Matei 19 - Biblia ande chib Romani

O Jesus sikavel katar gola kai mukenpe

¹ Kana o Jesus dia gala orbe llelotar katar e Galilea ta avilo ande phuv katar e Judea kai si pe o goia rig katar o Jordan.

² Llelo pala le baro sueto, ta sastarda len isto kote.

³ Ondaka nesave fariseura avile pasa o Jesus ta te zumaven le puchle le: ¿Sai o manus mukelpe katar pi rromi pala varesavi ezgoda?

⁴ O Jesus phenda: ¿Ni chitisarden kai mai anglal kana o Del cherda e manusen, cherda len murus ta diskinia?

⁵ Ta phenda: Goleke o murus ka mukel pe dade ta pe da te avel pe rromiaia, ta e dui ka aven sargo iek manus

⁶ Goleke von inai dui, akana von si iek, Goleke o manus morabi te na fulavel so o Del thoda ande iek than.

⁷ Ondaka e fariseura phende leke: ¿A soke o Moises mukla amenge e alava kai o murus sai tradel pe rromia te dela la iek lil kai mukelpe latar?

⁸ O Jesus phenda lenge: Isto soke tumaro lio si zuralo, o Moises mukla te muken tumare rromien, a mai anglal ni saia gia.

⁹ A me phenav tumenge kai gua kai mukelpe katar pi rromi, te na avelape kai voi lleli avere rromea, i vou cherel kurvaluko te zinilape averiaia.

¹⁰ Leke disipulura phende leke: Te si gia gala ezgode maskar e zinime, avela mai sukar e muruseke te na zinilpe.

¹¹ Ondaka o Jesus phenda lenge: Nesave llene ni acharen gala ezgode, samo gola kai si lenge dino sai acharen len.

¹² Pala but ezgode nesave manusa nasti zininpe, nesave biandon eunukura, averen cheren len eunukura a aver pala e charoina e Devleki ni zininpe. Ko sai acharel gaia ezgoda te acharel la.

O Jesus blagosil e minonen

¹³ Ondaka ande kai o Jesus nesave minonen te thovel pe va pe lende ta te molilpe, a e disipulura die pe llene kai anena e minonen.

¹⁴ Ondaka o Jesus phenda: Muken e minonen te aven mande ta na achaven len, soke lengi si e charoina e milosoki.

¹⁵ Ta kana thoda pe va pe lende, llelotar kotar.

O terno barvalo

¹⁶ Ondaka avilo pasa o Jesus iek manus ta puchla le: Kovachi lachea, ¿Savi ezgoda lachi morabi te cherav te avel man o zivoto ostade?

¹⁷ O Jesus phenda leke: ¿Soke ikhare man lacho? Niko inai lacho samo iek: O Del. A te mangea te de ando zivoto, guruv e zakonura.

¹⁸ O terno puchla le: ¿Save zakonura? O Jesus phenda leke: Na mundar, na cher kurvaluko, na chor, na ikan bune,

¹⁹ de liubao che dade ta che da, ta volisar avere sar voli tu tut.

²⁰ O terno phenda leke: Sa gola ezgode ia cherdemlen sar kana sema ternorro. ¿So ios trubul man te cherav?

²¹ O Jesus phenda leke: Te mangea te ave chachimaia orta, lla bichin so si tut ta dele e chorrenge. Gia ka avel tut barvalipe ando miloso. Ondaka aide ta lla pala ma.

²² Kana o terno asunda gaia orba, llelotar zalbaia, soke saia but barvalo.

²³ Ondaka o Jesus phenda pe disipulonenge: Chachimaia phenav tumenge kai si but trudno iekhe barvaleke te del ande charoina e milosoki.

²⁴ Pale o duito phenav tumenge kai mai lesno si iekhe devake te nakhel katar e iak iekhe suviaki, neko te del iek barvalo ande charoina e Devleki.

²⁵ Kana e disipulura asunde gaia orba chudisaile ios mai but, ta phenena: A te si gia, ¿ko ka avel braduime?

²⁶ O Jesus dikhla pe lende ta phenda lenge: E manusa nasti cheren gava, a o Del sa sai cherel.

²⁷ Ondaka o Pedro phenda leke: Amen muklam sa so saia amen, ta llelam pala tu. ¿So ka avel amen?

²⁸ O Jesus phenda lenge: Chachimaia phenav tumenge, kai kana ka avel o vreme kana sa ka avel nevipe, kana o Chavo e Manuseko ka besel po trono barimako, tumen kai llelen pala ma, ka besen pe desudui tronura barimake te chinen e kris pe desudui viche katar o Israel.

²⁹ Ta sa gola kai pala ma mukle cher, phlalen, phiorren, dade o dea, o chaurren o phuvia, ka len stotina droma mai but, ta i ka len o zivoto ostade.

³⁰ A but llene kai akana si mai anglal, ka aven e mai palal, a but llene kai akana si mai palal, ka aven e mai anglal.