Matei 10 - Biblia ande chib Romani

O Jesus ikharel desudui disipulura

¹ Ondaka o Jesus ikharda pe desuduie disipulonen, ta dia len o gazdaripe te traden e bilache duonen ta i te sastaren suako nasualipe ta suako duk.

² E anava katar e desudui disipulura si gala: O purvo o Simon, kai ikharena le Pedro ta leko phlal o Andres, o Jakobo ta leko phlal o Juan chave e Zebedeoke, ta leko phlal o Juan.

³ O Felipe, o Bartolome o Tomas ta o Mateo o publikano, o Santiago chaurro e Alfeoko ta o Tadeo.

⁴ O Simon o kananita ta o Judas iskariote, gua kai phukada e Jesuse.

O rado katar e desudui

⁵ Gale desuduien bichalda o Jesus ta sikada len, ta phenda lenge: Po drom golengo kai inai judiura na llan, ando foro katar e Samaria na den,

⁶ mai sukar llan mai anglal kai e bakre jasarde katar o foro e Israeleko.

⁷ Ta kana ka llan phenen lenge gia: E charoina e milosoki avili pase.

⁸ Sastaren e nasualen ta i e llenen kai si pe lende e lepra, llungaven e mulen traden avri e llavolonen, so lien llabe den le i tumen llabe.

⁹ Na inllaren sunakai ni rup ni jarkuma ande tumaro chemeri.

¹⁰ Ni galavo e dromeke, ta ni premena ni minie, ni rovli soke gua kai radil morabi te pochinen leke.

¹¹ A kana ka den ande varesavo foro o forichi puchen ko si lacho ande gua foro ta achen ande leko cher lligo ni ka llantar kotar.

¹² Kana ka den ando cher phenen gia: E pas te avel tumenchar.

¹³ A e llene katar gua cher te si lache, tumari pas ka avel upral pe gua cher, a te na avena lache, tumari pas ka irilpe tumende.

¹⁴ A te na avile tumenchar pachivale, ta te na mangle ni te asunen tumen, liken katar gua cher o katar gua foro ta chinosaren o prajo katar tumare minie.

¹⁵ Chachimaia phenav tumenge kai ando llive katar e kris e duk kai ka delpe gole foroke ka avel mai bari neko e llenenge katar e phuv katar e Sodoma ta katar e Gomorra.

Sargo bakren maskar e ruv

¹⁶ Me bichalav tumen sargo bakre maskar e ruva. Goleke morabi te aven bizai sargo e sapa ta proste sargo e gulubura.

¹⁷ Arakhen tumen katar e manusa, soke ka thoven tumen ande krisa ta ka inllaren tumen ande khanllira e judionenge ta ka chalaven tumen e bichoia.

¹⁸ Ta cheres ma i ka thoven tumen angla e sudura ta angla e kraliura te sai phenen e orba e chachi mandar te sai asunen von ta i gola kai inai judiura.

¹⁹ Kana ka inllaren tumen angla e kris, na brigin tumen sar o so ka den orba, soke kana ka avel o vreme o Del ka del tumen e alava te den orba.

²⁰ Soke ni ka den orba tumen, o Duo tumare Dadeko ka del tumen e alava te den orba.

²¹ E phlal ka den ando meripe isto pe phlalen, ta e dada pe chaven, ta e chave ka murzin pe pe dada ta ka mundaren len.

²² Sa o sueto ka murzil pe tumende pala mo anav, a gua kai llala zoriaia llik kai o son, ka avel braduime.

²³ Kana e llene katar iek foro ka llan pala tumende te maren tumen, nasen ande aver foro. Chachimaia phenav tumenge, kai kana ka avel o Chavo e Manuseko tumen ni ka resen te phiren sa e forura katar o Israel.

²⁴ Gua kai sikol inai mai but neko po kovachi ta ni o esluga inai mai but neko po gazda.

²⁵ Dosta goleke kai sikol te avel sargo po kovachi ta o esluga te avel sargo po gazda. A o dad gole familiako te ikharen le Beelzebu, so mai but ka phenen katar e llene kai zivin ande leko cher.

Katar morabi te dara

²⁶ Goleke tumen na daran katar e llene, soke sogo si gurudino ka sikadol, ta sa so cherdol po chorial ka llangliolpe.

²⁷ So me phenav tumenge ando truniariko, phenenle tumen ollivesea, ta so me phenav tumenge po chorial urkisarenle upral pe chera.

²⁸ Na daran katar gola kai mundaren e esnaga a nasti mundaren e duo, katar morabi te daran si katar gua kai sai mundarel e duo ta i e esnaga ando tufano.

²⁹ ¿Ni bichindon dui chirikliorra pe iek tolarichi? A ni iek lendar ni perel pe phuv te na avela e volia tumare Dadeki.

³⁰ A e bal tumare soreke si llinde e Devletar iek po iek.

³¹ Goleke na daran: tumen mai mol tumen neko but chirikliorra.

Phen angla e manus kai pinllare e Jesuse

³² A vareko te phenela kai pinllarel man angla e manusa, i me ka phenav kai pinllarav le angla mo Dad kai si ando miloso,

³³ a vareko te phenela kai ni pinllarel man angla e manusa, i me ka phenav kai ni pinllarav le angla mo Dad kai si ando miloso.

E joli maskar o porodo

³⁴ Na mislin tumen kai avilem te anav e pas ando sueto, ni avilem te anav pas, avilem te anav o jarni.

³⁵ Soke avilem te thovav ande joli e manuse pe dadea, a e chorri te avel ande joli pe daia, ta e bori te avel ande joli pe sasuiaia,

³⁶ goleke, e manuseke dusmanura ka aven isto leki familia.

³⁷ Ko volil pe dade o pe da mai but neko man inai lacho mange, kogo volil pe chaurre o pe chorra mai but neko man, inai lacho mange,

³⁸ ta ko ni lel po krusto ta te llal pala ma, inai lacho mange.

³⁹ O lleno kai mangela te braduil po zivoto ka jasarel le, a o lleno kai jasarela po zivoto pala ma, ka braduil le.

O chari ando miloso

⁴⁰ Ko lel tumen, lel man, ta ko lel man, lel gole kai bichalda man.

⁴¹ Ko lel iekhe profeta, soke si profeta ka dobil so dobil iek profeta, a ko lel iekhe chache soke si chacho, ka dobil so dobil iek lleno chacho.

⁴² A vareko te del iek taso pai silalo iekhe minone katar gala, samo soke vou si mo disipulo chachimaia phenav tumenge kai ko dela gua taso pai ni ka jasarel so si te dobil.