Mikeas 7 - Biblia ande chib Romani

O bilachipe katar o Israel

¹ ¡Tesko mange! Sem sargo o lleno kai rodel kana e llene chidie e septelie, ta ni malavel drak ta simochine, me mangava te jav gala purve septelie.

² Ni achen ande phuv llene orta angla o Del, sa aduricharen te cheren e ezgode silnomaia iek avereke thoven o kojaipe.

³ Llanen te cheren o bilachipe, o lleno kai gazdaril mangel te chinen e kris ta o krisari chinel e kris prema e love. O lleno barvalo del orba sogo mangel ta cherel so phenel.

⁴ O mai lacho lendar si sargo e karrne, o mai orta si sargo fafurruka. A avel o llive kana ka avel e bari duk, o llive kai phenela le o boñiko kai arakhela. Ondaka samo e burkania ka perel pe lende.

⁵ Na pacha ande so phenel o pharnavo ta na thov chi vera ando lleno kai gazdaril, arak tut katar e diskinia kai sovel pasa tu, na putar cho mui.

⁶ Soke o chavo ni del liubao pe dade, e chorri vazdiniaol pe pi dei ta e bori vazdiniaol pe pi sasuiaia, ta e manuseke dusmanura si isto leki familia.

⁷ A me ka dikhav e Devle, ka aduricharav ando Del kai ka braduil man, mo Del ka asunel man.

O Israel ka dobil ostade

⁸ Tu kai san mo foro dusmano, na veselisao pala ma, soke makar pelemtar, pale ka ustav, te truisarel man o truniariko, o Del si mo villelo.

⁹ Cherdem o bilachipe angla o Del, goleke ka terpiv e duk kai ka del man llik kana ka krisil mange ta ka cherel mange o lachipe. O Del ka inllarel man kai o villelo ta ka dikhav leko chachipe.

¹⁰ Ta i mi dusmanka ka dikhel le, ta ka achel ando lallao. Voi phenela mange: ¿Kaitalo o Gazda cho Del? Ta akana ka dikhav mange sar ustaven la sargo o glibo pe droma.

O Jerusalem pale ka avel vazdino

¹¹ Jerusalem, avel o llive kana pale ka vazden che zidura ta ka ave iek foro mai baro.

¹² Gua llive ka aven tute llene katar suako rig, llene katar e Asiria llik karing o Ejipto, katar o Nilo llik karing o Eufrates, katar e mora llik karing e mora, ta katar o burdo llik karing o burdo.

¹³ E phuv ka avel sargo o pusto pala e dos katar e llene kai zivin ande la, pala e ezgode bilache kai cheren.

Molipe pala o foro

¹⁴ ¡Devla arak che foro e bakre katar chi stoka, kai si korkorre ando vos, pasa e phuvia kai den but septelie! Inllar len sargo omanglal, ande zeledina katar o Basan ta o Galaad.

¹⁵ Cher lenge ezgode devlikane, sargo kana ikandan len katar o Ejipto.

¹⁶ E phuvia ka dikhen le ta meren lallaimatar pala lengi zor. Ka thoven po va pe po muia, ta ka panden pe kan.

¹⁷ ¡Ka jan e chik sargo o sap, sargo e sapa katar e phuv! Ka izdran daratar kote kai gurudon. Pherde dar ka llan tute kai san amaro Del, ta ka daran pala tu.

O Del prostil pe foro

¹⁸ Inai aver Del sargo tu kai prostil o bilachipe ta bristare tut katar e ezgode bilache kai cherda, but cherricha llene achile katar cho foro. Ni jolailo amenchar ostade soke drago leke te prostil.

¹⁹ Pale ka avel leke zalba amendar, ka prajol amare ezgode bilache, ta ka chudel ande mora sa amare ezgode bilache kai cherdam.

²⁰ Ka cherel so achilo po alav e Jakobea ta e Abraamea, so jalan sovel amare puranenge.