Matei 27 - Biblia ande chib Romani

O Jesus angla o Pilato

¹ Thiarinako rano avile sa e mai preche popura ta i e phure e foroke, ta chidinaile te denpe orba te sai mundaren e Jesuse.

² Ta inllarde le phanglo ta diele kai o Ponsio Pilato, gua kai gazdarila goia phuv.

Sar mulo o Judas

³ Ondaka o Judas, gua kai bichinda e Jesuse, kana dikhla kai mangena te mundaren le, irisarda keime e tranda tolaria rupune kai e mai preche popura ta i kai e phure.

⁴ Ta phenela: Me cherdem bilachipe soke dien o rat kai ni saia dos pe lete. A von phende leke: ¿A so chitilpe amenge? ¡Dik tu so ka chere!

⁵ Ondaka o Judas chudia e tolaria rupune ando cher e Devleko, likisto kotar ta umbladape.

⁶ E mai preche popura lie e tolaria rupune ta phende: Inai sukar te thova gala love ande ogola love kai chidiniaon ando cher e Devleko soke si love kai lenchar pochinde rat.

⁷ Kana diepe orba chinde gole lovenchar e umal katar o manus kai cherel piria chikake te sai cheren limoria gole llenenge kai aven avere phuviatar.

⁸ Goleke goia umal ikhardol llik allive: Umal rateki.

⁹ Gia cherdile e alava kai phendaia katar o profeta Jeremias kana phenda: Ta lie e tranda kotora rupune, gua saia so chinadea e israelitura te pochinen gole kai mol le but,

¹⁰ Ta die e tolaria pe umal katar o manus kai cherel piria chikake gia sar phendaia mange o Gazda.

O Pilato puchel e Jesuse

¹¹ O Jesus saia pe porrne angla o Pilato ta o Pilato puchla le: ¿San tu o charo e judionengo? O Jesus phenda leke: Tu phendanle.

¹² Sa e mai preche popura ta i e phure dosarena le a o Jesus ni phenela niso lenge.

¹³ Ondaka o Pilato phenda leke: ¿Ni asune pe gachin ezgode phenen te dosaren tut?

¹⁴ A o Jesus ni phenda niso leke pe sa e orbe kai puchenale. Pala gua o Pilato chudilape but.

Chinaven o meripe e Jesuseko

¹⁵ A po llive katar e Paskua, o Pilato saia sikado te mukel e foroke iekhe phangle save von mangena.

¹⁶ Ondaka sar saia iek phanglo but asundo kai ikhardola Barrabas,

¹⁷ sar o sueto saia chidino, o Pilato puchla len: ¿Ka mangen te mukau tumenge: E Barrabase o e Jesuse kai ikharen le o Mesias?

¹⁸ Soke o Pilato llanela kai von inllardea lete e Jesuse te phanden le soke von murzina po Jesus.

¹⁹ Ta kana o Pilato besela pe kris leki lluvli bichalda te phenen leke: Te na ami tut niso gale chache manusea soke allive but dukhadi sema ande sune pala gava manus.

²⁰ A e mai preche popura ta e phure cherde sa e sueto te mangen a Barrabase a e Jesuse te mundaren.

²¹ O Pilato phenda lenge: ¿Savo katar e dui mangen te mukliarav tumenge? A von phende: ¡E Barrabase!

²² O Pilato phenda lenge: ¿A so ka cherav e Jesusea kai ikharen le o Mesias? A saurre phende: ¡Te avel krustome!

²³ O Pilato phenda lenge: ¿A savo bilachipe cherda? A von ios urkina ta phenena: ¡Te avel krustome!

²⁴ Sar o Pilato dikhela kai ni blazila leke e orba kai dela ta kai o sueto mai but urkila, lia pai ta jalada pe va angla o foro ta phenda: Me ni sem dosalo katar o rat katar gava manus chacho, dikhen tumen so ka cheren.

²⁵ Sa o sueto phenda: ¡Leko rat te perel pe amende ta pe amare chaurre!

²⁶ Ondaka mukla lenge e Barrabase, mapalal phenda te chalaven e Jesuse e bichoia ta diale te kruston le.

²⁷ Ondaka e boñikura katar o Pilato inllarde e Jesuse kai e krisako cher ta chidie truial lete sa e boñikonen,

²⁸ ta sar nangarde le, chudie upral pe lete iek gertachi lolo.

²⁹ Ta cherde iek korona katar e karrne ta thodela pe leko soro, ta thode ande leko va o chacho iek kas, ta die changa angla le, ta espurnaia phenena: ¡Salve, charo e judionengo!

³⁰ Ta chungardena le ta isto e kastea chalavena le po soro.

³¹ Ta kana marde espurnia, lie letar o gertachi, thode leke patave, ta inllarde le te kruston le.

O krustope ta o meripe e Jesuseko

³² Kana likena, malade iekhe manuse katar o Sirene kai ikhardola Simono, gale llene pe zor cherde le te inllarel o krusto.

³³ Ta kana avile pe iek rig kai ikhardola Golgota, gua alav si: E rig katar e kokala,

³⁴ die le te piel vinagre amime patrenchar cherke, a kana o Jesus zumada ni kamla te piel.

³⁵ Kana kafrosarde le, e boñikura fulade maskar pete leke patave, ta chelenape te dikhen ko ka achel leke patavenchar, te sai cherdol so phendaia o profeta: Fulade maskar pete me patave ta cheldepe ko ka achel me patavenchar.

³⁶ Ondaka besle kote te arakhen le.

³⁷ Ta upral katar saia leko soro thode gala alava pisime: Gava si o Jesus, o charo e judionengo.

³⁸ Ondaka krustosarde lea duie choren, iek pe rig e chachi ta aver po stingo.

³⁹ A e llene kai nakhena angla le marena mui letar,

⁴⁰ ta phenena: ¡Tu kai perave o cher e Devleko ta ande trin llive vazdele! ¡Braduisar isto tut te san o Chavo e Devleko ta fulie katar o krusto!

⁴¹ Ta isto gia e mai preche popura, marena mui letar ta i e kovacha e zakonoke ta e fariseura ta i e phure phenena:

⁴² Averen braduisarda, a vou pe nasti braduil, te si o charo katar o Israel, te fuliel akana katar o krusto, ta ka pacha ande le.

⁴³ Pachaia ando Del, ¡o Del te braduil le, soke phenda: Me sem o chavo e Devleko!

⁴⁴ Ta i e chor kai sea krustome pasa le kusena le.

Sar mulo o Jesus

⁴⁵ Ta katar e desudui e lliveseke llik kai e trin sa phuv achili ando truniariko.

⁴⁶ Ande gua saiato, o Jesus bare avazea phenda: Eli, Eli, ¿lama sabaktani? gava si: Murno Del, Murno Del, ¿soke muklan man?

⁴⁷ Nesave llene kai sea kote, asunde le, ta phende: Gava ikharel e profeta e Eliase.

⁴⁸ Ta isto kote prastia iek lendar, lia iek pamuko, ta chingardale e vinagrea kai saia amime e patrenchar cherke ta thoda le pe iek kas ta diale te piel.

⁴⁹ A ogola llene phenena: Muk, dikha o ka avel o Elias te braduil le.

⁵⁰ A o Jesus pale urkisarda ando baro avazi, ta mulo.

⁵¹ Ta e kortina katar o cher e Devleko chindilo pe dui kotora upral llik tele, ta e phuv dermosaili ta e barra phagona,

⁵² ta e limoria putaile, ta e esnage bute santonenge kai mulea, ustile,

⁵³ ondaka kana o Jesus ustilo katar o meripe, von llele ando foro santo katar o Jerusalem, ta sikadile bute llenenge.

⁵⁴ O boñiko ta i gola kai arakhena e Jesuse, kana dikhle kai e phuv dermosaili, ta e ezgode kai nakhlea, avila lenge bari dar ta phende: ¡Chachimaia gava saia o Chavo e Devleko!

⁵⁵ Kote sea but diskinie kai dikhena duratar, gola diskinie llelea pala o Jesus ta pomozisardea le chak katar e Galilea,

⁵⁶ Maskar gola diskinie saia e Maria Magdalena, e Maria e dei katar o Santiago ta i katar o Jose, ta e dei katar e chaurre katar o Zebedeo.

Thode e Jesuse ando limori

⁵⁷ Kana peli e riat, avilo iek lleno barvalo katar e Arimatea kai ikhardola Jose, i vou saia iek katar e llene kai llana pala o Jesus.

⁵⁸ Llelo kai o Pilato ta mangla letar e esnaga e Jesuseki. Ondaka o Pilato phenda te denla leke.

⁵⁹ Kana o Jose lia e esnaga e Jesuseki ulisarda le ande iek chiti jalado,

⁶⁰ ta thoda le ande piro limori nevo kai diaia te cherdol andre ando barr. Kana o Jose phangla iekhe bare barrea o limori, llelotar.

⁶¹ Ta sea kote e Maria Magdalena, ta o goia Maria, besindo angla o limori.

E boñikura angla o limori

⁶² Thiarinako katar gua llive ando sabado chidinaile e mai preche popura ta i e fariseura angla o Pilato,

⁶³ ta phende leke: Gazda, diam amen golli kai gua kojamno phendaia kana saia llundo: Kai pala e trin llive ka ustel katar o meripe.

⁶⁴ Bichal akana te arakhen o limori llik kai e trin llive, soke sai aven leke disipulura orachaia ta sai vazden leki esnaga ta mapalal sai phenen e foroke kai vou ustilo katar o meripe ta gava kojaipe sai avel mai baro neko o purvo.

⁶⁵ O Pilato phenda lenge: Kote si tumen iek boñikura, llan ta arakhen o limori.

⁶⁶ Ondaka von llele kai o limori, ta phangle o limori iekhe barrea ta thode e boñikonen te arakhen le.