Mikeas 2 - Biblia ande chib Romani

E zor katar e dusmanura

¹ ¡Tesko golenge kai i kana soven mislin te cheren o bilachipe, ta cheren le kana pharrudon e zore, soke si len e zor ande lenge va!

² Zelin e ezgode katar aver llene ta len len, zelin chera ta len peke lende. Ustaven e muruse ta leke familia, e muruse ta leke phuvia.

³ Goleke gia phenel o Del: I me mislisailem te cherav tumenge o bilachipe. Ka bichalav tumenge iek bari patnia, kai nasti ka nasen latar ta ni ka llan ios barikamaia, soke o vreme ka avel bilacho.

⁴ Gua llive e llene ka llilaben tumenge llilia zalbake, kai ka phenen gia: Amen sam sa zatrime O Del cherda te na llal sukar amare foroke. ¡Lia amendar amare vostanura ta fulada len!

⁵ Goleke ni ka avel ko te fulavel e phuv ando foro e Devleko.

E bilache poraukura

⁶ Von phenen: ¡Na poraukin amenge! ¡Ni ka avel pe amende e zatrania!

⁷ ¿O foro katar o Jakob si proketo? ¿Ni terpil ios o Del? ¿Gia si sar cherel e ezgode o Del? ¿Ni ka cheren lachipe leke alava e lleneke kai si orta?

⁸ Tumen, kai omanglal sena mo foro, akana sen me dusmanura. Tumen len o gertachi katar e llene kai nakhen, sargo kana von marenape tumenchar.

⁹ E diskinien katar mo foro traden len avri, katar lenge chera kai von volin, ta katar lenge minonen lien o liubao ostade.

¹⁰ ¡Usten! ¡Phiren! Kate inai than te lelpe tumendar o chinipe. ¡Gava than si pogano ta sa ka avel peradino!

¹¹ Te avela fiko kojaimaia, ta phenela: Me poraukiv katar e mol ta e rachia, ondaka o foro mislil letar kai vou si profeta chachuno.

O Del achel po alav kai ka braduil pe foro

¹² Chachimaia phenav chuke Jakob, kai ka chidav so ka achel katar o Israel. Ka chidav len sargo e stoka katar o Bosra, sargo e bakre jan e char, ta divonpe kana dikhen bute llenen.

¹³ O lleno kai putarel lenge drom ka llal angla lende, ta von ka llan pala le, ta kana o drom ka avel putardo, ka den ta ka liken katar o udar. Me, o Gazda, sem lengo charo, ta ka llav angla lende.