Matei 13 - Biblia ande chib Romani

E paramichi katar o simichari

¹ Isto gua llive o Jesus likisto katar gua cher ta beslo pasa e mora.

² Ta sar avilo pasa le but sueto likisto ande llimia ta beslo, a sa o sueto saia pe chisai.

³ Ondaka o Jesus dia lenge but orbe ande paramiche ta phenela: Iek simichari llelo te thovel e simiche ande phuv.

⁴ Ta kana thovela e simiche, nesave peletar pasa o drom, avile e chiriklia ta jale e simiche.

⁵ Aver simiche peletar maskar e barra, kote kai ni saia but chik, goleke goia simicha barili oma,

⁶ a kana o kham likisto, phabarda la ta sukili, soke ni saia la zile.

⁷ Aver simiche peletar maskar e karrne, ta kana e karrne barile tasade la.

⁸ A nesave peletar pe lachi phuv ta barili ta dia septelie, nesave die stotina, aver sovardes, aver tranda katar iek.

⁹ Ko si le kan te asunel.

Pala so si e paramiche

¹⁰ Ondaka e disipulura avile pasa o Jesus ta puchle le: ¿Soke de orba lenchar ande paramiche?

¹¹ O Jesus phenda lenge: O Del sikavel tumenge so si gurudino katar e charoina e milosoki a lenge inai chinado.

¹² Goleke, gole kai si le, ka avel leke dino mai but, ta ka avel le but a gole kai inai le, i so si le ka avel letar ikando.

¹³ Goleke lenchar dav orba ande paramiche, soke dikhen a ni dikhen, asunen a ni ka asunen ta ni acharen.

¹⁴ Goleke lenge cherdili e poroka katar o Isaias kana phenda: E kanenchar ka asunen, ta e akhenchar ka dikhen a niso ni ka acharen.

¹⁵ Soke o lio gale foroko cherdilo zuralo, ta pe kanenchar asunen phare, ta phangle pe akha te na dikhen, ta phangle pe kan te na asunen cherde le te na acharen te na irinpe mande te sastarav len.

¹⁶ Blagosime tumare akha soke dikhen, ta tumare kan soke asunen.

¹⁷ Chachimaia phenav tumenge, kai but poraukura ta i chache manusa mangle te dikhen so tumen dikhen ta ni dikhle, ta te asunen so tumen asunen ta ni asunde.

O Jesus phenel so si e paramichi katar o simichari

¹⁸ Asunen akana so mangel te phenel e paramichi katar o simichari:

¹⁹ Kana vareko asunel e orba katar e charoina ta ni acharel la, avel o bilacho ta lel so saia thodo ande leko lio, gaia si e simicha kai pelitar pasa o drom.

²⁰ E simicha kai peli maskar e barra si sargo gola llene kai: Asunen e lachi viasta ta len la veselimaia,

²¹ a sar inai len zile, oma muken o drom e Devleko ta kana avel e patnia ta kana mangen te maren len cheres e orba e Devleki, oma peren.

²² A e simicha kai peli maskar e karrne si sargo gola llene kai asunen e Devleki orba, a e briga te cheren love ande gava sueto, ta o volipe kai si len po barvalipe kojaven len ta sa gala ezgode tasaven e orba e Devleki, ta ni muken len te den septelie ande lende.

²³ A e simicha kai peli pe lachi phuv, si sargo gola llene kai asunen e orba e Devleki ta acharen la ta den septelie, ta den stotina, sovardes, ta tranda pe iek.

E paramichi katar e bilache patra maskar o lliu

²⁴ O Jesus phenda lenge aver paramichi ta phenela: E charoina e Devleki si sargo iek manus kai chudia lachi simicha ande pi umal.

²⁵ Ta kana sa e llene sovena avilo leko dusmano ta chudia bilache simiche maskar o lliu ta llelotar,

²⁶ ta kana barilo o lliu, i e bilache patra barile,

²⁷ ondaka llele e esluge kai o gazda e umaliako ta phende leke: gazda ¿ni thodan lachi simicha ande chi umal a katar likiste gala bilache patra?

²⁸ Vou phenda lenge: Iek dusmano cherda gava. A e esluge phende leke: ¿Mange te lla te ikana gola patra?

²⁹ A o gazda phenda lenge: Iok soke sai avelpe kai kana ka chirden e bilache patra tumen sai chirden i o lliu.

³⁰ Mai sukar muken te barion e dui pe iek than lligo ni ka avel o vreme te chiden o lliu, ondaka ka phenav e eslugenge: mai anglal chiden e bilache patra ta phanden len pe umpe ta phabaren len, a o lliu chiden le ande mi soba.

E paramichi katar e simicha mostasaki

³¹ O Jesus ande aver paramichi phenda lenge gia: E charoina e milosoki si sargo e simicha katar e mostasa kai iek manus lia la ta thoda la ande chik katar pi umal.

³² Chachimaia voi si e mai minoni katar sa e simiche, a kana bariol cherdol e mai bari katar o vostano, ta cherdol sargo iek kas, gia baro kai e chiriklia llan ta cheren pe kuibura pe leke krangura.

E paramichi katar e levadura

³³ O Jesus ande aver paramichi phenda lenge gia: E charoina e Devleki si sargo e levadura kai lia iek diskinia ta thoda la ande iek umpa arina ta sa goia arina phukhili.

Sar sikavel paramichenchar

³⁴ Sa gala orbe phenda o Jesus ande paramiche, a bi e paramichenchar ni dela lenge orba.

³⁵ Te sai cherdol so phendaia o profeta: Ka dav orba ande paramiche, ka phenav ezgode gurudine sar kana o Del cherda e sueto.

E bilache patra

³⁶ Ondaka kana o Jesus mukla e llenen ta dia ando cher, avile pasa le leke disipulura ta phende leke: Sikau amen so phenel e paramichi katar e patra e bilache.

³⁷ O Jesus phenda lenge: Gua kai chudel e lachi simicha, si o Chavo e Manuseko.

³⁸ E umal si o sueto, e lachi simicha si e chave e charoinake, a e bilache patra si e chave e bilacheke.

³⁹ O dusmano kai chudia e bilachi simicha si o llavolo, o vreme kana chidelpe o lliu si kana ka avel o son e phuviako, a e llene kai chiden o lliu si e suechura.

⁴⁰ Goleke, gia sar chidelpe e bilache patra ta phabardon ande iag, isto gia ka avelpe kana ka avel o son e phuviako.

⁴¹ O Chavo e Manuseko ka bichalel pe suechonen, ta ka chiden katar pi charoina sa golen kai cheren te peraven averen ta golen kai cheren o bilachipe,

⁴² ta ka chuden len ande furnava iagaki, kote ka avel o roipe ta e bari dar.

⁴³ Ondaka e llene chache ka klichin sargo o kham ande pe Dadeki charoina. Ko si le kan te asunel.

E paramichi katar o barvalipe gurudino

⁴⁴ Ta i e charoina e milosoki si sargo iek barvalipe gurudino ande iek umal kai iek lleno malavel ta guruvel le pale, ta llal veselimaia ta bichinel sa so si le ta chinel goia umal.

E but sukar klen

⁴⁵ I e charoina e milosoki si sargo iek lleno kai chinel ta bichinel lache klea,

⁴⁶ ta kana malavel iek klen but sukar, llal ta bichinel sa so si te sai chinel la.

E paramichi katar e mreza

⁴⁷ E charoina e milosoki si sargo iek mreza, kai kana chuden la ande mora chidel katar sa e mache.

⁴⁸ Ta kana si pherdi, ikanen la katar e mora pe iek rig, ta thovenpe besindo ta chiden e mache lache ande kotariche a e bilachen chuden avri.

⁴⁹ Isto gia ka avelpe kana ka avel o son e phuviako: Ka liken e suechura ta ka ikanen e bilachen katar e lache,

⁵⁰ ta ka chuden e bilachen ande furnava iagaki, kote ka avel o roipe ta e bari dar.

O barvalipe nevo ta i purano

⁵¹ O Jesus puchla len: ¿Tumen acharden gala ezgode? Von phende: Ea, Gazda.

⁵² O Jesus phenda lenge: Goleke suako kovachi e zakonoko llanglo ande charoina e milosoki si sargo iek dad kai si le porodo kai ikanel katar po barvalipe ezgode neve ta i purane.

O Jesus ando Nazaret

⁵³ Kana o Jesus phenda gala paramiche llelotar kotar.

⁵⁴ Ta avilo kai pi phuv, ta sikavela ande khanllira e judionenge kai sea kote. Ta e llene chudinape ta phenena: ¿Katar lel gua bizaipe ta cherel gala bare ezgode Devlikane?

⁵⁵ ¿Inai gava o chavo katar gua kai cherel ezgode kastune? ¿Ni ikhardol leki dei Maria, ta leke phlal, o Santiago, o Jose, ta i o Simon ta o Judas?

⁵⁶ ¿Ta ni si sa leke phiorra amenchar? ¿Katar ikanel gava sa gala ezgode?

⁵⁷ Ta saurre joliaona cheres lete. A o Jesus phenda lenge: Inai profeta te den le pachiu isto ande piri phuv ta i ande piro cher.

⁵⁸ Ta kote ni cherda but bare ezgode Devlikane soke von ni pachana.