Matei 12 - Biblia ande chib Romani

E disipulura ikanen lliu ando sabado

¹ Iek llive sabado o Jesus phirela maskar o lliu. Leke disipulura sea bokhale ta thodepe te chirden o lliu te jan le.

² E fariseura kana dikhle le, phende leke: A che disipulura cheren so nasti cherdol ando sabado.

³ A vou phenda lenge: ¿Tumen ni chitisarden so cherda o David kana vou ta i gola kai sea lea bokhaile?

⁴ Sar dia ande Devleko cher ta jala e marrne kai sea chinade e Devleke, kai von nasti jana ni vou ta ni gola kai sea lea ta kai gola marrne sai jana len samo e popura.

⁵ ¿A tumen ni chitisarden ando zakono sar ando cher e Devleko e popura radin ando sabado ta inai dosale?

⁶ Goleke phenav tumenge kai kate si iek mai baro neko o cher e Devleko.

⁷ Te llanena so si: zalba mangav a na kurbanura ni dosarena golen kai inai len dos.

⁸ Soke o Chavo e Manuseko si gazda katar o sabado.

O manus kai saia le iek va suko

⁹ Kana o Jesus llelotar kotar dia ande khanlliri e judionengi kai saia kote.

¹⁰ Ta kote saia iek manus kai leko va saia suko, ta te sai dosaren e Jesuse puchle le: ¿Sai sastardol ando sabado?

¹¹ O Jesus phenda lenge: ¿Ko tumendar te si le iek bakro ta o bakro te perel ande iek bunari ando sabado ni istarel le pe vastea ta ikanel le?

¹² A iek manus mol mai but neko iek bakro. Goleke sai cherdol o lachipe ando sabado.

¹³ Ondaka o Jesus phenda gole manuseke: Inzar cho va. Vou inzarda po va ta leko va sastilo sar o gua va.

¹⁴ A kana e fariseura lleletar die pe orba te dikhen sar ka mundaren e Jesuse.

O esluga esvirime

¹⁵ Kana o Jesus llangla gaia ezgoda llelotar kotar a but baro sueto llelo pala le ta saurren sastarela.

¹⁶ Ta phenela lenge te na den orba letar angla e llene.

¹⁷ Te sai cherdol so phendaia o profeta o Isaias:

¹⁸ Etalo kote mo esluga kai me esvirisardem, vou kai voliv le, vou kai veselil mo zivoto, Ka thovav mo Duo upral pe lete, ta ka del orba katar e kris e llenenge kai inai judiura.

¹⁹ Ni ka jalpe ta ni ka urkil, ta niko ni ka asunel leko avazi pe droma.

²⁰ Ni ka phagel o kas kai si phagorro, ta ni ka mundarel o thau e memeliako kai thuvarel llik kana ka cherel te dobil e kris.

²¹ Ande leko anav ka aduricharen gola kai inai judiura.

Kana kusen e Santo Duo

²² Ondaka inllarde kai o Jesus iekhe manuse kai saia o llavolo ande lete, gua lleno saia korro ta i nemao, ta o Jesus sastarda le ta gua lleno dikhla ta dia orba.

²³ Sa o sueto chudilape ta phenela: ¿Sai avel gava o Chavo e Davideko?

²⁴ A kana asunde gava e fariseura phende: Gava chudel avri e llavolonen soke o Beelzebu, o gazda e llavolonengo del le e zor te cherel le.

²⁵ A o Jesus sar llanela lenge mislura phenda lenge: Suako phuv kai si fuladi voi pea zatrilpe, ta nisavo foro o familia kai si fuladi voi pea ni ka achel.

²⁶ A isto gia, o Satanas te tradel avri isto vou pe ta te fuladol isto vou pea, vou pea si fulado, a te si gia ¿sar ka achel leki zor?

²⁷ A me te tradau avri e llavolonen e zoraia katar o Beelzebu, ¿ande kaki zor traden e llavolonen tumare disipulura? Goleke, von ka chinen tumenge e kris.

²⁸ A te si kai o Duo e Devleko del man zor te tradau e llavolonen, chachimaia avila tumende e charoina e Devleki.

²⁹ Goleke ¿Sar ka del vareko ando cher katar iek manus kai si zuralo ta te chorel peke leke ezgode te na phandela le mai anglal? Ondaka kote sai ka chorel peke e ezgode katar o cher.

³⁰ O lleno kai inai manchar, marelpe manchar, ta o lleno kai ni chidel manchar rispil.

³¹ Goleke phenav tumenge: Suako bilachipe ta orba bilachi ka avel prostime e manusenge, a te kusen e Santone Duo ni ka aven prostime.

³² Vareko i te phenela varesavo alav bilacho katar o Chavo e Manuseko, ka avel prostime, a ko dela orba bilachi katar o Santo Duo, ni ka avel prostime, ni akana ni mai angle.

O kas pinllardol prema leki septelia

³³ A o kas te si lacho, leke septelie si lache, a o kas te si bilacho leke septelie si bilache, soke pala e septelie pinllardol o kas.

³⁴ ¡Vicha sapengi! ¿Sar ka den orba lachi, kana sen bilache? soke katar so si mai but ando lio del orba o mui.

³⁵ O manus lacho del orbe lache soke o lachipe si ande leko lio, a o manus bilacho del orbe bilache soke o bilachipe si ande leko lio.

³⁶ A me phenav tumenge kai ando llive e krisako ka avel krisime suako alav bilacho kai den orba e manusa.

³⁷ Goleke pala che alava pe kris ka ave llindo bi dosako o pala che alava ka ave dosalo pe kris.

Nesave llene mangen iek bari ezgoda Devlikani

³⁸ Ondaka nesave fariseura ta i nesave kovacha e zakonoke phende: Kovachi manga dikha iek bari ezgoda Devlikani.

³⁹ O Jesus phenda lenge: Gala llene bilache ta kurvaria mangen te dikhen iek bari ezgoda Devlikani, a so ka delpe lenge te dikhen si so avilape e Jonasea o profeta.

⁴⁰ Soke isto gia sar o Jonas saia ando lli e macheko trin llive ta trin racha, isto gia ka avel o Chavo e Manuseko ando lio e phuviako, trin llive ta trin racha.

⁴¹ E manusa katar o Ninive ka usten pe kris gale vichaia ta ka dosaren la, soke von irisaile katar pe bilache droma kana asunde e Jonase, a kate si iek mai baro neko o Jonas.

⁴² I e charoina katar o Sur ka ustel ando llive e krisako gale vichaia ta ka dosarel la soke voi avili katar o goia rig e phuviaki te sai asunel o bizaipe katar o Salomon, a so si kate si mai baro neko o Salomon.

O duo bilacho kai irilpe

⁴³ Kana iek duo bilacho likel katar iek lleno, llal pe thana suke ta rodel kai te besel te lelpe letar o chiñipe, ta ni malavel le.

⁴⁴ Ondaka phenel: ka iriv man kai mo cher katar likistem. Ta kana irilpe, malavel gole llene sargo iek cher chucho, metime, ta lachardo.

⁴⁵ Ondaka llal ta anel efta duonen mai bilache neko vou, ta sa den te zivin ande gua lleno, ta achel mai bilacho neko omanglal. Isto gia ka avel pe gale bilache vichaia.

E dei ta e phlal katar o Jesus

⁴⁶ Kana o Jesus dela orba e suetoke, leki dei ta leke phlal sea avri ta mangena te den lea orba.

⁴⁷ Ondaka iek lleno phenda leke: Chi dei ta che phlal si avri ta mangen te den tuia orba.

⁴⁸ A o Jesus phenda gole lleneke: ¿Ko si mi dei ta ko si me phlal?

⁴⁹ Vazdia po va kai pe disipulura ta phenda: Gala si mi dei ta me phlal,

⁵⁰ soke kogo cherela e volia me Dadeki kai si ando miloso, gua si mo phlal, mi phei ta mi dei.