Matei 15 - Biblia ande chib Romani

So meliarel e manuse

¹ Ondaka avile pasa o Jesus nesave fariseura ta i kovacha e zakonoke kai avilea katar o Jerusalem te puchen le:

² ¿Soke che disipulura phagen so sikade amen e purane? ¿Soke von ni jalaven pe e va mai anglal te jan marrno?

³ O Jesus phenda lenge: ¿A soke i tumen phagen o alav e Devleko pala tumare zakonura?

⁴ Soke o Del phenda De liubao che dade ta i che da, a ko dela armaia pe dade o pe da trubul te merel.

⁵ A tumen phenen kai iek manus sai phenel pe dadeke o pe dake: Nasti pomoziu tut, soke sa so si man phendem kai ka daule e Devleke.

⁶ Ta vareko te phenela gala alava, inai soke te del liubao pe dade o pe da. Gia i tumen phagen o alav e Devleko pala tumare zakonura.

⁷ Manusa kojamne sen, sukar dia orba o profeta o Isaias kana phenda tumendar gia:

⁸ Gava foro del man liubao pe alavenchar, a lengo lio si dur mandar.

⁹ Samo gia den man liubao, soke so tumen sikaven si zakonura manusenge.

¹⁰ Ondaka o Jesus ikharda e llenen ta phenda lenge: Asunen ta acharen:

¹¹ E manuse ni meliarel so del ande leko mui, so meliarel le si so likel katar leko mui.

¹² Ondaka avile pasa le leke disipulura ta phende leke: ¿Llane tu kai e fariseura jolaile kana asunde gala alava?

¹³ O Jesus phenda lenge: Suako zeledina kai mo dad ni thoda pe phuv te bariol ka avel ikandi zilenchar.

¹⁴ Muken len, von si korre ta inllaren averen korren. A iek korro te inllarel avere korre e dui ka peren ande varesavi jar.

¹⁵ O Pedro phenda leke: Phen amenge so phenel gaia paramichi.

¹⁶ O Jesus phenda lenge: ¿Ni tumen ni acharen?

¹⁷ ¿Ni acharen kai sa so del ando mui llal ando lli ta pale likel katar e esnaga?

¹⁸ A so likel katar o mui likel andral katar o lio, gua si so meliarel e manuse.

¹⁹ Soke katar o lio liken e bilache mislura, o mundaripe, o kurvaluko, o choripe, o kojaipe, ta i kana kusen e Devle.

²⁰ Gala si e ezgode kai meliaren e manuse, a te jaia bi te jalavea che va gia sar phenel o zakono katar o jaladipe gua ni meliarel e manuse.

O baro pachape katar e kananaki diskinia

²¹ Kana o Jesus likisto kotar, llelotar ande phuv katar o Tiro ta katar o Sidon.

²² Ondaka iek diskinia katar o Kanaan kai likistia katar goia phuv, thoda te urkil ta phenela leke: ¡Gazda, Chavo e Davideko, te avel chuke zalba mandar! ¡Iek llavolo cherel me chorra te nakhel bari patnia!

²³ A o Jesus ni phenda lake ni iek alav. Ondaka, avile pasa le leke disipulura ta mangle letar ta phende: Tradela, soke avel pala amende ta urkil.

²⁴ O Jesus phenda lenge: Me sem bichaldo samo pala e bakre jasarde katar e Israeleko foro.

²⁵ Ondaka voi avili thodape changenchar angla le, ta phenda leke: ¡Gazda pomozisar man!

²⁶ O Jesus phenda: Inai sukar te lelpe o marrno katar e chaurre ta te chudelpe e llukelorrenge.

²⁷ Voi phenda leke: Ea, Gazda, a llik e llukelorra jan katar e kotora kai peren katar o stali lenge gazdengo.

²⁸ Ondaka o Jesus phenda lake: ¡Diskinia, baro si cho pachape! Te cherdol chuke sar tu mange. Ta laki chorri sastili ande goia doba.

O Jesus sastarel but nasualen

²⁹ Nakhlo o Jesus kotar ta llelotar pasa e mora katar e Galilea, likisto po burdo ta kote beslo.

³⁰ Ta avilo but sueto pasa le. Ta anena pea bangen, korren, nemaven, chinde porrnenge, ta but ios nasualen. Thode len kai e porrne e Jesuseke, ta vou sastardalen,

³¹ goleke sa o sueto chudilape kana dikhela kai e manusa kai nasti dena orba, dena orba, kai e llene kai sea chinde lenge porrne sastona, e bange phirena, a e korre dikhena ta blagosina e Israeleke Devle.

O Jesus pravarel star milie llenen

³² O Jesus ikharda pe disipulonen, ta phenda lenge: Si mange zao katar gala llene, soke cherel trin llive kai si manchar ta inai len so te jan. Ta ni kamam te bichalav len bokhale kai pe chera, sai baldinpe e dromea.

³³ Ondaka leke disipulura phende leke: ¿Katar ka ikana amen pe gachin marrne kate po pusto te da te jal gachine llenen?

³⁴ O Jesus puchla len: ¿Pe gachin marrne si tumen? Von phende: Efta ta nesave machorre.

³⁵ Ondaka o Jesus phenda e llenenge te besen pe phuv,

³⁶ lia ande pe va e efta marrne ta i e mache, dia fala e Devle, phagla len ta dia pe disipulonen, a e disipulura die e sueto.

³⁷ Saurre jale ta chalile, ta katar e kotora kai achile, pherde efta kotariche.

³⁸ Gola kai jale sea preko star milie murusa bi te llindol e diskinien ta ni e minonen.

³⁹ Ondaka kana phenda e suetoke te llaltar, likisto ande llimia ta llelo ande phuv katar e Magdala.