Matei 17 - Biblia ande chib Romani

O Jesus cherdol sargo aver

¹ Nakhle sou llive kotar ta o Jesus inllarda e Pedro, e Santiago ta e Juane phlal e Santiagoko upre pe iek burdo but baro.

² Kote angla lende cherdilo sargo aver, ta leko mui klichisarda sargo o kham, ta leke patave cherdile parrne sargo o villelo.

³ Ta sikadile lenge o Moises ta e Eliase kai dena orba e Jesusea.

⁴ Ondaka o Pedro phenda e Jesuseke: Gazda, ¡Gia sukar kai sam kate! Te mangea, ka cherav kate trin cherorra e patrenchar: Iek chuke, aver e Moiseseke ta aver e Eliaseke.

⁵ Kana o Pedro dela orba, iek oblako villeloko ucharda len ta asundilo iek avazi katar o oblako, kai phenela: Gava si mo Chaurro kai voliv le ta kai esvirisardem, le asunen.

⁶ Kana von asunde gaia orba, e disipulura thodepe tele moia pe phuv ta saia lenge bari dar.

⁷ Ondaka o Jesus avilo pasa lende ta dodisarda len, ta phenda lenge: Usten ta na daran.

⁸ Kana ustile ni dikhle nika, samo e Jesuse.

⁹ Kana fuliena katar o burdo, o Jesus phenda lenge: Na phenen nikake so dikhlen lligo ni o Chavo e Manuseko ka ustel katar o meripe.

¹⁰ Ondaka e disipulura puchle e Jesuse: ¿Soke e kovacha e zakonoke phenen kai mai anglal si te avel o Elias?

¹¹ O Jesus phenda lenge: Gua si o chachipe, o Elias avel mai anglal ta ka lacharel sa e ezgode.

¹² A me phenav tumenge kai o Elias ia avilo, ta von ni pinllarde le, ta cherde lea sogo mangle, isto gia o Chavo e Manuseko ka nakhel patnia pala lende.

¹³ Ondaka e disipulura llangle kai o Jesus dela lenge orba katar o Juan kai kristila.

O Jesus sastarel iekhe chaurre bengalo

¹⁴ Kana avile kote kai saia o sueto, avilo iek lleno pasa o Jesus ta dia changa angla le, ta phenda leke:

¹⁵ Gazda, te avel chuke zao me chaurretar soke perel bengendar ta nakhel bari patnia ta but droma perel pe iag ta but droma ando pai.

¹⁶ Andem le kai che disipulura, a von nasti sastarde le.

¹⁷ O Jesus phenda lenge: ¡Ioi manusalen kai inai tumen pachape ta sen bilache! ¿Pe gachin ios morabi te avav tumenchar? ¿Pe gachin ios morabi te terpiu tumen? Anen mange kate e chaurre.

¹⁸ Ondaka o Jesus dia po llavolo, ta o llavolo likisto katar o chaurro, ta kotar angle achilo sasto ande goia doba.

¹⁹ Ondaka e disipulura avile pasa o Jesus ta puchle le po chorial: ¿Soke amen nasti tradiam gole llavolo?

²⁰ O Jesus phenda lenge: Soke si tumen cherricha pachape. Chachimaia phenav tumenge kai te avela tumaro pachape sargo iek simicha mostasaki ka phenen gale burdoke: Le tut kotar ta thov tut pe aver rig ta gua burdo ka cherel le, ta tumen ka cheren suako ezgoda.

²¹ A gaia buchi nasti cherdol te na avela molipe ta alluno.

Pale o duito phenel o Jesus kai ka merel

²² Kana von sea ande Galilea, o Jesus phenda lenge: O Chavo e Manuseko si te avel dino ande va e manusenge,

²³ ta ka mundaren le, a ando trito llive ka ustel katar o meripe. A von tristosaile but.

E love kai si dine ando cher e Devleko

²⁴ Kana o Jesus ta leke disipulura avile ando foro katar o Kafarnaum, avile pasa o Pedro e llene kai chidena e dui drakme kai denpe ando cher e Devleko ta puchle le: ¿Tumaro kovachi ni pochinel e dui drakme?

²⁵ O Pedro phenda: Ea vou pochinel. Kana o Pedro dia ando cher, o Jesus mai anglal dia orba lea ta phenda leke: ¿A tu Simon so misli? E charura, ¿katar len e love, katar gola kai si katar leki phuv o katar gola kai inai katar leki phuv?

²⁶ O Pedro phenda leke: Katar gola kai inai katar leki phuv. O Jesus phenda leke: Goleke gola kai si katar leko foro ni pochinen.

²⁷ A te na joliaon, lla ande mora, chude e mreza ta le o purvo macho kai ka ikane, putar leko mui ta ka malave iek tolari. Le le ta de le pala ma ta i pala tu.