Matei 6 - Biblia ande chib Romani

Katar e esmola

¹ Na cheren o lachipe angla e manusa samo te sai dikhen pe tumende, soke te cherena gia, tumaro Dad kai si ando miloso ni ka del tumen te dobin niso.

² Goleke kana ka pomozi e chorren, na phenle saurrenge gia sar cheren le e llene kai si kojamne kai cheren gala ezgode ande khanllira e judionenge ta pe droma te sai den orbe lache lendar e llene, chachimaia phenav tumenge kai gole ezgodaia kai cheren ia si len so te dobin.

³ Goleke tu kana ka pomozi e chorren, na phenle nikake,

⁴ cher le po chorial, ta cho Dad kai dikhel so chere po chorial, ka del tut so te dobi angla e llene.

O molipe

⁵ Kana ka moli tut, na cher tut sargo e llene kojamne, soke lenge si drago te molinpe pe porrne ande khanllira e judionenge ta i pe droma te sai dikhen len e llene, chachimaia phenav tumenge kai gole ezgodaia kai cheren ia si len so te dobin.

⁶ A tu kana ka moli tut, de andre ande chi soba, phande o udar ta molisao che Dadeke po chorial, ta cho Dad kai dikhel so chere po chorial, ka del tut so te dobi angla e llene.

⁷ Ta kana ka moli tut, na phen isto gola alava suako drom gia sar cheren le gola kai inai judiura, kai mislinpe kai pala pe but alava o Del ka asunel len.

⁸ Na cheren tumen sargo von, soke tumaro Dad llanel save ezgode trubul tumen mai anglal te mangen len.

⁹ Tumen ka molintumen gia: Amaro Dad kai san ando miloso, blagosime te avel cho anav.

¹⁰ Te avel chi charoina, te cherdol chi volia pe phuv gia sar cherdol ando miloso.

¹¹ De amen allive o marrno kai trubul amen.

¹² Ta prostisar o bilachipe kai chera, gia sar prostisara i amen e llenen kai cherde amenge o bilachipe.

¹³ Na thov amen ando zumadipe, mai lache braduisar amen katar o bilachipe. Soke chiri si e charoina e zor ta o baripe sa e bursenchar. Gia te avelpe.

¹⁴ Goleke, te prostina o bilachipe kai cheren tumenge e manusa, tumaro Dad kai si ando miloso ka prostil i tumaro bilachipe,

¹⁵ a tumen te na prostina o bilachipe kai cheren tumenge e manusa, ni tumaro Dad ni ka prostil tumaro bilachipe.

O Jesus del orba katar o alluno

¹⁶ Kana tumen ka allunin na thoven iek mui zalbako sargo e llene kojamne kai triston pe muia te sai sikaven e manusenge kai von allunin, chachimaia phenav tumenge kai len ia si len so te dobin.

¹⁷ Goleke tu kana ka alluni, chingar che bal ta jalau cho mui,

¹⁸ te na sikave e manusenge kai alluni, samo cho Dad ka llanel le, ta cho Dad kai dikhel so chere po chorial ka del tut so si te dobi.

O barvalipe ando miloso

¹⁹ Na cheren tumenge barvalipe pe phuv, kate kai e papuruga ta e pauzina zatrin ta kai e chor den ta vazden,

²⁰ mai lache si te cheren tumenge barvalipe ando miloso, kote kai ni e papuruga ni e pauzina ni zatrin, ta kote kai e chor ni den te choren.

²¹ Soke kote kai si cho barvalipe, i kote ka avel cho lio.

O villelo e esnagako

²² E akha si o villelo e esnagako, goleke che akha te si lache, sa chi esnaga ka avel la villelo

²³ A te si che akha bilache, sa chi esnaga ka avel ando truniariko. Goleke, o villelo kai si ande tute te si truniariko, ¿sar avela isto o truniariko?

O Del ta o barvalipe

²⁴ Niko nasti radil duie gazdenge, soke ka murzil pe iek ta ka volil ogole, o ka kandel iekhe a ogoleke ni ka thovel sama. Nasti radilpe e Devleke ta i e barvalimake.

E vera ando Del

²⁵ Goleke me phenav tumenge: Na brigin tumen pala so ka jan te zivin ni pala e patave soia ka premenin tumen, ¿Ni mol o zivoto mai but neko o jape ta e esnaga mai mol neko e patave?

²⁶ Dikhen pe chiriklia kai furian, ni thoven e simiche ande phuv ta ni chiden len ande sobe ta isto gia tumaro Dad kai si ando miloso del len te jan. ¿Ni mol tumen mai but neko e chiriklia?

²⁷ A vareko i mai te brigilpe, ¿sar ka cherel te zivil iek saiato mai but?

²⁸ Ta katar e patave, ¿soke triston tumen? Thoven sama sar barion e lulunlla katar o vos kai ni radin ta ni cheren peke patave,

²⁹ a phenav tumenge kai ni o charo o Salomon sa pe barimaia ni furiadilo sargo iek lulunllin.

³⁰ A o Del te furiavel gia o zelelenipe kai allive si ando vos ta thiara phabardol ande furnava, ¿ni ka furiavel mai but tumen, manusalen kai inai tumen pachape?

³¹ Goleke na triston tumen, ta na phenen: ¿So ka ja, o so ka pia, o so ka thova pe amende?

³² Sa gala si e ezgode kai brigin e llenen kai ni pachan ando Del, a tumen si tumen iek Dad ando miloso kai llanel sa so trubul tumen.

³³ Goleke, roden mai anglal e charoina e Devleki ta leko chachipe, ta i sa gala ezgode ka aven tumenge dine.

³⁴ Goleke na triston tumen katar o llive kai si te avel, soke o llive kai si te avel ka anel e brige. Dosta suako lliveseke leko bilachipe.