Matei 8 - Biblia ande chib Romani

O Jesus sastarel iekhe llene katar e lepra

¹ Kana fulisto o Jesus katar o burdo, but sueto llala pala le.

² Ta avilo pasa le iek leproso kai dia changa angla le, ta phenda leke: Gazda, te mangea, sai sastare man katar mo nasualipe.

³ O Jesus dodisarda le pe vastea ta phenda: Mangav. ¡Sastiv! Ta isto kote achilo chisto katar po nasualipe.

⁴ Ondaka o Jesus phenda leke: Na phen nikake so avilape tuia, lla ta sikado e popoke, ta de kurbano pala cho sastipe sar phenda o Moises te cheren, te sai dikhen e popura kai sastilan.

O Jesus sastarel iekhe esluga katar iek boñiko

⁵ Kana o Jesus dia ando Kafarnaum, avilo pasa le iek boñiko kai molilape leke.

⁶ Ta phenela: Gazda, mo esluga si ande postelia po meripe ando cher ta nasti phirel ta dukhal le but.

⁷ O Jesus phenda leke: Me ka llau ta ka sastarav le.

⁸ A o boñiko phenda leke: Gazda, ni sem manus lacho te de ande mo cher, samo phen o alav ta mo esluga ka sastol.

⁹ Soke i pe mande gazdarin ta i me gazdariu, ta si tala mo va boñikura, ta phenav goleke lla, ta vou llal, a ogoleke: Aide, ta vou avel. A kana me phenav me eslugake cher gaia ezgoda, vou cherel la.

¹⁰ Kana asunda le o Jesus chudisailo ta phenda e llenenge kai llana pala lete: Chachimaia phenav tumenge ka ni ando Israel ni maladem gia baro pachape sargo gale lleneko.

¹¹ Phenav tumenge kai but llene katar o oriente ta katar o oksidente ka besen e Abraamea, e Isaakea ta i e Jakoboia ande charoina e milosoki,

¹² a e chave e charoinake ka aven tradine avri ando truniariko, kote ka avel o roipe ta e bari dar.

¹³ Ondaka o Jesus phenda e boñikoke: Llatar, ta gia sar pachaian te cherdol chuke. Ta leko esluga sastilo isto ande gua saiato.

O Jesus sastarel esasui e Pedroki

¹⁴ O Jesus llelo kai o cher e Pedroko, ta dikhla kai leki sasui saia ande postelia ta phabola nasualimatar.

¹⁵ Ondaka dodisarda lako va ta sastili, voi ustili, ta radila leke.

O Jesus sastarel buten nasualen

¹⁶ Kana peli e riat inllarde lete bute llenen kai sea llavolura ande lende, ta samo e alavea tradia avri e llavolonen ta sastarda sa e nasualen.

¹⁷ Gia cherdilo so phendaia o profeta o Isaias: Isto vou lia amaro nasualipe ta lia amare dukha.

Gola kai mangena te llan pala o Jesus

¹⁸ Kana o Jesus dikhla kai truial letar saia but sueto phenda te nakhen pe o goia rig katar e mora katar e Galilea.

¹⁹ Ta avilo pasa le iek kovachi e zakonoko ta phenda leke: Kovachi, ka llau pala tu kaigo tu llaia.

²⁰ O Jesus phenda leke: E lisiche si len kai te gurudon, ta i e chiriklia e milosoke si len kuibura, a o Chavo e Manuseko inai le kai te thovel po soro.

²¹ Aver katar leke disipulura phenda leke: Gazda muk mai anglal te llau te prajou me dade.

²² O Jesus phenda leke: Aide pala ma muk e llenen kai si mule te prajon pire mulen.

O Jesus achavel e balavia

²³ O Jesus likisto ande llimia ta leke disipulura llele pala le.

²⁴ Ta vazdinaili pe mora iek balav gia bari kai e valura ucharena e llimia, a o Jesus sovela.

²⁵ Ondaka avile pasa le leke disipulura ta llungade le, ta phenena: ¡Gazda, braduisar amen, ka tasiva!

²⁶ Vou phenda lenge: ¿Soke daran manusalen kai si tumen gia cherricha pachape? Ondaka, ustilo ta dia pe balavia ta i pe mora, ta avilape iek baro esmiro.

²⁷ A e manusa chudinape ta phenena: ¿Savo manus si gava kai llik e balavia ta i e mora kandel le?

E bengale katar e Gadara

²⁸ Kana avilo pe o goia rig katar e mora kai e phuv katar e gadarenura, dui llene kai sea ande lende llavolura, likiste katar e limoria ta avile lete. Von sea gia dive kai niko nasti nakhela katar gua drom.

²⁹ Ta urkina ta phenena: ¡So si chuke amenchar, Jesus Chavo e Devleko! ¿Avilan kate te pati amen mai oma katar amaro vreme?

³⁰ Kotar dur lendar sea but bale kai jana,

³¹ a e llavolura molisaile leke ta phenena: Te ikandan amen katar gala llene, muk amen te da ande gola bale.

³² Vou phenda lenge: Llan. Von likiste katar gola llene ta die ande gola bale, ondaka sa gola bale prastie karing e mora katar iek jar, ta sa mule ando pai.

³³ E llene kai arakhena e balen nasle, ta kana avile ando foro phende sa so nakhlaia e llenenchar kai saia e llavolura ande lende.

³⁴ Ondaka sa o foro llelo kote kai saia o Jesus, ta kana dikhle le molisaile leke te llaltar katar lengi phuv.