Najum 2 - Biblia ande chib Romani

¹ Ninive, o lleno kai zatril avel tute. ¡Arak e zidura ando cho cher zuralo! ¡Arak o drom! ¡Le cho jarni! ¡Chide che boñikura!

² Soke o Del ka vazdel pale e dragostia katar o Jakob o sukaripe katar o Israel, gia sar saia mai anglal te zatrin le ta te muken le sargo iek kas drakhako kai inai le krangura.

³ O eskudo katar leke boñikura si lolo, ta lenge patave si lole. ¡Von si lacharde te marenpe! Lenge bordona marimake si sargo e iag, lenge gra nasti achen esmiro.

⁴ E bordona aven jolinaia pe droma, llan pe suako rig katar e plase, dikhon sargo plameko iagako, ta nakhen sargo esterliche.

⁵ O charo ikharel e gazden katar e boñikura, ta von ustaven iek avere soke sigaren te aven po zido te arakhen le.

⁶ E udara katar e paia ka putaon ta o cher e charoko ka perel.

⁷ Inllaren phangli e charoina, laia llan lake sluge roven sargo gulubura ta chalavenpe pe po kolin.

⁸ Sargo pai del avrial soke phagilo o zido, gia nasen e llene katar o Ninive. Urkin pe lende ¡Achen! ¡Irin tumen! A niko ni irilpe.

⁹ ¡Len o rup! ¡Len o sunakai! ¡O barvalipe katar o Ninive inai le son!

¹⁰ Pusto, zatrime, niko inai ande le, gia si o Ninive. E lie izdran daratar, izdran e changa, suako lleno jasarda pi zor, e muia parrnion daratar.

¹¹ ¿Kaitalo o than kai gurudon e lionura, kote kai gurudon e lionura minone? Kote e lionura ta lenge lionura minone ni darana nisotar, niko nasti daravela len.

¹² O liono mundarela ta anela but jape pe minonenge, ta kote kai gurudona andea but zivirinie mule.

O Ninive ka avel sa zatrime

¹³ Gia phenel o Del: Me ka dav pe tute: Ka phabarav che bordona marimake, ka cherdon prajo iagako. Ka mundarav che minone liononen, ka cherav te na avel ios cho choripe ande chi phuv, ta ni ka asundol ios o avazi katar che llene bichalde.