Matei 11 - Biblia ande chib Romani

¹ Kana o Jesus sikada pe desuduie disipulonen so te cheren llelotar kotar te sikavel e lachi viasta ande lenge forura.

E llenen kai bichalda o Juan kai kristila

² Kana o Juan saia ande rubie phende leke so cherela o Jesus ta bichalda duien katar pe disipulura,

³ te puchen le: ¿San tu gua kai saia te avel o si te adurichara avere?

⁴ O Jesus phenda lenge: Llan ta phenen e Juaneke e ezgode kai dikhen ta asunen.

⁵ Phenen leke kai e korre dikhen, e bange phiren, e leprosura saston, e kasuke asunen, e mule llundinpe ta e chorrenge phendol e lachi viasta.

⁶ ¡Ta blagosime si gua kai ni jasarel po pachape ande ma!

⁷ Kana von llanatar thoda o Jesus te del orba e llenenge katar o Juan ta phenela: ¿So llelen tumen te dikhen po pusto? ¿Iek ran chinome e balaviatar?

⁸ A te na, ¿so llelen te dikhen? ¿Iekhe manuse furiado ande glamne patave? Tumen llanen kai e llene kai furiadon gia zivin samo ande chera e charoke.

⁹ ¿A so llelen te dikhen? ¿Iekhe profeta? Ea phenav tumenge, ta mai but neko iek profeta.

¹⁰ Soke o Juan si kai si pisime letar: Me bichalav me profeta angla tu, te lacharel chuke o drom.

¹¹ Chachimaia phenav tumenge kai maskar sa e manusa, ni iek ni saia mai baro neko o Juan kai kristil, a o mai mimono ande charoina e milosoki si mai baro neko vou.

¹² Sar kana avilo o Juan kai kristil llik akana, e charoina e milosoki jal duk katar o silnope e manusengo, ta e llene silne lenla peke.

¹³ Sa e poraukura ta o zakono phende so saia te avelpe llik kai o Juan,

¹⁴ a te kamena te len le, vou si gava Elias kai saia te avel.

¹⁵ Ka si len kan te asunen.

¹⁶ ¿A pe ka ka phenav kai si chuti gaia vicha? Von si sargo e minone kai besen po maskar katar e forura ta urkin ogole minonenge kai llan lenchar ta phenen lenge.

¹⁷ Basaldam tumenge ande firura ta ni chelden, llilabiam tumenge llilia zalbake ta ni rovden.

¹⁸ Soke avilo o Juan kai ni jal ta ni piel, ta phenen letar, ande le si o llavolo.

¹⁹ Mapalal avilo o Chavo e Manuseko kai jal ta piel ta phenen letar, gava si iek lleno kai samo jal ta piel ta kai si amal e llenenchar kai si publikanura ta e manusenchar bilache. A leko bizaipe dikhol ande so cheren sa leke chave.

E forura kai ni kamen te pachan

²⁰ Ondaka lia o Jesus te dosarel e foronen kote kai vou sastardaia bute llenen, soke ni irisailea katar pe bilache droma. Ta phenela gia:

²¹ ¡Tesko chuke, Korazin! ¡Tesko chuke Betsaida! Soke te cherdilea ando Tiro ta ando Sidon e bare ezgode Devlikane kai cherdile tumende, von ollikana irisailea katar pe bilache droma ande patave zalosne ta chudiea prajo pe po soro.

²² Goleke, phenav tumenge kai ando llive e krisako tumen ka aven mai dukhade neko e llene katar o Tiro ta katar o Sidon.

²³ A tu, foro katar o Kapernav, ¿misli kai ka ave vazdino llik ando miloso? Ka fulie llik kai e charoina e merimaki, a te cherdilea ande Sodoma e bare ezgode Devlikane kai cherdile ande tute, llik ande gala llivesa e Sodoma achilia.

²⁴ Goleke phenav tumenge kai ando llive e krisako ka avel mai bari chi duk neko e Sodomaki.

Samo o Chavo llanel ko si o Dad

²⁵ Ande gua vreme o Jesus phenda: Blagosiv tut, Dade, Gazda e milosoko ta i e phuviako, soke gurudan gala ezgode katar e bizai ta katar e llangle ta sikadanlen e minonenge.

²⁶ Ea Dade, soke gia avila chuke drago te cherele.

²⁷ Mo Dad dia mande sa e ezgode. Niko ni pinllarel e Chave, samo o Dad, ta niko ni pinllarel e Dade samo o Chavo ta o Chavo sikavel le kake vou mangela.

²⁸ Aven mande sa gola kai sen radime ta kai inllaren pharipe, ta me ka cherav te lelpe tumendar o chiñipe.

²⁹ Kanden mo zakono ta sikon mandar kai ni istardivav ta mo lio si kovlo ta manchar ka lelpe tumendar o chiñipe.

³⁰ Soke mo zakono sai inllardol ta inai pharo.