Najum 3 - Biblia ande chib Romani

¹ ¡Tesko chuke foro kai mundare, pherdo kojaipe ta silnope san, kai ni muke o choripe!

² ¡Asundol o bicho, asundol sar basen e tochkura! ¡Asundol sar prasten e gra juten e bordona marimake!

³ ¡Boñikura kai llan pe gra! ¡Jarnia kai klichin, e lansa kai klichil! ¡But llene ranime, umpe llene mule! ¡But esnage bi zivotoke! ¡E llene eskomban pe lende!

⁴ A sa e dos si po kurvaluko, ta pe goia kurvichka kai si sukar, kai llanel te cherel chirimate, kai po kurvaluko ta pe chirimataia kojavel bute foronen ta bute phuvien.

⁵ O Del kai si le sa e zor phenel gia: Me ka dav pe tute: Ka mukav tut nango te dikhen e phuvia cho nangipe ta te dikhen e charoine cho lallao.

⁶ Ka chudav pe tute gadope, ka thovav tut ando lallao ta ka ache sargo pogastia.

⁷ Sa e llene kai ka dikhen tut ka nasen tutar ta ka phenen: ¡O Ninive si zatrime! ¿Kake ka avel zao letar? ¿Ko ka avel te del le zor?

⁸ ¿Sana mai lachi neko o Tebas, o foro pasa o Nilo, kai truial letar sea paia? E mora arakhela le ta e paia sea leko zido.

⁹ E Etiopia ta o Ejipto sea leki zor kai ni saia la son, o Fut ta e Libia pomozina le.

¹⁰ A e Tebase inllarde le phanglo, mundarde leke minone pe droma katar o foro, cheldepe pe leke glamne llene ta phangle lanchonenchar leke gazden.

¹¹ Ta i tut ka mataren ta mato ka phanden tut. Ta i tu ka rode kai te gurudo katar cho dusmano.

¹² Sa chi zor si sargo o kas simochinengo kai si le but simochine, kai kana chinon le peren ando mui katar o lleno kai jal len.

¹³ Che boñikura si sargo diskinie. E udara katar e phuv si putarde e dusmanonenge. E iag ka phabarel che alkave.

¹⁴ Chide pai soke e dusmanura ka cheren belava e foroke, lachar che zidura. De ando glibo ta ustave le, lachar e furnava.

¹⁵ Kote ka jal tut e iag, ta o jarni ka jal tut sargo e langosta. Ni ka mukel tutar niso i te cherdoia but sargo e langoste.

¹⁶ Che llene kai chinen ta bichinen cherdile mai but neko e cheraia katar o miloso. A daraile ta nasle sargo langoste.

¹⁷ Che boñikura kai arakhen si sargo langoste, a e llene kai ikharen e boñikonen si sargo oblakura katar e langoste, kana cherel sil, thovenpe pe zidura, kana likel o kham, llantar ta niko ni llanel kai llele.

¹⁸ ¡Che chobanura soute ioi, charo katar e Asiria! Che boñikura tromane achen, cho foro llal rispime pe burdura, ta inai ko te chidel le.

¹⁹ ¡Inai drab che dukhake! Cho ranipe nasti sastol. Sa e llenen kai asunen katar chi zatrania maren ande palme. ¿Ko ni nakhla duk pala cho bilachipe kai ni achel?