Matei 5 - Biblia ande chib Romani

O Jesus sikavel po burdo

¹ Kana o Jesus dikhla e sueto, likisto po burdo ta beslo, leke disipulura avile pasa le.

² Ta vou thoda te sikavel len ta phenela lenge gia:

O blagosipe

³ Blagosime e chorre ando duo, soke lengi si e charoina e milosoki.

⁴ Blagosime gola kai roven, soke o Del ka del len zor.

⁵ Blagosime gola kai ni istardon soke von ka len e phuv kai ka avel dini e Devletar.

⁶ Blagosime gola kai si lenge bok ta trus katar o chachipe, soke von ka aven prabarde.

⁷ Blagosime gola kai si lenge zao pala aver llene, soke i e Devleke ka avel zao lendar.

⁸ Blagosime gola kai lengo lio si chisto, soke ka dikhen e Devle.

⁹ Blagosime gola kai branin, soke von ka aven ikharde chave e Devleke.

¹⁰ Blagosime gola kai maren len cheres o chachipe, soke lengi si e charoina e milosoki.

¹¹ Blagosime ka aven tumen kana e llene ka kusen tumen cheres ma, ta ka maren tumen, ta ka phenen suako bilachipe tumendar kojaimaia.

¹² Veselin tumen, soke so si te dobin ando miloso si baro, soke isto gia marde e porauken kai zivisarde mai anglal neko tumen.

O lon e phuviako

¹³ Tumen sen o lon gale phuviako, a o lon te jasarel po londipe, ¿sar ka avel londo pale? ondaka ni trubul nisoke samo te chuden le avri ta te avel ustado e manusendar.

O villelo e phuviako

¹⁴ Tumen sen o villelo gale phuviako, iek foro cherdo pe iek burdo nasti gurudol.

¹⁵ Ta ni phabardol iek memeli te uchardol varesoia, e memeli morabi te thodol upre te sai kletosarel sa e llenen kai si ando cher.

¹⁶ Isto gia si te kletosarel tumaro villelo angla e manusa, te sai dikhen tumare lache ezgode kai cheren, ta te blagosin tumare Devle kai si ando miloso.

O Jesus ta o zakono

¹⁷ Na mislin tumen kai avilen te phagau o zakono o e porauken, ni avilen te phagau len, avilem te kandau len.

¹⁸ Soke chachimaia phenav tumenge, kai sogo ka avel o miloso ta e phuv, ni iek orba ta ni iek alav ni ka nakhel katar o zakono lligo ni ka avel cherdi suako ezgoda.

¹⁹ Goleke, vareko te phagela iek katar gala zakonura mai minone, ta gia te sikavel e manusen, ka avel ikhardo o mai minono ande charoina e milosoki. A o lleno kai kandela e zakonura ta sikavela len, gava lleno ka avel ikhardo baro ande charoina e milosoki.

²⁰ Goleke phenav tumenge, te na avela tumaro chachipe mai baro neko o chachipe katar e fariseura ta e kovacha e zakonoke, ni ka den ande charoina e milosoki.

E orba katar e joli

²¹ Tumen asunden kai phende tumare puranenge: Ni ka mundare, ta ko mundarela ka avel dosalo pe kris.

²² A me phenav tumenge: Kai vareko te joliaola pe phlalea, ka avel dosalo pe kris, ta i kogo phenela dilea pe phlaleke, ka avel dosalo pe mai bari kris, a vareko te kusela zurale pe phlale sai avel thodo ando tufano iagako.

²³ Goleke te anea kai o altar so si dino, ta kote te dea tut golli kai cho phlal si joliariko tuia,

²⁴ muk kote angla o altar so andan te de, ta lla kai cho phlal ta lachar tu lea, ta ondaka irisao ta muk so si dino.

²⁵ Lachar tut oma che dusmanoa llik kai si tut vreme, soke sai avelpe kai cho dusmano sai inllarel tut kai o krisari, soke te na cherea gia, o krisari sai del tut kai e boñikura ta sai thoven tut ande rubie.

²⁶ Chachimaia phenav chuke, kai ni ka like kotar lligo ni ka pochine suako groso.

Katar gua kai si zinime ta llal avere diskiniaia

²⁷ Tumen asunden kai phendo si: Te na chere o kurvaluko.

²⁸ A me phenav tumenge: Kai vareko te dikhela pe iek diskinia bilachimaia ande po lio, golea vou cherda o bilachipe laia.

²⁹ Goleke chi iak e chachi te cherel tut te pere ando bilachipe, ikan la ta chude la tutar, soke mai lache avela chuke te jasare iek kotor katar chi esnaga a na sa chi esnaga te avel chudini ando tufano.

³⁰ A cho va o chacho te cherel tut te pere ando bilachipe, chin le ta chude le tutar, soke mai lache si te jasaol iek kotor katar chi esnaga a na sa che esnagaia te ave chudino ando tufano.

Kana mukenpe

³¹ Ta i phendo si: Vareko te putarela o drom pe rromiake, morabi te del la iek lil kai mukel la.

³² A me phenav tumenge: Iek lleno kai mukelpe katar pi rromi, te na avelape kai voi cherda o kurvaluko, isto vou cherel la te perel ando kurvaluko, a o lleno kai zinilpe iekhe mukliaia i vou cherel o kurvaluko.

Katar e sovel

³³ Ta i asunden kai phendo si tumare puranenge: Te na jan sovel bange, mai sukar cher so chinadan e Devleke kana jalan leke sovel.

³⁴ A me phenav tumenge: Na jan sovel pe nisavi ezgoda, ni po miloso, soke si o trono e Devleko,

³⁵ ni pe phuv, soke kote thovel pe porrne, ni po Jerusalem soke si o foro katar o baro charo.

³⁶ Na ja sovel ni pe cho soro, soke nasti chere parno ni kalo ni iek bal katar cho soro.

³⁷ Goleke kana ka den orba phenen ea o iok, soke so si mai but katar gala avel katar o llavolo.

Katar o lallao

³⁸ Tumen asunden kai phendo si: Iak pe iak, ta dan po dan.

³⁹ A me phenav tumenge: terpisar gole lleneke kai cherda chuke varesavo bilachipe. A vareko te chalavela tut pe chi cham e chachi, boldiniao ta thov i o goia.

⁴⁰ Vareko te thovela tut pe kris te lel cho gad, muk te lel i cho gertachi.

⁴¹ A vareko te thovela tut te inllare pe zor iek pharipe iek kilometro, inllarle dui.

⁴² A vareko te mangela tutar vareso, de le, a vareko te mangela tutar unllile, na phen leke iok.

O volipe pe dusmanura

⁴³ Asunden kai phendo si: Volisaren tumare llenen, ta murzisaren pe tumare dusmanura.

⁴⁴ A me phenav tumenge: Volisaren tumare dusmanonen ta molintumen pala gola llene kai roden te maren tumen.

⁴⁵ Ta gia tumen ka aven chave katar tumaro Dad kai si ando miloso, kai cherel te likel o kham upral pe bilache ta i pe lache, ta cherel te del peke pe chache ta i pe gola kai inai chache.

⁴⁶ Soke te volina tumen samo golen kai volin tumen, ¿so ka dobin? ¿Ni cheren gia e publikanura?

⁴⁷ A te phene sar san, samo che phlalenge ¿savo lachipe chere? I gola kai ni pachan ando Del cheren gia.

⁴⁸ Tumen morabi te aven orta gia sar si orta tumaro Dad kai si ando miloso.