Matei 16 - Biblia ande chib Romani

E bari ezgoda Devlikani katar o profeta Jonas

¹ Avile kai o Jesus e fariseura ta i e saduseura te zumaven le, ta mangle letar te cherel iek bari ezgoda Devlikani ta gia te sikavel kai vou avela bichaldo e Devletar.

² A o Jesus phenda lenge: Kana perel e riat, tumen phenen: Thiara ka cherel iek sukar llive, soke o miloso si lolo,

³ ta thiarinako rano tumen phenen: Allive ka del peke, soke o miloso si lolo ta si oblakura. Kojamnalen, soke tumen llanen prema o miloso sar ka avel o llive a ni llanen te acharen e bare ezgode Devlikane kai nakhen ande gava vreme.

⁴ E llene bilache ta kurvaria mangen te dikhen iek bari ezgoda Devlikani, a so ka delpe lenge te dikhen si so avilape e Jonasea. Ta o Jesus mukla len ta llelotar.

E levadura katar e fariseura

⁵ E disipulura avile pe o goia rig katar e mora katar e Galilea, ta bristraile te inllaren marrno.

⁶ Ondaka o Jesus phenda lenge: Arakhen tumen katar e levadura e fariseonengi ta i katar e saduseura.

⁷ A e disipulura thode te janpe maskar pete, ta phenena: ¡O Jesus phenel gua soke amen ni andam marrno!

⁸ O Jesus acharda ta phenda lenge: ¿Soke phenen kai inai tumen marrno, gia cherricha pachape si tumen?

⁹ ¿Llik akana ni acharen? ¿ni den tumen golli katar e panch marrne maskar e panch milie llene, ta pe gachin kotariche chidien?

¹⁰ ¿Ta katar e efta marrne kai fuladen maskar e star milie llene, ta pe gachin kotariche chidien?

¹¹ ¿Sar ni acharen kai me ni diem tumenge orba katar o marrno kana phendem te arakhen tumen katar e levadura e fariseonengi ta i e saduseonengi?

¹² Ondaka acharde kai ni phendaia lenge te arakhenpe katar e levadura e marneki, ta acharde kai phenela lenge te arakhenpe katar so sikavena e fariseura ta i e saduseura.

O Pedro phenel kai o Jesus si o Kristo

¹³ Kana o Jesus avilo ande phuv katar e Sesarea katar o Filipo, puchla pe disipulonen ta phenda lenge: ¿Ko phenen e llene kai si o Chavo e Manuseko?

¹⁴ Von phende leke: Nesave llene phenen kai tu san o Juan kai kristil, aver llene phenen kai san o Elias, ta i aver phenen kai san o Jeremias o varesavo aver profeta.

¹⁵ Ondaka o Jesus puchla len: A tumen, ¿Ko phenen kai sem me?

¹⁶ O Simon Pedro phenda leke: Tu san o Mesias, o Chavo katar o Del o llundo.

¹⁷ Ondaka o Jesus phenda leke: Blagosime san Simon, chavo e Jonaseko soke goia orba ni sikadala chuke ni iek manus, samo mo Dad kai si ando miloso.

¹⁸ Ta me phenav chuke kai tu san o Pedro, ta pe gava barr ka cherav mi khanlliri, ta e udara katar o meripe ni ka dobin la.

¹⁹ Ta tut ka dav e kluchura katar e charoina e milosoki: Sa so phandea pe phuv, ka avel phanglo ando miloso, ta sa so putarea pe phuv, ka avel putardo ando miloso.

²⁰ Ondaka o Jesus phenda pe disipulonenge te na phenen nikake kai vou saia o Mesias.

O Jesus phenel kai ka merel

²¹ Kotar angle o Jesus thoda te phenel pe disipulonenge kai trubula te llal ando Jerusalem ta te jal bari patnia ande va e phurege, ta i katar e gazda e poponenge ta i katar e kovacha e zakonoke, ta te merel, ta te ustel katar o meripe pala e trin llive.

²² Ondaka o Pedro inllarda e Jesuse pe iek rig ta thoda te del pe lete ta phenela leke gia: Gazda, te avel chuke zao tu tutar, ¡Te na avelpe gava nikada chuke!

²³ A o Jesus boldinailo ta phenda e Pedroke: ¡Le tut mandar, Satanas soke tu mange te chere man te perav! Tu ni dikhe e ezgode sargo o Del, tu dikhe len sargo manus.

²⁴ Ondaka o Jesus phenda pe disipulonenge: Te avela vareko pala ma, morabi te bristraol vou petar, te lel po krusto ta te llal pala ma,

²⁵ soke kogo mangela te braduil po zivoto, ka jasarel le, ta kogo jasarela po zivoto pala ma, ka malavel le.

²⁶ ¿So blazil e manuseke te dobil sogo si po sueto, ta te jasarel po zivoto? ¿O pe gachin sai pochinel o manus pala po zivoto?

²⁷ Soke o Chavo e Manuseko ka avel ande pe Dadeko baripe ta pe suechonenchar, ondaka ka pochinel suakone lleneke prema so cherda pe gaia phuv.

²⁸ Chachimaia phenav tumenge kai nesave llene kai si kate ni ka meren lligo ni ka dikhen sar avel o Chavo e Manuseko ande pi charoina.