Markos 3 - Biblia ande chib Romani

O Jesus sastarel iekhe nasuale ando llive sabado

¹ O Jesus pale dia ande khanlliri e judionengi, ta kote saia iek lleno kai leko va saia bango.

² Ta prezona e Jesuse te dikhen dal ka sastarel le ando llive sabado, ta gia te avel len iek orba te dosaren le.

³ O Jesus phenda e lleneke kai saia leko va bango: Uste ta thov tut po maskaral.

⁴ Ta puchla ogole llenen: ¿So sai cherdol ando sabado: O lachipe, o o bilachipe? ¿Te bradui iek zivoto o te zatri le? A von ni phende niso.

⁵ Ondaka dikhla jolinaia pe llene kai sea truial ta i zalbaia soke lenge lie sea zurale, ta phenda gole manuseke: Inzar cho va. Ta gua manus inzarda po va, ta leko va sastilo.

⁶ Samo so e fariseura lleletar, diepe orba e llenenchar kai llana pala o Erodes te sai mundaren e Jesuse.

But llene katar e Galilea pasa e mora.

⁷ O Jesus llelo pasa e mora pe disipulonenchar, ta but llene katar e Galilea llele pala le.

⁸ Kana llangle katar e bare ezgode kai cherela, llele te dikhen le but llene katar e Judea, katar o Jerusalem, katar e Idumea, katar o goia rig e Jordaneki, ta i truial katar o Tiro ta o Sidon.

⁹ Goleke, o Jesus phenda pe disipulonenge te lacharen leke iek llimia, te na espiden le soke sea but llene.

¹⁰ O Jesus sastarda pe gachin llenen, kai sa e nasuale chidinaile truial letar ta mangena te dodin le te sai saston.

¹¹ Kana dikhena le e duura bilache, dena changa angla le ta urkina ta phenena: ¡Tu san o Chavo e Devleko!

¹² A o Jesus dela pe lende silnomaia te na den orba letar angla e llene.

O Jesus esviril desudui disipulura

¹³ Mapalal likisto po burdo, ta ikharda golen kai vou mangla, ta avile lete.

¹⁴ Esvirisarda desuduien te aven lea, ta te bichalel len te phenen e lachi viasta. Ta thoda lengo anav apostolura.

¹⁵ Ta dia len e zor te chuden avri e llavolonen:

¹⁶ Gala si e desudui kai esvirisarda o Jesus: E Simono, kai thoda leko anav Pedro.

¹⁷ E Santiago, chavo e Zebedeoko, ta e Juane phlal e Santiagoko, ta thoda lengo anav Boanerjes kai gua si, Chave katar o Girmipe.

¹⁸ E Andrese, e Felipe, e Bartolomee, e Mateo, e Tomase, e Santiago chavo e Alfeoko, e Tadeo, e Simono o kananeo,

¹⁹ ta e Judase o Iskariote, gua kai phukada e Jesuse.

Dosaren e Jesuse

²⁰ Mapalal o Jesus dia ande iek cher, ta pale chidinaile pe gachin llene kai vou ta leke disipulura nasti jana ni marrno.

²¹ Kana e familia e Jesuseki asunda so cherela, avile te inllaren le pea, soke phenena kai dilailo.

²² Ta i e kovacha e zakonoke kai avile katar o Jerusalem phenena: O Beelzebu, isto o gazda e llavolonengo diale e zor te chudel avri e llavolonen.

²³ Ondaka o Jesus ikharda len, ta phenda lenge ande iek paramiche: ¿Sar o Satanas ka chudel avri isto vou pe?

²⁴ Iek phuv kai si fuladi voi pea zatrilpe, ta nisavo foro kai si fulado vou pea ni ka achel.

²⁵ Ta iek familia kai si fuladi voi pea ni ka achel.

²⁶ A isto gia, o Satanas te marelpe ta te fuladol isto vou pea, vou ka zatrilpe, ta ka merel.

²⁷ Niko nasti del ando cher katar iek lleno zuralo ta te lel leke ezgode, te na phandela le mai anglal, a te phanglale, ondaka sai ka lel leke ezgode katar leko cher.

²⁸ Chachimaia phenav tumenge kai o Del prostil sa lengo bilachipe ta e bilache alava kai ka phenen:

²⁹ A o lleno kai ka del orbe bilache katar o Santo Duo, ni ka avel prostime nikada, ta si dosalo ostade.

³⁰ O Jesus phenda gua soke von phende kai ande le saia iek duo bilacho.

¿Ko si mi dei ta me phlal?

³¹ Ondaka avili e dei ta e phlal e Jesuseke, ta achile avri ta bichalde te ikharen le.

³² A e llene kai besena truial katar o Jesus phende leke: Chi dei ta che phlal etalen avri ta roden tut.

³³ Vou phenda lenge: ¿Ko si mi dei ta me phlal?

³⁴ Ta dikhla e llenen kai besena truial letar, ta phenda: Etalen kate mi dei ta me phlal.

³⁵ Soke varesavo lleno kai cherel e volia e Devleki, gola si mo phlal, mi phei, ta mi dei.