Matei 7 - Biblia ande chib Romani

Kana krisin averen

¹ Na krisin te na aven krisime.

² Soke gia sar tumen krisin averen, isto gia tumen ka aven krisime, ta gia sar tumen llinen averen isto gia ka averen tumen llinde.

³ ¿Soke dikhe e truña kai si ande che phlaleki iak, a ni dikhe o kas kai si ande chiri iak?

⁴ ¿A sar ka phene che phlaleke: Muk man te ikanav e truña katar chi iak, kana ande chiri si iek kas?

⁵ ¡Manus kojamno san! mai anglal ikan o kas kai si ande chiri iak, ta ondaka ka dikhe sukar te ikane e truña katar e iak che phlaleki.

⁶ Na den e ezgode sante e llukelen, ta na chuden tumare klea angla e bale, sai avelpe kai sai ustaven len ta i sai irinpe te dandaren tumen.

O molipe ta o zakono sunakuno

⁷ Mangen ta ka avel tumenge dino, roden ta ka malaven, maren po udar ta ka putaol tumenge.

⁸ Soke gua kai mangel, lel, ta gua kai rodel, malavel, ta gua kai marel po udar, putaol leke.

⁹ ¿A vareko tumendar, tromal te del pe chaurre iek barr kana mangel letar iek marrno?

¹⁰ ¿A te mangela iek macho, ka del le iek sap?

¹¹ A tumen, kai sen bilache ta llanen te den lache ezgode tumare chaurren, ¡pe gachin mai but tumaro Dad kai si ando miloso ka del lache ezgode golenge kai mangen letar!

¹² Goleke cheren tumen e llenenchar isto gia sar mangena te cheren tumenchar e llene, soke gava si o zakono ta e poraukura.

O udar tanguno

¹³ Den katar o udar tanguno, soke bulo si o udar ta baro si o drom kai inllarel kai o jasardipe, ta but si kai den letar,

¹⁴ a tanguno si o udar ta i o drom kai inllarel kai o zivoto, ta cherricha si e llene kai malaven le.

Pala lenge septelie ka pinllaren len

¹⁵ Arakhen tumen katar e poraukura kai inai chache kai aven tumende bakrane patavenchar, a andral von si ruva chorane.

¹⁶ A prema so von cheren ka pinllaren len. Ni ikandon drakha katar e kasta karrnale, o simochine katar e karrne.

¹⁷ Goleke, suako kas lacho del septelie lache, a o kas bilacho del septelie bilache.

¹⁸ O kas o lacho nasti del bilache septelie, ni o kas bilacho del septelie lache.

¹⁹ Suako kas kai ni del lache septelie, chinen le ta chuden le ande iag.

²⁰ Goleke pala lenge septelie ka pinllaren len.

Nikada ni pinllardem tumen

²¹ Ni ka del ande charoina e milosoki suako lleno kai phenel mange: Gazda, Gazda. O lleno kai del andre si gua kai cherel e volia me Dadeki kai si ando miloso.

²² But llene ka phenen mange ande gua llive: Gazda, Gazda, ¿Ni phendam so saia te avelpe ande cho anav, ta ande cho anav tradiam avri e llavolonen ta ande cho anav cherdam but bare ezgode Devlikane?

²³ Ondaka ka phenav lenge: Nikada ni pinllarden tumen ¡Llantar mandar, soke samo o bilachipe cheren!

E dui chera

²⁴ Vareko te asunel man ta cherel so me phenav, si sargo iek lleno bizai kai cherda po cher po barr.

²⁵ Avilo o bursin, barile e paia, phurdie e balavia, ta chalade pe gua cher, ta ni peradilo, soke saia thodo po barr.

²⁶ A vareko kai asunel me alava ta ni cherel len, ka phenav kai si sargo iek manus dilo kai cherda po cher pe chisai.

²⁷ Avilo o bursin, barile e paia, phurdie e balavia, ta chalade zurale pe gua cher, ta achilo zatrime.

²⁸ Kana phenda o Jesus sa gala alava, o sueto chudisailo katar leko sikadipe.

²⁹ Soke vou sikavela len sargo iek kai si le zor a na sargo e kovacha e zakonoke.