Markos 6 - Biblia ande chib Romani

O Jesus ando Nazaret

¹ O Jesus llelotar kotar karing po foro o Nazaret, ta leke disipulura llele lea.

² Kana avilo o sabado, thoda te sikavel ande khanlliri e judionengi. Ta but llene kana asunde e Jesuse, chudisaile ta puchenape: ¿Kai sikilo gava lleno pe gachin ezgode? ¿Ta katar ikanda gua bizaipe ta gola bare ezgode kai cherel?

³ ¿Inai gava o lleno kai cherel ezgode kastune, ta si chavo e Mariako ta phlal e Santiagoko, e Joseeko, e Judaeko ta e Simonoko? ¿Ta ni zivin kate maskar amende i leke phlal? Ta ni pachana ande lete.

⁴ A o Jesus phenda lenge: Pe suako rig den liubao iekhe profeta. Samo ande leki phuv ni den le liubao, ni maskar pi familia ta ni ande leko cher.

⁵ Kote nasti cherda ni iek bari ezgoda Devlikani, samo thoda pe va pe nesave nasuale ta sastarda len.

⁶ Ta chudisailo soke gola llene ni pachana ande le ta o Jesus llala kai e forichura kai sea truial ta sikavela.

⁷ Ikharda e desuduie disipulonen, ta thoda te bichalel len po dui llene, ta dia len te gazdarin pe duura bilache.

⁸ Ta phenda lenge te na inllaren niso e dromeke, samo iek rovli. Ta saia te na inllaren ni jape ni love.

⁹ Sai thovena sinele, a nasti inllarena premena.

¹⁰ Ta i phenda lenge o Jesus: Kana tumen ka den ande iek cher, racharen kote lligo ni ka llantar katar gua than.

¹¹ A varende te na avile tumenchar pachivale, ta te na mangle ni te asunen tumen, liken kotar ta chinosaren o prajo katar tumare porrne te dikhen kai ni avila tumenge drago so cherde tumenchar.

¹² Ondaka e disipulura llele te phenen e llenenge te irinpe karing o Del.

¹³ Ta i tradie bute llavolonen, ta thovena zeitino pe but nasuale ta sastarena len.

O meripe e Juaneko gua ka kristila

¹⁴ O charo o Erodes asunda kai dena orba katar o Jesus, soke leki viasta llelia pe suako rig. A Nesave llene phenena: O Juan gua kai kristila ustilo katar o meripe, ta goleke vou sai cherel gala bare ezgode.

¹⁵ Aver llene phenena: Vou si o profeta o Elias. A aver phenena: Vou si iek profeta, sargo e purane poraukura.

¹⁶ Kana o Erodes asunda so phenena e llene, phenda: Gua lleno si o Juan. Me bichaldem te chinen leko soro ta akana ustilo katar o meripe.

¹⁷ O Erodes cheres e Erodias, bichaldaia te phanden e Juane, ta phenda te phanden le lanchonenchar ande rubie. E Erodias saia zinime e Filipoia, phlal e Erodeseko, a o Erodes zinisailoa laia.

¹⁸ A o Juan phendaia e Erodeseke: Tu nasti chere chiri e rromi che phlaleki.

¹⁹ Goleke e Erodias murzila po Juan, ta mangela te mundarel le a nasti cherela le,

²⁰ soke o Erodes darala letar, soke llanela kai o Juan saia iek manus chacho ta Santo, ta vou arakhela le. Kana o asunela le ni acharela leke so phenela, a e Erodeske saia drago kana asunela le.

²¹ A e Erodias dikhla kai sai cherel pe piro soke o Erodes nakhela iek burs ios sar kana biandiloia, ta cherda iek baro jape pe mai bare sudonenge ta e llenenge kai sea mai asunde ande Galilea.

²² Ondaka e chei e Erodiaski dia kote kai jana ta chelda, ta avila gia drago e Erodeseke ta e llenenge kai besena lea pe sinia, kai o charo phenda e cheake: Mang mandar sogo kamea, ta me ka dav le chuke.

²³ Ta jala lake sovel but droma kai ka del la sogo voi mangela letar, i dopas katar o foro kai vou gazdarila.

²⁴ E chei likisti kotar, ta puchla pe da: ¿So ka mangav letar? A laki dei phenda lake: Mang letar o soro katar o Juan kai kristil.

²⁵ E chei lleli oma kai o charo, ta phenda leke: Mangav te ane isto akana ande iek tepsia o soro katar o Juan kai kristil.

²⁶ O charo tristosailo but a pala po alav kai diaia la ta i pala e llene kai sea lea pe sinia, ni kamla te phenel lake iok pe so voi mangla letar.

²⁷ Ondaka bichalda iekhe boñiko te anen lete o soro e Juaneko. O boñiko llelo ande rubie, chinda e Juaneko soro

²⁸ ta inllarda o soro ande iek tepsia, ta diale e cheake, ta e chei diale kai pi dei.

²⁹ Kana e disipulura e Juaneke llangle kai vou mulo, lie leki esnaga ta inllarde le te prajon le.

O Jesus del te jal bute llenen

³⁰ Mapalal, e disipulura chidinaile e Jesusea ta phende leke sa so von cherde ta so von sikade.

³¹ O Jesus phenda lenge: Aven, samo amen te lelpe amendar o chiñipe pe iek than mai esmiro. Soke sea pe gachin llene kai llana ta avena kai ni resela len o vreme ni te jan.

³² Ondaka o Jesus ta leke disipulura llele dur ande iek llimia.

³³ A but llene dikhle len kana llanatar, ta pinllarde len. Ondaka katar sa e forura prastie incha, ta avile mai oma neko von.

³⁴ Kana o Jesus fulisto katar e llimia, dikhla e sueto, ta avila leke zao lendar, soke sea sargo bakre kai inai len chobano, ta thodape te sikavel len but ezgode.

³⁵ Pasa e riat, avile kai o Jesus leke disipulura ta phende leke: Gava than kai sam si pusto ta lel te perel e riat,

³⁶ phen e llenenge te llantar pe droma ta ande forichura kai si truial te chinen peke vareso te jan.

³⁷ A o Jesus phenda lenge: Den len tumen te jan. Von phende leke: ¿Mange te lla te china marrno kai mol le o rado iekhe burseko te da len te jan?

³⁸ O Jesus phenda lenge: ¿Pe gachin marrne si tumen? Llan te dikhen. Kana dikhle, phende leke: Panch marrne ta dui mache.

³⁹ Ondaka phenda te cheren e llenen te besen pe char zeleni, nesave pe iek rig a averen pe aver rig.

⁴⁰ Ta besle po stotina ta po pinda llene.

⁴¹ Ta o Jesus lia ande pe va e panch marrne ta e dui mache, dikhla ando miloso ta molisailo, phagla e marrne ta dia len kai pe disipulura te fulaven len e llenenchar. Ta fulada i e dui mache sa e llenenchar.

⁴² Saurre jale ta chalile,

⁴³ ta katar e kotora kai achile katar o marrno ta e mache pherde lenchar desudui kotariche.

⁴⁴ Gola kai jale katar e marrne sea preko panch milie murusa.

O Jesus phirel upral pe mora

⁴⁵ Mapalal, o Jesus cherda te liken leke disipulura ande llimia te nakhen pe o goia rig katar e mora mai oma neko vou, karing e Betsaida, a vou achilo e llenenchar kai llanatar.

⁴⁶ Ta kana lleletar e llene, llelo po burdo te molilpe.

⁴⁷ Kana peli e riat, e llimia saia po dopas katar e mora. A o Jesus achilo korkorre pe phuv,

⁴⁸ ta dikhla kai nasti cherena te llal angle e llimia soke e balav chalavela lenge anglal. A kana lena te pharron e zore llelo lende o Jesus phirindo upral pe mora, ta lela te nakhel pasa lende,

⁴⁹ kana dikhle kai phirela upral pe mora, mislisaile kai saia iek chojano, ta urkisarde

⁵⁰ soke sa dikhena le ta daraile. A o Jesus phenda lenge: ¡Cheren tumenge zor! ¡Me sem, na daran!

⁵¹ Likisto ande llimia, ta e balav achili, ta von chudisaile but,

⁵² soke ni achardea e bari ezgoda kai cherdaia e marrnenchar, soke lengo mislo saia ando truniariko.

O Jesus sastarel e nasualen katar o foro o Jenesaret

⁵³ Nakhle pe o goia rig katar e mora ta avile ando Jenesaret, ta phangle e llimia pasa e phuv.

⁵⁴ Samo so fuliste katar e llimia, e llene pinllarde e Jesuse.

⁵⁵ Phairde sa goia phuv, ta anena e nasualen ande postelie kote kai asunena kai si o Jesus.

⁵⁶ Ta kaigo llala o Jesus, ande forichura, forura o pe droma, thovena e nasualen po drom ta molinape leke te mukel len samo te dodin iek rig katar leko gertachi, ta sa gola kai dodina le, sastona.