Matei 20 - Biblia ande chib Romani

E paramichi katar e llene kai radin ande drak

¹ E charoina e milosoki si sargo iek gazda kai saia le iek baro vostano drakhako kai llelo thiarinako rano te rodel llenen te radin leke.

² Ta achilo pe orba lenchar te pochinel lenge iek denario ando llive, ta bichalda len te radin ande leko vostano drakhengo.

³ Pale llelo ande inia thiarinako ta dikhla avere llenen kai sea po maskar katar o foro bi radoko.

⁴ Ta phenda lenge: Llan i tumen te radin mange ande murne drakha ta ka pochinav tumenge so avela orta. Ta von llele.

⁵ Pale o gazda llelo ande desudui e lliveseke ta pale ande trin e lliveseke ta cherda isto goia ezgoda.

⁶ Kana saia ande panch e lliveseke irisailo pale ando foro kote kai chidiniaon e llene ta malada kote avere llenen kai ni saia len rado, ta pucha len ¿Soke sen tumen kate sorro llive bi radoko?

⁷ Von phende leke: Soke niko ni dia amen rado. Ondaka o gazda phenda lenge: Llan i tumen te radin ande mo vostano drakhako.

⁸ Kana peli e riat, o gazda phenda gole lleneke kai thovela e llenen te radin: Ikhar e llenen kai radin ta pochin lenge, mai anglal golenge kai avile mai pasa e riat ta mapalal llik golenge kai avile mai rano.

⁹ Ondaka avile gola kai diea te radin ande panch e lliveseke, ta suako lleno lia e love katar iek llive radoko.

¹⁰ A kana avile gola kai diea te radin mai rano von mislisaile kai lenge ka pochidol mai but, a suako lleno lia e love katar iek llive radoko.

¹¹ Kana lie pe love jolaile e gazdaia.

¹² Ta phenena: Gala kai avile pasa e riat radisarde samo iek saiato, a tumen pochinden lenge sargo amenge kai terpisardam o rado ta o kham sorro llive.

¹³ A o gazda phenda iekheke: Amala, me ni cherav chuke ni iek bilachipe. ¿Ni achilam pe orba te pochinav chuke iek llive radoko?

¹⁴ Goleke le che love ta llatar, me te mangava te dav gale llene kai dia te radil mai pasa e riat isto e love kai diem tut

¹⁵ ¿inai mi volia te cherav so me mangava me lovenchar? ¿O si chuke joli kai sem lacho?

¹⁶ Goleke e llene kai akana si mai palal ka aven mai anglal, a gola llene kai akana si e mai anglal ka aven mai palal.

Pale aver drom phenel o Jesus katar po meripe

¹⁷ Kana o Jesus llala po drom kai inllarel ando Jerusalem, lia pe desuduie disipulonen pe iek rig ta phenda lenge:

¹⁸ Gia sar tumen dikhen, akana lla ando Jerusalem, kote kai o Chavo e Manuseko ka avel dino kai e gazda e poponenge ta kai e kovacha e zakonoke, ta ka chinaven leke o meripe,

¹⁹ ta ka den le ande va katar gola kai inai judiura te sai maren espurnia letar, ta te maren le e bichoia ta te kafron le po krusto ta pala e trin llive ka ustel katar o meripe.

So mangla e dei katar o Juan ta katar o Pedro

²⁰ Ondaka avili pasa o Jesus e dei katar e chave e Zebedeoke pe chavenchar, dia changa angla le ta mangela vareso letar.

²¹ Vou phenda lake: ¿So mange? Voi phenda leke: Phen te besen me chaurre ande chi charoina iek pe chi rig e chachi a o gua pe cho estingo.

²² Ondaka o Jesus phenda: Tumen ni llanen so mangen ¿Sai pien katar o cherkipe kai si te piau me, ta te kristin tumen e kristomaia kai me sem kristime? Von phende leke: Sai.

²³ Vou phenda lenge: Tumen ka pien gava cherkipe, ta ka len o kristope kai me sem kristime, a te besen pe mi chachi ta pe mo estingo inai ande mo va te dav le, samo golenge kai mo Dad lacharda lenge.

²⁴ Kana ogola des disipulura asunde goia orba jolaile e duie phlalenchar.

²⁵ Ondaka o Jesus ikharda len, ta phenda: Tumen llanen kai maskar e llene kai ni pachan ando Del e gazda gazdarin silnomaia pe llene kai zivin ande gola phuvia ta e bare cheren sogo mangen lenchar.

²⁶ A maskar tumende nasti avelpe gia. A ko mangela maskar tumende te cherdol baro, morabi te avel tumaro esluga,

²⁷ a kogo mangela te avel mai anglal maskar tumende morabi te avel tumaro esluga,

²⁸ sargo o Chavo e Manuseko kai ni avile esluge te radin leke, vou avilo te radil lenge ta te del po zivoto, ta pe zivotoia te pochinel amen.

O Jesus sastarel duie korren

²⁹ Kana von likiste katar o Jeriko, llala pala le iek baro sueto.

³⁰ A dui korre kai besena pasa o drom, kana asunde kai o Jesus nakhela urkisarde, ta phenena: ¡Gazda, te avel chuke zalba amendar Chavo e Davideko!

³¹ A e llene dena pe lende te sai achen, a von ios urkina ta phenena: ¡Gazda, Chavo Davideko te avel chuke zao amendar!

³² Ondaka o Jesus achilo, ikharda len ta phenda lenge: ¿So mangen te cherav tumenge?

³³ Von phende leke: Gazda cher amare akha te dikhen.

³⁴ Ondaka o Jesus sar avila leke zalba lendar, dodisarda lenge akha, ta isto kote e korre dikhle ta llele pala le.