Mikeas 6 - Biblia ande chib Romani

O Del jalpe e Israelea

¹ Asunen akana so phenel o Del: ¡Uste ja tut e burdonenchar, cher te asunen cho avazi e bare burdura!

² Asunen tumen, burdura ta e barra zurale katar e phuv: O Del ka krisil pe foro, ka krisil e Israele.

³ Gia phenel o Del: Phen mange foro murno: ¿so cherdem kai ni pela chuke drago?

⁴ Soke me cherdem te like katar o Ejipto, ikandem tut katar o cher, kai zivia sargo sluga. Ta bichaldem angla tu e Moisese, e Aarone ta e Maria.

⁵ Foro murno, de tut golli so mislila te cherel o Balak, charo katar o Moab, ta so phenda leke o Balaam, chavo katar o Beor. De tut golli kana nakhlan katar o Sitim karing o Gilgal, te llane kai o Del si orta.

So mangel o Del katar e llene

⁶ ¿Soia ka avav angla o Del te blagosiv le, angla o Del kai si ando miloso? ¿Ka avav angla le telchonenchar iekhe bursenge te dav len kurbano leke?

⁷ ¿Ka veselilpe o Del te dav le milia bakre o des milie paia zeitinoke? ¿Mo chavo mai purano, ka dav le kurbano te pochinav pala me ezgode bilache kai cherdem?

⁸ Ioi manusea, o Del phenda chuke, so si o lachipe ta so mangel tutar o Del: te ave orta ta te chere o lachipe te ave lacho, ta te avel tut liubao angla cho Del.

O kojaipe

⁹ O Del ikharel e foro, bizaipe si te asunel le: Thoven sama savi si e duk ta ko si gua kai dukhavel.

¹⁰ ¿Ando cher katar o bilacho, si barvalipe kai lia kojaimaia ta pharipe kojamno kai gua si iek gadope?

¹¹ ¿Ka prostiv gole llene kai phariavel kojaimaia, ta kai si le ambava kojamni?

¹² E barvale katar gava foro lie but ezgode kojaimaia, ta e llene kai zivin ando foro kojaven, ta lengi chib si kojamni.

¹³ Goleke diem pe tu ta cherdem te suko, ta te zatriv tut pala che ezgode bilache kai cherdan.

¹⁴ Ka ja ta ni ka chalio, ni ka lelpe tutar e bok. Ka chide lliu, a ka jasarele sa, ta te achela tut fiso, ka cherav te jasarele ando maripe.

¹⁵ Ka thove simiche ande phuv, a ni ka chide e septelie. Ka ustave e maslinke, a ni ka thove pe tu o zeitino. Ka ustave e drak, a ni ka pie e mol.

¹⁶ Soke cherdan so phenena o Omri ta e familia katar o Ajab, ta cherdan isto so cherena von. Goleke me ka cherav te avel pe tu ta che llene bari zatrania, ka daran pala tumende, ta o lallao me foroko ka perel pe tu.