Matei 18 - Biblia ande chib Romani

¿Ko si o mai baro ande charoina e milosoki?

¹ Isto ande gua vreme e disipulura avile pasa o Jesus ta puchle le: ¿Ko si o mai baro ande charoina e milosoki?

² Ondaka o Jesus ikharda iekhe minone ta thoda le po maskaral lendar

³ ta phenda: Chachimaia phenav tumenge, kai te na pharrudola tumaro zivoto ta te na cherdona sargo minone, ni ka den ande charoina e milosoki.

⁴ Soke e mai bare ande charoina e milosoki si gola llene kai cherdon sargo gava minono kai si prosto.

⁵ A vareko te lela ande mo anav iekhe minone sargo gale, man lel.

E dar te pere ando bilachipe

⁶ A vareko te cherela te perel ando bilachipe iek katar gala minone kai pachan ande ma, mai sukar avela leke te chuden le chak telal katar e mora phanglo e korratar pe iek baro barr.

⁷ Tesko e suetoke pala e but ezgode kai inllaren e llenen te peren a gala ezgode morabi te aven, ¡a tesko goleke kai anel gala ezgode ta cherel averen te peren ando bilachipe!

⁸ Goleke cho va o cho porrno te cheren tut te pere ando bilachipe, chinlen ta chudelen tutar: Mai lache si te de ando zivoto chinde porrneko o chinde vasteko, neko te ave e duie vastenchar ta e duie porrnenchar ta te ave chudino ande iag ostade.

⁹ A chi iak te cherel tut te pere ando bilachipe, ikanla ta chudela dur tutar, soke mai lache si te de iekhe akhaia ando zivoto, neko che duie akhenchar te ave chudino ande iag ostade.

E paramichi katar o bakro jasardo

¹⁰ Dikhen te na den e zea gale minonen kai pachan ande ma, soke me phenav tumenge kai ando miloso lenge suechura suako llive dikhen o mui me Dadeko kai si ando miloso,

¹¹ soke o Chavo e Manuseko avilo te braduil so jasailoa.

¹² ¿A so phenen tumen? Iek manus te avela le stotina bakre ta te jasaol leke iek lendar ¿ni mukel e iniavardes ta inia ta llal pe burdura te rodel gole bakre kai jasailo?

¹³ Ta te malavela le, ka veselilpe mai but katar gua bakro neko katar e iniavardes ta inia bakre kai ni jasaile.

¹⁴ Isto gia si e volia tumare Dadeki kai si ando miloso kai ni kamel te jasaol ni iek katar gala minone.

Sar morabi te prosti

¹⁵ Goleke, cho phlal te cherela chuke varesavo bilachipe, lla tu lete ta cher le te llanel kai cherda o bilachipe, a te asunda tut, dobisardan che phlale.

¹⁶ A te na asunda tut, le tuia iekhe o duie llenen te asunen e orba.

¹⁷ A te na asunela gale llenen, phen le e khanllirake, a te na asunela e khanllira, dikhle sargo iek lleno kai ni pachal ando Del o sargo iek publikano.

¹⁸ Chachimaia phenav tumenge kai sa so phandena pe phuv ka avel phanglo ando miloso, ta sa so putarena pe phuv ka avel putardo ando miloso.

¹⁹ Pale phenav tumenge kai dui llene tumendar te thovenape ande iek mislo te mangen varesavi ezgoda ando molipe kate pe phuv, mo Dad kai si ando miloso ka del la tumenge,

²⁰ soke kote kai si dui o trin llene chidine ande mo anav, kote sem me maskar lende.

²¹ Ondaka avilo pasa le o Pedro ta phenda leke: Gazda, ¿Pe gachin droma morabi te prostiv me phlale kai cherda mange varesavo bilachipe? ¿Llik kai efta droma?

²² O Jesus phenda leke: Ni phenav chuke llik kai efta, so phenav chuke si llik kai eftavardes droma efta.

E paramichi katar o esluga kai ni kamela te prostil

²³ Soke e charoina e milosoki si sargo iek charo kai mangla te lachardol pe eslugenchar te sai llanel pe gachin faidava achela le.

²⁴ Kana thodape pe gaia buchi, ande lete iekhe esluga kai saia leke unllile des milie talentura.

²⁵ Gava esluga sar ni saia le love te pochinel, o charo phenda te bichinen gole llene ta i leke rromia ta i leke chaurre ta sa so saia le, te sai pochinel sa so saia unllile.

²⁶ Ondaka gua esluga, thodo changenchar molilape leke gia: Te avel chuke zalba mandar ta ka pochinav chuke sa.

²⁷ Ondaka o gazda katar gua esluga avila leke zao, ta prostisarda leke sa so saia leke unllile.

²⁸ A kana likisto gua esluga, maladilo avere eslugaia kai saia leke unllile stotina denariura, ta istarda le ta phenda leke gia: ¡Pochin mange so san mange unllile.!

²⁹ Ondaka o gua esluga dia changa angla le ta phenda leke gia: Te avel chuke zalba mandar ta ka pochinav chuke sa.

³⁰ A vou ni kamla, ta phangla le ande rubie te achel kote lligo ni ka pochinel sa so saia leke unllile.

³¹ Kana ogola sluge dikhle so cherela, tristosaile but, ta llele ta phende sa pe gazdake.

³² Ondaka o charo ikharda gole esluga ta phenda leke: ¡Esluga bilacho! ¿Ni prostisardem tut sa so sana mange unllile kana molisailan mange?

³³ ¿Ni saia te avel i chuke zao katar o gua esluga gia sar avila mange zao tutar?

³⁴ Ondaka o charo jolailo pe gachin kai phenda te phanden le ande rubie lligo ni ka pochinel sa so saia leke unllile.

³⁵ Isto gia mo Dad kai si ando miloso ka cherel tumenchar te na prostina e phlal iek avere sa tumare liea o bilachipe kai cheren.