Najum 1 - Biblia ande chib Romani

¹ E poroka katar o Ninive. O lil katar iek sargo suno kai dikhla o Najum katar o Elkos.

² E Devle inai leke drago kana blagosin averen delen, dukhavel e llenen kai cheren leke o bilachipe ta joliaol pe pe dusmanura.

³ O Del ni joliaol oma ta leki zor si bari, ta ni ka mukel e bilachen bi te dukhavel len. O Del phirel po bursin ta pe balavia, ta e oblakura si o prajo kai vazdiniaol telal tala leke porrne.

⁴ Del pe mora, ta e mora sukol, ta cherel te sukon sa e paia. E vostanura katar o Basan ta o Karmelo sukon, ta i sukon e lulunlla katar o Libano.

⁵ Angla le izdran e burdura, bilaon kana vou avel. E phuv izdral kana dikhel le, ta izdral o sueto ta sa e llene kai zivin ande le.

⁶ ¿Ko sai achel pe porrne angla leki joli? ¿Ko sai terpil leki joli? Leki joli si sargo iag kai perel, ta angla le phagon e pechine.

⁷ O Del si lacho, vou del zor ande nuzda, ta pinllarel golen kai uzdinpe ande lete.

⁸ A sargo baro bursin kai zatril sa, gia ka zatril pe dusmanonen, o truniariko ka perel pe lende.

⁹ ¿So mislin tumen te den po Del? ¡Vou ka zatril tumen sa! ¡Ta ni ka trubul le te dukhavel dui droma pe dusmanonen!

¹⁰ I te aven khuvde e llenenchar sargo karrne, ta te avena korre mate te denpe zor ka phabon sargo patra suke.

¹¹ Tutar likisto o lleno kai mislisailo o bilachipe po Del, iek lleno kai sikavel o bilachipe.

¹² Goleke o Del phenel pe foroke: I te avena e asiriura mai but ta mai zurale, ka aven zatrime ta ka nakhen. Me dukhadem tut, ta ni ka dukhavav tut ios.

¹³ Ka phagav o pharipe kai si pe tute, ta ka chinav che lanchura.

¹⁴ O Del phenda tutar charo katar o Ninive, kai niko ni ka delpe golli katar cho anav, ta ka zatriv o cher katar cho del ta e slike kai cherde len e manusa, kote ka thovav cho limori, soke sana bilacho.

E viasta kai o Ninive ka perel

¹⁵ ¡Dikhen! ¡Avel pe burdura o bichaldo kai anel e viasta katar e pas! Juda, cher tumare slave, cher so achilan po alav. Nikada ios ni ka den pe tute e bilache soke von si sa zatrime.