Nejemias 12 - Biblia ande chib Romani

E popura ta e levitura

¹ Gala si e popura ta e levitura kai irisaile katar e Babilonia e Zorobabelea, chavo katar o Salatiel, ta e Jesueea: O Seraias, o Jeremias, o Esdras,

² o Amarias, o Maluk, o Jatus,

³ o Sekanias, o Rejum, o Meremot,

⁴ o Iddo, o Gineto, o Abias,

⁵ o Mijamin, o Maadias, o Bilga,

⁶ o Semaias, o Joiarib, o Jedaias,

⁷ o Salu, o Amok, o Jilkias ta o Jedaias. Gala sea e gazda katar e popura ta lengi familia, kana zivila o Josue.

⁸ Ta e levitura: O Jesua, o Binui, o Kadmiel, o Serebias, o Juda ta o Matanias, kai blagosina e Devle ando llilabipe.

⁹ Ta i o Bakbukias ta o Uni, llilabena lenchar ta cherena pi buchi.

¹⁰ O Jesua saia o dad katar o Joiakim, ta o Joiakim saia o dad katar o Eliasib, ta o Eliasib saia o dad katar o Joiada,

¹¹ o Joiada saia o dad katar o Jonatan, ta o Jonatan saia o dad katar o Jadua.

¹² Ande llivesa katar o Joakim, e popura gazda katar e familia sea: Katar e familia e Seraiaseki, o Merias, katar o Jeremias, o Jananias,

¹³ katar o Esdras, o Mesulam, katar o Amarias, o Jojanan,

¹⁴ katar o Meliku, o Jonatan, katar o Sebanias, o Jose,

¹⁵ katar o Jarim, o Adna, katar o Meraiot, o Jelkai,

¹⁶ katar o Iddo, o Zakarias, katar o Gineto, o Mesulam,

¹⁷ katar o Abias, o Zikri, katar o Miniamin, katar o Moadias, o Piltai,

¹⁸ katar o Bilga, o Samua, katar o Semaias, o Jonatan,

¹⁹ katar o Joiarib, o Matenai, katar o Jedaias, o Uzi,

²⁰ katar o Salai, o Kalai, katar o Amok, o Eber,

²¹ katar o Jilkias, o Jasabias, ta katar e familia e Jedaiaseki, o Natanael.

²² Ande llivesa katar o Eliasib, o Joiada, o Jojanan ta o Jadua, ta llik kana charoisarda o Dario o persa, pisisarde ando lil e foroko e anava katar e levitura sargo gazda katar e familia, ta i e poponengo anav.

²³ A e anava katar levitura gazda katar e familia, achile pisime ando lil e foroko llik ande llivesa katar o Jojanan, unuko katar o Eliasib.

²⁴ E gazda katar e levitura sea: O Jasabias, o Serebias, o Jesua chavo katar o Kadmiel, o Binui, ta leke amal sea angla lende te blagosin ta te den fala e Devle kana avela lengo vreme te cheren le, gia sar phenda o David, manus e Devleko.

²⁵ Ta e llene kai arakhena e udara anglune sea: O Matanias, o Bakbukias, o Abdias, o Mesulam, o Talmon ta o Akub.

²⁶ Von zivisarde ande llivesa katar o Joiakim, chavo katar o Josue ta unuko katar o Josadak, ta ande llivesa kana gazdarila o Nejemias, ta saia o Esdras kai saia popo ta kovachi.

Blagosin o zido

²⁷ Kana avilo o llive te avel blagosime o zido katar o Jerusalem, llele te roden sa e levitonen kaigo zivina, ta inllarde len ando Jerusalem te sai cheren o blagosipe katar o zido veselimaia, blagosina, llilabena, ta basalena o platillo, e arpa ta e lira.

²⁸ Ta e levitura kai llilaben avilea katar e forura kai sea truial katar o Jerusalem, ta katar e forichura katar o Netofa,

²⁹ katar e chera kai si ando Gilgal ta katar e vosa katar o Geba ta katar o Azmavet, soke e llene kai llilabena cherdea pe chera truial katar o Jerusalem.

³⁰ Ondaka e popura ta e levitura, cherde prema o zakono katar o jaladipe, ta cherde le i e llenenchar katar o foro, ta e udarenchar kai si ando foro ta e zidoia.

³¹ Mapalal cherdem te liken po zido sa e llene kai gazdarin ando Juda, ta fuladem pe dui sa e llenen kai llilabena. E purvo llene kai llilabena phirena pe rig e chachi, karing o udar kai likel kai o llubri.

³² Ta pala e llene kai llilabena llala o Osaias ta dopas katar e llene kai gazdarina ando Juda:

³³ o Azarias, o Esdras, o Mesulam,

³⁴ o Juda, o Benjamin, o Semaias ta o Jeremias.

³⁵ Katar e popura, basalena lenchar ande tuturuge: O Zakarias, chavo katar o Jonatan, kai leke purane sea o Semaias, o Matanias, o Mikaias, o Zakur ta o Asaf,

³⁶ ta i katar leki familia o Semaia, o Azareel, o Milalai, o Gilalai, o Maai, o Natanael, o Juda ta o Janani. Von basalena prema e basalde kai sea e Davideke, manus e Devleko. Angla lende llala o pismiri Esdras.

³⁷ Ta upral po udar e paieko kai likel katar e phuv, llana angle chak upral po zido, likiste katar e escalere katar o cher e Davideko ta llik kai o udar e paieko kai si pe rig katar likel o kham.

³⁸ E duito llene kai llilabena phirena pe rig stingo. Me llava pala lende upral po zido ta manchar llala o gua dopas katar o foro, katar e torre katar e furnave llik kai o zido bulo,

³⁹ kana nakhle o udar katar o Efrain, o udar katar o Jesana, o udar katar e mache, e torre katar o Jananel ta e torre katar e Stotina, llik kai o udar katar e bakre, ta achilam kai si e llene kai arakhen o udar katar rubie.

⁴⁰ Mapalal e dui dopasina katar e llene kai llilabena thodepe pe po than ando cher e Devleko, ta thodem man i me, ta i o dopas katar e llene kai gazdarina ta kai llana manchar.

⁴¹ E popura kai basalena e tuturuge sea: O Eliakim, o Maaseias, o Miniamin, o Mikaias, o Elioenai, o Zakarias, o Jananias,

⁴² o Maaseias, o Semaias, o Eleazar, o Uzi, o Jojanan, o Malkias, o Elam ta o Ezer. Ta e llene kai llilabena kai sikavela len o Izrajias, llilabie saurre ande iek than zurale.

⁴³ Gua llive cherdile but kurbanura, ta e llene veselisaile but soke o Del pherda len dragostia. E diskinie ta e minone i von veselisaile but, ta e veselia kai saia ando Jerusalem asundola but duratar.

So jana e popura ta e levitura

⁴⁴ Ande gola llivesa thode llenen te arakhen e sobe kai andre guruven e ezgode katar o cher e Devleko, kote guruvena: E ezgode dine, e purve septelie ta e des katar e stotina. Gua saia so avela katar e umalia katar suako foro, ta prema o zakono saia te den len kai e popura ta kai e levitura, soke o foro saia veselo katar o rado kai cherena e popura ta e levitura.

⁴⁵ Von, e llene kai llilabena ta e llene kai arakhena e udara, sea kai cherena gua blagosipe e Devleke ta i o zakono katar o jaladipe, gia sar phenda o David ta leko chavo o Salomon.

⁴⁶ Soke omanglal, ande llivesa katar o David ta katar o Asaf, sea gazda katar e llene kai llilabena, sea llilia blagosimake ta chidiniaona te den fala e Devle.

⁴⁷ Goleke, ande llivesa katar o Zorobabel ta katar o Nejemias, sa e llene katar o Israel dena suako llive o jape e llenenge kai llilabena ta e llenenge kai arakhena e udara, ta dena i kai e levitura so perela len, ta von cherena isto gua e llenenchar kai sea porodo katar o Aaron.