Matei 28 - Biblia ande chib Romani

O Jesus ustel katar e meripe

¹ Kana nakhlo o sabado kana llivosaola o purvo llive, e Maria Magdalena ta o goia Maria llele te dikhen o limori.

² Ta ondaka dermosaili e phuv but zurale soke iek suecho e Devleko fulisto katar o miloso ta ikanda o barr kai saia po udar katar o limori, ta beslo upral po barr.

³ O suecho saia sargo iek esterlicha ta leke patave parrne sargo o iv.

⁴ E boñikura izdraie daratar ta achile sargo mule.

⁵ A o suecho phenda e diskinienge: Tumen na daran soke me llanav kai tumen roden e Jesuse kai krustosarde.

⁶ Vou inai kate soke ustilo katar o meripe gia sar phendaia, aven dikhen kote kai thode e Gazda.

⁷ Akana llan oma ta phenen leke disipulonenge kai ustilo katar o meripe ta llal angla tumende ande Galilea, kote ka dikhen le, gala alava me saia te phenav tumenge.

O Jesus sikadol e diskinienge

⁸ Ondaka von lleletar daraia katar o limori ta i bare veselimaia lleletar prastindo te phenen e disipulonenge.

⁹ A kana von llana te phenen e disipulonenge, o Jesus llelo te maladol lenchar ta phenda lenge: Salami, a von avile pase pasa leke porrne ta dodisardelen ta blagosisarde le.

¹⁰ Ondaka o Jesus phenda lenge: Na daran llan phenen e viasta me phlalorrenge te sai llan ande Galilea ta kote ka dikhen man.

E boñikura bichindon pala e love

¹¹ Kana von llana, nesave katar e boñikura llele ando foro ta phende e mai preche poponenge sa e ezgode kai nakhlea.

¹² Von chidinaile e phurenchar ta achile pe orba ta die but love e boñikonen.

¹³ Ta phende lenge: Tumen ka phenen gia kai leke disipulura avile orachaia ta vazdiele kana amen sovaia.

¹⁴ A te asunda gava Pilato amen ka phena leke te na cherel tumenge niso.

¹⁵ Von lie e love ta cherde isto gia sar phendea lenge, ta gaia si e viasta kai lleli maskar e judiura llik allive.

¹⁶ A e desuiek disipulura lleletar ande Galilea, po burdo kote kai o Jesus phendaia lenge.

¹⁷ Kana dikhle e Jesuse blagosisarde le, a nesave ni pachana.

Llan te cheren disipulura

¹⁸ O Jesus avilo mai pase ta dia lenchar orba ta phenda lenge: Sa e zor si dini mange ando miloso ta i pe phuv.

¹⁹ Goleke llan ta cheren disipulura pe sa e phuvia ta kristin len ando anav e Dadeko e Chaveko ta ando Santone Duoko.

²⁰ Ta sikaven len te arakhen sa ezgode kai phendem te cheren, ta me sem tumenchar suako llive llik o son e suetoko. Gia te avelpe.