Goleke, kana asunde so phenela o zakono, fulade sa golen kai amisailea e llenenchar kai sea katar aver phuvia.

⁴ Mai anglal katar gala ezgode, o popo o Eliasib kai arakhela e sobe kai guruven o jape ando cher amare Devleko. Ta sar o Eliasib saia familia katar o Tobias,

⁵ mukla leke iek bari soba kai omanglal guruvena andre e ezgode dine e Devleke, o taimano, e ezgode kai radina lenchar ta e des katar e stotina katar o lliu, katar e mol ta katar o zeitino kai phende te den kai e levitura, kai e llene kai llilabena, ta kai e llene kai arakhena e udara, ta i so saia dino e poponenge.

⁶ Kana nakhle gala ezgode me ni sema ando Jerusalem, soke ando burs tranda ta dui kai charoila o Artajerjes, charo katar e Babilonia, irisailem kai o charo, ta mapapal manglem letar

⁷ te mukel man te avav, ta irisailem ando Jerusalem. Ondaka llanglem savo bilachipe cherdaia o Eliasib soke cherda so mangla letar o Tobias, ta mukla leke iek soba kai saia ande bar katar o cher e Devleko.

⁸ Ta joliarda man but gaia ezgoda, ta chudiem avri katar e soba sa e ezgode kai andaia o Tobias katar po cher.

⁹ Mapalal phendem te chistonla prema sar phenel o zakono ta te thoven pe po than e ezgode katar o cher e Devleko, e ezgode dine ta o taimano.

¹⁰ Ta i llanglem kai ni dena kai e levitura so trubula len te jan, ta kai e levitura ta e llene kai llilabena ta kai cherena buchi e Devleke nasle, suako iek kai pi phuv.

¹¹ Ondaka diem pe llene kai gazdarina soke muklea pe iek rig o cher e Devleko. Mapalal chidiem e poponen ta e levitonen, ta thodem len pe lenge thana kai radina,

¹² ta sa e llene katar o Juda ande kai e soba e des katar e stotina katar o lliu, katar e mol ta katar o zeitino.

¹³ Mapalal thodem te arakhel e sobe o popo Selemias, o pismiri o Sadok ta iek levita kai ikhardola Pedaias, ta thodem te pomozil le o Jaran, chavo katar o Zakur ta unuko katar o Matatias, soke sea llene chache, von achile te fulaven o jape e llenenchar kai radina lenchar.

¹⁴ ¡Devla: Dik pe gaia ezgoda kai cherdem, ta na bristar sa e ezgode lache kai cherdem pala cho cher ta pala e llivesa kai radisardem ande cho cher!

¹⁵ Ande gola llivesa, llanglem kai ando Juda nesave llene ustavena e drak te cheren mol ando llive sabado, inllarena umpe lliu, thovena pe magarchura e mol ta e krangura drakhenge, simochine ta suako pharipe, ta llanatar ando Jerusalem. Ondaka diem pe lende soke llana te bichinen pe ezgode ando llive sabado.

¹⁶ Ta i nesave llene kai sea katar o Tiro ta kai zivina kote, inllarena mache ta aver ezgode ta bichinena len e judionenge ando Jerusalem.

¹⁷ Ondaka diem pe llene kai sea gazda ando Juda ta phendem lenge: ¡Inai sukar kai phagen o sabado!

¹⁸ Isto gaia ezgoda cherde tumare purane ta goleke amaro Del anda e nevolia pe amende ta pe gava foro. ¿A so, mangen te joliaven ios mai but e Devle po Israel kai phagen o sabado?

¹⁹ Ondaka phendem kai samo ka lel te perel o kham ta kana e senka ka chalavel po udar e foroko ta llal angle o sabado, te phanden e udara katar o Jerusalem ta te na putaon lligo ni nakhel gua llive. Ta thodem nesave llenen kai radin mange te na muken nika te nakhaven ezgode andre.

²⁰ Ta iek o dui droma e llene kai cheren arli ta e llene kai avena te bichinen but ezgode achile avri katar o Jerusalem.

²¹ A me diem pe lende soke nakhle e riat angla o zido, ta phendem lenge kai ka phandav len te thodepe pale kote. Ta sar kotar ni avile ando sabado.

²² Mapalal phendem e levitonenge ta chistonpe prema o zakono katar o jaladipe ta te llan te arakhen e udara, ta gia te na phagen o sabado. ¡Devla: De tut golli mandar i pala gala ezgode, ta te avel chuke zao mandar pala cho baro volipe!

²³ Ta i llanglem kai nesave llene zinisailea e diskinienchar katar o Asdod, katar o Amon ta katar o Moab,

²⁴ ta dopas katar lenge minone dena orba ande chib katar o Asdod ta katar aver phuvia, ta ni llanena te den orba ande chib katar e judiura.

²⁵ Goleke jalem man lenchar ta diem len armaia. A nesaven chaladem len ta lenge bal ande me va achile, ta thodem len pe zor te jan sovel te na muken ios pe cheen ta ni pe chaven te zininpe llenenchar kai inai katar amare phuvia, ta te na len pala pete lenge diskinien, ni von ni lenge chave.

²⁶ Ta i phendem lenge gia: ¡Gava si o bilachipe kai cherda o Salomon, charo katar o Israel! Soke maskar gachin phuvia ni saia iek charo sargo vou te volil le gachin o Del ta te cherel le charo katar sa o Israel, a e diskinie kai ni sea katar lengi phuv cherde le te cherel o bilachipe.

²⁷ Goleke, ni ka terpi te cheren gia baro bilachipe amare Devleke, kai zininpe diskinienchar kai inai katar amare forura.

²⁸ O Joiada, chavo katar o mai baro popo o Eliasib, saia le iek chaurro kai zinisailo iekhe cheaia katar aver phuv. Voi saia chei katar o Sambalat, kai saia katar o Joron. Ta cherdem pe zor te llaltar dur katar o Jerusalem o chavo katar o Joiada.

²⁹ ¡Devla: De tut golli katar e llene kai makhle o rado katar e popura ta katar e levitura kai die tut po alav!

³⁰ Ta gia, ikandem lendar sa so ni saia katar amaro foro ta phendem lenge kana saia te radin e popura ta e levitura, ta te radil suako iek ande po rado,

³¹ ta kana saia te chiden e kasta ta kana saia te den e purve septelie. ¡Devla: De tut golli mandar ta pomozisar man!