Matei 22 - Biblia ande chib Romani

O jape e biaveko

¹ O Jesus pale dia lenge orba paramichenchar ta phenela:

² E charoina e milosoki si sargo iek charo kai cherda iek baro biau pe chaurreke.

³ Ta bichalda pe eslugen te ikharen e llenen po biau, a von ni kamle te aven.

⁴ Pale bichalda avere eslugen ta phenda lenge: Phenen e llenenge kai si ikharde po biau kai e sinia si thodi. Bichaldem ta mundarde me guruven ta i me zivirinien ta sa cherdo si, aven po biau.

⁵ A von ni thode leke sama. Iek lendar llelotar te radil e phuv, aver llelotar te radil ande aver buchi,

⁶ ta aver, lie e eslugen marde len ta mundarde len.

⁷ Kana o charo asunda gala ezgode, jolailo, ta bichalda pe boñikonen, ta mundarda gole bilache llenen ta phabarda lengo foro.

⁸ Ondaka phenda pe eslugenge: E sinia si thodi, a e gostura ni sea lache.

⁹ Llan pe droma ta ikharen po biau saurren.

¹⁰ Ondaka e esluge llele pe droma ta chidie sa golen kai malade, lachen ta i bilachen, ta o biau pherdilo gostura.

¹¹ Kana o charo dia te dikhel e llenen kai avile, dikhla iekhe manuse kai ni saia furiado e biaveke,

¹² ta phenda leke: Amala ¿Sar dian kate bi te ave furiado e biaveke? A gua lleno ni phenda niso.

¹³ Ondaka o charo phenda e eslugenge: Phanden leke porrne ta i leke va ta chuden le avri ando truniariko, kote kai ka avel o roipe ta e bari dar.

¹⁴ Soke but llene si ikharde, a cherricha esvirime.

E love kai chiden e kralioke

¹⁵ Ondaka lleletar e fariseura ta puchena sar ka cheren te istaren e Jesuse pe varesavo alav te dosaren le.

¹⁶ Ta bichalde leke pire disipulonen ta lenchar llele i e erodianura te phenen leke: Kovachi, llana kai san chacho ta kai sikave chachimaia o drom e Devleko, ta ni dara katar e llene kai asunen, ta ni phene lenge alava te perel lenge drago.

¹⁷ Phen amenge akana, so misli: ¿Phen amenge si orta te pochina e love kai mangel o Sesar o iok?

¹⁸ A o Jesus, sar pinllerela lengo kojaipe, phenda lenge: ¿Soke zumaven man?

¹⁹ Sikaven mange o tolari kai morabi te den kai o Sesar. Von sikade leke iek denario.

²⁰ Ondaka vou puchla len: ¿Kako mui ta kako anav si pisime po tolari?

²¹ Von phende: E Sesareko. A o Jesus phenda lenge: Den e Sesare so si e Sesareko, a den e Devle so si e Devleko.

²² Kana asunde gaia orba chudisaile, ta lleletar.

Puchen sar ka usten e mule

²³ Isto gua llive, nesave saduseura llele te dikhen e Jesuse. E saduseura phenen kai ni ka usten e mule, goleke puchle le.

²⁴ Kovachi, o Moises phenda: Vareko te na avela le chaurre ta te merela, leko phlal morabi te zinilpe leke rromiaia te sai del chaurre pe phlale kai mulo.

²⁵ Kate maskar amende sea efta phlal: O purvo zinisailo ta ni avila le minone ta mulo. Sar ni saia le minone lia la leko phlal.

²⁶ A i gua phlal mulo, mapalal o trito phlal, ta gia llik kai efta phlal.

²⁷ Pala sa gala ezgode muli i e rromi.

²⁸ Kana ka usten katar o meripe ¿Kaki rromi ka avel katar e efta phlal?

²⁹ O Jesus phenda lenge: Tumen ni llanen, soke ni pinllarden o Pisipe ta ni e Devleki zor.

³⁰ Soke kana e mule ka usten, e murusa ta e diskinie ni ka zininpe, soke ka aven sargo e suechura kai si ando miloso.

³¹ A katar e orba kai e mule ka usten, ¿tumen ni chitisarden kai isto o Del phenda:

³² Me sem o Del katar o Abraam, katar o Isaak ta i katar o Jakob? ¡Ta vou inai Del e mulengo, vou si Del e llundengo!

³³ Kana e llene asunde gaia orba, chudisaile pala so sikavela o Jesus.

O zakono mai baro

³⁴ E fariseura chidinaile kana asunde kai o Jesus cherdaia te achen e saduseura,

³⁵ ta iek kai saia kovachi katar o zakono puchla le te sai zumavel le:

³⁶ Kovachi ¿Savo si o alav mai baro ando zakono?

³⁷ O Jesus phenda leke: Volisar che Devle sa che liea, sa che zivotoia ta sa che misloia.

³⁸ Gava si o mai baro alav ta o purvo ando zakono.

³⁹ Ta o duito si sargo o purvo, phenel gia: Volisar avere sar voli tu tut.

⁴⁰ Ande gala dui orbe si sa o zakono ta i e poraukura.

Kako chavo si o Mesias

⁴¹ Kana e fariseura sea chidine,

⁴² o Jesus puchla len: ¿A so mislin tumen katar o Mesias? ¿Katar savi vicha avel? Von phende leke: Katar e vicha e Davideki.

⁴³ Ondaka o Jesus phenda lenge: ¿A sar o David ando Duo ikharda le Gazda? Soke o David phenda:

⁴⁴ O Gazda phenda me Gazdake: Bes pe mi rig e chachi, llik kana me ka thovav che dusmanonen telal tala che porrne.

⁴⁵ ¿A sar sai avel o Mesias katar e vicha e Davideki kana isto o David ikharel le Gazda?

⁴⁶ Niko nasti dela le anglal, ta katar gua llive angle niko ni tromala te puchel le niso.