Mikeas 5 - Biblia ande chib Romani

E charoina katar o braduimari

¹ ¡Vazde zidura truial tutar Jerusalem, soke avile te den pe tute, ta pe cham ka chalaven pe rovliaia e llene kai krisil ando Israel!

² Tu Belen katar e phuv e Judeaki, san o mai minono foro ande charoina e Judeaki, tutar ka likel gua kai ka gazdaril ando Israel, leki vicha si but purani, katar e llivesa kai si ostade.

³ Ta o Del ka mukel len llik kana ka maladol e diskinia kai si khami, ondaka sa e phlal ka irinpe kai e chave katar o Israel.

⁴ Ta o charo ka inllarel pe foro ande zor e Devleki, e dragostimaia ando glamno anav e Gazdako, leko Del. Ta ka zivin smiro, soke leko anav ka avel bariado llik kai e thana mai dur katar e phuv.

⁵ Vou ka anel e pas. Kana e asiriura ka den ande amari phuv, ta ka den ande amare bare chera, ondaka amen ka bichala te marenpe lenchar efta chobanura, ta ojto llene katar e mai preche,

⁶ ta e jarniaia ka zatril e Asiria ta e jarnienchar e phuv katar o Nimrod, ta ka braduil amen katar e asiriura, kana ka aven te den ande amari phuv llik kai e riga kai si mai dur.

E zatrania katar e dusmanura

⁷ Gola kai ka achen katar o Jakob ande aver phuvia, ka aven sargo kana pechalpeke pe phuv, sargo kana o Del cherel te perel o bursin po zelenipe, kai ni aduricharel ta ni arakhelpe katar o manus.

⁸ Isto gia ka aven gola kai ka achen katar o Jakob maskar e phuvia, ka aven sargo liono maskar e zivirinie dive, sargo liono minono maskar e bakre kai kana nakhel, istarel len ta chinel len pe kotora ta niko nasti nasel.

⁹ Isto gia cho va ka vazdiniaol pe che dusmanura, ta ka zatril sa golen kai marenpe tuia.

O son katar o maripe ta katar e dela kojamne

¹⁰ Gia phenel o Del: Gua llive ka mundarav che grasten ta ka zatriv che bordona marimake,

¹¹ ka zatriv e forura katar chi phuv, ta ka peravav sa che forura zurale.

¹² Ka zatriv e llenen kai cheren chirimate, ta ni ka mukav e llenen kai apogodin.

¹³ Ta ka zatriv che slike ta che pechine kai si ande tute, te na blagosin nikada ios e delen kai cherdan che vastenchar.

¹⁴ Ka ikanav e slike katar e Asera kai si ande tute ta ka zatriv sa che forura.

¹⁵ Jolinaia ka cherav te pochinen e phuvia kai ni kandie man.