Matei 4 - Biblia ande chib Romani

O Jesus zumado

¹ Ondaka o Duo e Devleko inllarda e Jesuse po pusto te sai zumavel le o llavolo.

² Kote achilo saranda llive ta saranda racha, ta bokhailo.

³ Ondaka o llavolo avilo pasa le, ta phenda leke: Te san chachimaia o Chavo e Devleko, phen gale barrenge te cherdon marrno.

⁴ A o Jesus phenda leke: Ando Pisipe phenel gia: Na samo e marnetar ka zivil o manus, o manus zivil i katar suako alav kai likel katar e Devleko mui.

⁵ Ondaka o llavolo inllarda le ando santo foro katar o Jerusalem ta thoda le upral po than mai vazdino katar o cher e Devleko,

⁶ ta phenda leke: Te san chachimaia o Chavo e Devleko, chude tut tele, soke ando Pisipe phenel gia: O Del ka bichalel pe suechonen te arakhen tut, ta ka vazden tut pe vastenchar te na eskombal cho porrno pe ni iek barr.

⁷ A o Jesus phenda leke: Ta i ando Pisipe phenel gia: Na thov ando zumadipe e Gazda kai si cho Del.

⁸ Mapalal o llavolo inllarda le pe iek burdo but baro, ta sikada leke sa e phuvia e suetoke ta lengo baripe,

⁹ ta phenda leke: Me ka dav tut sa gala ezgode, te dea changa ta te blagosia man.

¹⁰ A o Jesus phenda leke: Llatar llavolo, soke ando Pisipe phenel gia: Blagosisar e Gazda kai si cho Del, ta radisar samo leke.

¹¹ Ondaka o llavolo mukla le, ta avile e suechura te pomozin le.

E Jesuseko rado llal angle

¹² Kana o Jesus asunda kai phangle e Juane, irisailo ande Galilea.

¹³ Ta ni achilo ando Nazaret, vou llelo ando Kafarnaum, kote beslo ande iek foro kai saia pasa e mora, ande phuv katar o Zabulon ta katar o Neftali.

¹⁴ Gala ezgode nakhle te sai cherdol so phendaia o profeta o Isaias kana phenda:

¹⁵ E phuv katar o Zabulon, ta e phuv katar o Neftali, o drom kai llal kai e mora pe o goia rig katar o Jordan ande Galilea, kote kai zivin e llene kai inai judiura.

¹⁶ O foro kai besela ando truniariko, dikhla iek baro villelo, gola kai besena ando truniariko merimako, o villelo sikadilo lenge.

¹⁷ Sar kotar o Jesus thoda te phenel: Irin tumen katar tumare bilache droma, soke e charoina e Devleki si pase.

O Jesus ikharel staren macharia

¹⁸ O Jesus phirela pasa e mora katar e Galilea ta dikhla duie phlalen, e Simono, kai ikharena le Pedro ta e Andrese. Von sea macharia ta chudena e mreza ande mora.

¹⁹ Ta o Jesus phenda lenge: Aven pala ma ta ka cherav tumen macharia manusenge.

²⁰ Ondaka von mukle isto kote pe mreze, ta lleletar lea.

²¹ O Jesus llelo mai angle ta dikhla duie phlalen ios, e Santiago ta e Juane chave e Zebedeoke, von sea pe dadea ande iek llimia ta lacharena pe mreze ta o Jesus ikharda i len,

²² Ta isto kote kana ikharda len, mukle e llimia ta i pe dade ta lleletar lea.

O Jesus sikavel e sueto

²³ O Jesus llala ande sa e phuv katar e Galilea, ta sikavela ande khanllira e judionenge, ta dela orba katar e lachi viasta, katar e charoina, ta i sastarela e manusen katar sa lengo nasualipe ta i katar sa lenge dukha kai saia len ando foro.

²⁴ Ta lleli leki viasta ande sa e phuv katar e Siria, ta anena lete sa golen kai sea nasuale o kai dukhala len vareso, ta i golen kai sea e llavolura ande lende, ta i gola kai perena bengendar, ta i golen kai nasti phirena, ta o Jesus sastarela len.

²⁵ Pala le llala but sueto katar e Galilea, katar e Dekapolis, katar o Jerusalem, katar e Judea, ta i katar o goia rig katar o Jordan.