Nejemias 1 - Biblia ande chib Romani

O Nejemias molilpe pala po foro

¹ Me o Nejemias, chavo katar o Jakalias. Ande llivesa kana cherela bis burs kai gazdarila o Artajerjes, ando chon Kisleu, kana sema ando foro Susa

² avilo mo phlal o Janani iekhe llenenchar katar o Juda, ta puchlem len katar o Jerusalem ta katar e judiura kai naslea ta kai ni inllardea len phange ande Babilonia.

³ A von phende mange: Gola kai achile ando Jerusalem, zivin ande nuzda ta ando baro lallao. O zido katar o Jerusalem si phago pe suako rig, ta leke udara si sa phabarde.

⁴ Kana asundem so phende, beslem ta thodem te rovav, ta nesave llivesa sema zalosno, ta cherava alluno ta moliva man e Devleke kai si ando miloso.

⁵ Ta phendem leke: Devla, Del e milosoko, Del baro ta baro kai dara tutar, kai ni phage cho alav ta san chacho ta si chuke zalba katar e llene kai volin tut ta cheren so phenen che zakonura,

⁶ moliv man chuke akana te thove sama che slugake, kai ollivesea ta orachaia moliv man pala che sluge e israelitura. Llanav kai amen e israelitura cherdam chuke o bilachipe, ¡Llik mi familia ta i me cherdam chuke o bilachipe!

⁷ Amen chardam o bilachipe, ni cherdam so phendan amenge, ni kandiam che zakonura ni che krisa kai dian te sikavel amenge cho sluga o Moises.

⁸ De tut golli so phendan e Moiseseke kai te cherdam o bilachipe, tu ka rispi amen pe sa o sueto,

⁹ ta kai te irisailam tute, ta te kandaia so phenen che zakonura, ta te cheraia so phenen, i te avaia rispime pe suako rig katar o sueto, tu ka ane amen pale kai o than santo kai esvirisardan te avel kote blagosime cho anav.

¹⁰ Amen sam che sluge ta cho foro kai braduisardan bare zoriaia.

¹¹ Moliv man chuke, Devla, te thove sama so mangav tutar ta sar molinpe chuke che sluge, kai mangen samo te blagosin tut. Ta i mangav tutar te llal mange sukar ta te avav drago e charoke. Ande gola llivesa me radiva pe leki sinia.