Matei 2 - Biblia ande chib Romani

E bizai manus aven te dikhen e Jesuse

¹ O Jesus biandilo ando Belen katar e Judea, ande llivesa kana o Erodes gazdarila goia phuv. Ondaka avile katar o oriente ando Jerusalem nesave bizai manus, von sikona katar e cheraia.

² Ta puchena: ¿Kai talo o charo e judionengo kai biandilo? soke amen dikhlam leki cherain ando oriente, ta avilam te blagosi le.

³ Kana o charo o Erodes asunda gaia orba, jolailo vou ta i sa o foro.

⁴ Ondaka o Erodes chidia sa e mai bare poponen, ta kote sea ikharde i e kovache e zakonoke ta puchla len kai saia te biandol o Kristo.

⁵ Von phende leke: Ando Belen katar e Judea, soke o profeta pisisarda gia:

⁶ A tu Belen katar e phuv katar e Judea, ni san o mai minono katar e Judeaki charoina, soke tutar ka likel gua kai ka sikavel o drom ta ka arakhel me foro o Israel.

⁷ Ondaka o Erodes ikharda po chorial e bizaien ta llangla o vreme chachuno kana sikadili e cherain.

⁸ Ondaka bichalda len ando Belen, ta phenda lenge: Llan incha ta puchen bizaimaia katar o minono. Ta kana ka malaven le, phenenle mange te sai llau i me te blagosiv le.

⁹ Kana von asunde e charo lleletar, a e cherain kai dikhlea ando oriente llala angla lende lligo ni achili kote upral kai saia o minono.

¹⁰ Ta kana e bizai manus dikhle e cherain, veselisaile but.

¹¹ Kana die ando cher dikhle e minone leke daia e Mariaia, ta thodepe changenchar ta blagosisarde le. Ondaka putarde pe baulia minone ta die le sunakai, taimano, ta i mirra.

¹² A o Del sikada lenge ande sune te na irinpe kai o Erodes, goleke von irisaile ande pi phuv katar aver drom.

Kana nasle ando Ejipto

¹³ Kana e bizai manus lleletar, iek suecho e Devleko sikadilo e Joseeke ande sune, ta phenda leke: Uste, le e minone ta i leke da, ta nas ando Ejipto ta achi incha llik kana me ka phenav chuke, soke o Erodes ka rodel e minone te mundarel le.

¹⁴ Ondaka kana o Jose llungadilo, lia e minone ta i leke da, ta llelotar orachaia po drom kai llal ando Ejipto.

¹⁵ Ta achilo kote llik kana mulo o Erodes, te sai cherdol so phendaia o Del katar o profeta kana phenda: Katar o Ejipto ikhardem me chaurre.

O Erodes bichalel te mundaren e minonen

¹⁶ Ondaka kana o Erodes acharda kai e bizai manus kojade le, lia le iek bari joli ta bichalda te mundaren sa e minonen duie bursenge ta i e mai minonen kai sea ando Belen ta i truial letar, prema o vreme kai phendea leke e bizai manus.

¹⁷ Gia cherdilo so phendaia o profeta o Jeremias, kana phenda:

¹⁸ Asundilo iek avazi ande Rama, baro roipe ta kukipe. E Rakel saia kai rovela cheres pe chaurre ta ni kamela te den la zor, soke lake chaurre mulea.

Kana irisaile katar o Ejipto

¹⁹ A kana mulo o Erodes, iek suecho e Devleko sikadilo e Joseeke ande sune ando Ejipto, ta phenda leke:

²⁰ Uste, le e minone ta i leke da, ta irisao ando Israel, soke mule gola kai rodena te mundaren e minone.

²¹ Ondaka o Jose ustilo, lia e minone ta leke da, ta llelotar ando Israel.

²² A kana asunda kai o Arkelao gazdarila po than pe dadeko e Erodeseko, o Jose darailo te llal incha soke o Del sikadaia leke ande sune so te cherel, goleke llelotar ande Galilea,

²³ ta beslo ando foro kai ikhardol Nazaret, te sai cherdol so saia phendo katar e poraukura, kai saia te ikharen le nazareno.