Matei 21 - Biblia ande chib Romani

O Jesus ando Jerusalem

¹ Kana avile pasa o Jerusalem llele ande Betfage kai o burdo e Maslinkengo, o Jesus bichalda duie disipulonen,

² ta phenda lenge: Llan ando forichi kai si angla tumende ta oma ka malaven iek magarcha phangli ta iek magarchichi laia. Mukliaren la ta anen len mande,

³ a vareko te phenela tumenge vareso, phenen leke kai e gazda trubun le ta oma vou ka iril len.

⁴ Sa gala ezgode nakhle te sai cherdol so phendaia o profeta:

⁵ Phenen e chaurrenge katar o Sion: Dikhen tumaro Charo, ni avel tumende barimaia avel besindo pe iek magarcho, pe iek magarchichi.

⁶ Ondaka e disipulura llele ta cherde sar phendaia lenge o Jesus te cheren.

⁷ Ande e magarcha ta lake minone ta thode upral pe lende pe gertacha ta o Jesus beslo upral.

⁸ But llene sea kote ta inzarena pe gertacha po drom, a aver chinena krangura katar e kasta ta inzarena len po drom.

⁹ Ta o sueto kai llala anglal katar o Jesus ta i o sueto kai llala palal urkina ta phenena: ¡Osana Chavo e Davideko! ¡Blagosime gua kai avel ando anav e Devleko! ¡Osana upre ando miloso!

¹⁰ Kana o Jesus dia ando Jerusalem sa o foro jolailo ta phenena: ¿Ko si gava?

¹¹ A o sueto phenela: Gava si o Jesus, o profeta katar o Nazaret katar e Galilea.

O Jesus chistol e Devleko cher

¹² O Jesus dia andre ando cher e Devleko ta tradia avri sa golen kai chinena ta bichinena ta dia tele moia e stalia golenge kai pharruvena e love e suetoke, ta i e estoliche golenge kai bichinena e gulubura,

¹³ ta phenda lenge: Ando Pisipe phenel gia: Mo cher ka ikhardol cher molimako, a tumen cherden letar iek than kai gurudon e chorane.

¹⁴ Avile pasa o Jesus ando cher e Devleko korre ta i bange ta vou sastarda len.

¹⁵ A e mai preche popura ta i e kovacha e zakonoke jolaile kana dikhle e bare ezgode kai cherela ta sar blagosina le e ternorre ando cher e Devleko ta sar phenena: ¡Osana e Chaveke katar o David!.

¹⁶ Ta phende e Jesuseke: ¿Asune so phenen gala? O Jesus phenda lenge: Ea ¿a tumen nikada ni chitisarden?: Katar o mui e ternorrengo ta katar o mui e minonengo kai pien chuchi, tu thodan o blagosipe.

¹⁷ Ta kana o Jesus mukla len, llelo avri katar o foro ande Betania, ta kote nakhla e riat.

O Jesus del armaia

¹⁸ Thiarinako kana irisailo ando foro, bokhailo.

¹⁹ Ta kana dikhla iek kas simochinengo pasa o drom, avilo pasa le ta dikhla kai ni saia niso po kas samo patrina, ondaka phenda e kasteke: ¡Te na barion nikada pe tute septelie!

²⁰ Kana e disipulura dikhle gaia ezgoda, chudisaile ta phenena: ¿Sar sukilo o kas isto kote?

²¹ Ondaka o Jesus phenda lenge: Chachimaia phenav tumenge kai te avela tumen pachape ta te na avela tumen o mislo kai nasti cherdol, ni ka cheren samo gava katar o kas simochinengo, soke ka phenen gale burdoke: Le tut ta chude tut ande mora ta gia ka avelpe.

²² Ta sa so mangena ando molipe pachamaia, ka len le.

O Jesus ta leki zor

²³ Mapalal katar gala ezgode o Jesus dia ando cher e Devleko. Ta kana vou sikavela e llenen, e mai preche popura ta e phure katar o foro avile pasa le ta puchle le: ¿Save gazdarimaia chere gala ezgode? ¿Ta ko dia tut gava gazdaripe?

²⁴ O Jesus phenda lenge: I me ka puchau tumen iek ezgoda: A te phenena so si, i me ka phenav tumenge ko dia man o gazdaripe te cherav gala ezgode.

²⁵ ¿Ko bichalda e Juane te kristil, o Del, o e manusa? Von thode te janpe maskar pete, ta phenena: Te phendam, katar o del, ka phenel amenge: ¿A soke ni pachaien le?

²⁶ A nasti phena kai bichalde le e manusa, soke si amenge dar katar o foro, soke sa pachan kai o Juan saia iek profeta.

²⁷ Goleke von phende e Jesuseke: Ni llana. Ondaka vou phenda lenge: Ni me ni ka phenav tumenge save gazdarimaia cherav gala ezgode.

E paramichi katar e dui phlal

²⁸ O Jesus puchla len: ¿So mislin tumen katar gaia paramichi? iek manus saia le dui chaurre ta avilo pasa iek ta phenda leke: Chaurrea lla allive te radi ande mo vostano drakhako.

²⁹ Vou phenda: ¡Ni kamam! A mai angle keime llelo.

³⁰ Ta kana avilo o dad kai o gua chaurro phenda leke isto gola alava, a o chaurro phenda leke: Ea, gazda, ka llau. A ni llelo.

³¹ ¿Savo chaurro katar e dui cherda e volia pe dadeki? Von phende: O purvo. O Jesus phenda lenge: Chachimaia phenav tumenge kai e publikanura ta i e kurvichke llan mai anglal tumendar ande charoina e Devleki.

³² Soke avilo tumende o Juan po drom chachimako ta ni pachaien le, a e publikanura ta e kurvichke pachaie le. A tumen i kana dikhlen sa gala ezgode ni keisailen te sai pachan le.

E paramichi katar e bilache esluge

³³ Asunen aver paramichi: saia iek manus kai saia dad katar iek familia kai thoda te barion drakha ande iek vostano, ta phangla o vostano truial ta lacharda iek than te cherel mol ta vazdia iek cher ta mukla gua vostano drakhako kai iek manus te cheren buchi ta llelotar dur.

³⁴ Kana avilo o vreme katar e septelie bichalda pe eslugen te sai lel so perelale katar gola drakha.

³⁵ A e llene kai radina ande gua vostano drakhako lie gole eslugen, iekhe marde, avere mundarde ta avere chalade le e barrenchar.

³⁶ Bichalda pale avere eslugen, mai but neko ogola, ta cherde isto gia sar cherde ogolenchar.

³⁷ Pala sa gala ezgode bichalda pe chaurre, ta phenda: Chachimaia ka den liubao me chaurre.

³⁸ A e llene kai radina ando vostano drakhako kana dikhle leke chaurre, phende maskar pete: Gava si o lleno kai ka achel leke sa e love leke dadeke, aide, mundara le ta la sa leke love.

³⁹ Ta istarde le, chudie le avri katar o vostano drakhako ta mundarde le.

⁴⁰ Kana ka avel o gazda katar gua vostano drakhako, ¿So ka cherel gole eslugenge?

⁴¹ Von phende leke: E bilachen ka zatril bi zalbako, ta po vostano drakhako ka del le kai aver llene kai radin te sai den le ando vreme so perel le.

⁴² Ondaka o Jesus puchla len: ¿Nikada ni chitisarden so phenel o Pisipe? O barr kai ni thode leke sama e llene kai vazden chera cherdilo o barr mai preche. Gava cherda o Del, ta amen chudi amen.

⁴³ Goleke me phenav tumenge kai e charoina e Devleki ka avel ikandi tumendar ta ka avel dini e llenenge kai ka den septelie.

⁴⁴ Ko perela pe gava barr ka achel sa pe kotora, ta o barr te perela pe vareka, ka cherel le prajo.

⁴⁵ Kana asunde leki paramichi e mai preche popura ta e fariseura acharde kai dela orba lendar.

⁴⁶ A kana mangle te phanden le, daraile katar o foro soke o sueto pachala kai o Jesus saia profeta.