Markos 15 - Biblia ande chib Romani

O Jesus angla o Pilato

¹ Thiarinako rano chidinaili e mai bari kris kai sea e gazda e poponenge, e phure, ta e kovacha e zakonoke, ta inllarde e Jesuse phanglo ta die le kai o Pilato.

² O Pilato puchla le: ¿San tu o Charo e judionengo? O Jesus phenda leke: Tu phendanle.

³ A e gazda e zakonoke dosarena le katar but ezgode,

⁴ O Pilato pale puchla le: ¿Ni phene niso? Dik pe gachin orbe ikanen pe tute.

⁵ A sar o Jesus ni phenda leke niso, o Pilato chudisailo.

Chinade e Jesuseke o meripe

⁶ Pe suako Paskua, o Pilato mukliarela iekhe phangle, gole kai o foro mangela.

⁷ Ondaka saia phanglo iek lleno kai ikhardola Barrabas, vou saia phanglo ande rubie avere llenenchar soke mundardea iekhe llene kana mardepe cheres e murzania kai saia len pe sudura rromanura.

⁸ Avile e llene kai o Pilato ta thode te mangen letar te cherel isto gia sar cherela suako burs.

⁹ A o Pilato phenda lenge: ¿Mangen te mukliarav e Charo e judionengo?

¹⁰ Soke vou acharela kai cheres e murzania kai saia len po Jesus dieale lete.

¹¹ A e gazda e zakonoke divosarde e llenen te sai mangen te mukliaren e Barrabase.

¹² O Pilato pucha len: ¿A so mangen te cherav gale llenea kai tumen phenen leke o Charo e judionengo?

¹³ Von phende leke urkindo: ¡Krustosaren le!

¹⁴ O Pilato phenda lenge: ¿Savo bilachipe cherda? A von pale urkisarde: ¡Krustosaren le!

¹⁵ Ondaka o Pilato, sar mangela te achel lacho e llenenchar, mukliarda e Barrabase ta bichalda te maren e Jesuse e bichoia, ta mapalal diale te krustosaren le.

¹⁶ Ondaka e boñikura inllarde e Jesuse ande chereki bar kai ikhardol pretorio, ta chidie sa e boñikonen.

¹⁷ Ta thode pe lete iek chiti lolo, khuvde iek korona e karrnenchar ta thodela pe leko soro.

¹⁸ Mapalal thode te urkin: ¡Te avel bajtalo o Charo e judionengo!

¹⁹ Chalavena le ando soro iekhe kastea, chungardena le, dena changa angla le, ta i dena tenemava.

²⁰ Ta kana marde letar espurnia ikande letar o chiti lolo, ta thode pe lete isto leke patave ta inllarde le avri te krustosaren le.

Krustosaren e Jesuse

²¹ Iek lleno katar o Sirene, kai ikhardola Simono, o dad e Alejandroko ta e Rufoko, kai avela katar e droma. Kana nakhela kotar, thode le pe zor te inllarel o krusto e Jesuseko.

²² Inllarde e Jesuse pe iek than kai ikhardol Golgota kai gua si: O than e kokalengo.

²³ Ta dena le te piel mol ta e mirra amime, a o Jesus ni pila

²⁴ Ondaka krustosarde le. Ta e boñikura fulade maskar pete leke patave, ta chelenape te dikhen ko ka achel leke patavenchar.

²⁵ Saia ande inia e thiarinake kana krustosarde le.

²⁶ Ta thode po krusto pisime O Charo e judionengo. Soke von phenena kai goia saia leki dos.

²⁷ Ta krustosarde pasa le duie llenen kai sea kochkaria, iek pe leki chachi, ta o gua pe leko estingo.

²⁸ Ta gia cherdilo so phenel ando Pisipe kote kai phenel gia: Ta saia llindo e bilachenchar.

²⁹ E llene kai nakhena kusena le, miskona po soro ta phenena: ¡Bre, tu kai perave o cher e Devleko ta ande trin llive vazdele pale,

³⁰ braduisar isto tu tut, ta fulie katar o krusto!

³¹ Ta isto gia marena letar espurnia i e gazda e poponenge ta e kovacha e zakonoke. Ta phenena: ¡Braduisarda averen, a vou pe nasti braduil!

³² ¡Te fuliel katar o krusto gua Mesias Charo katar o Israel, te dikha ta te pacha! Ta i gola kai sea krustome pasa le kusena le.

O meripe e Jesuseko

³³ Kana saia ande desudui e lliveseke, sa e phuv achili ando truniariko trin saiata.

³⁴ Isto ande gua saiato o Jesus urkisarda zurale, ta phenda: Eloi, Eloi, ¿lama sabaktani? gua si: Devla, Devla, ¿soke muklan man?

³⁵ A Nesave llene kai sea kote, asunde le, ta phende: Asunen, ikharel e profeta e Eliase.

³⁶ Ondaka iek lendar prastio, chingarda iek pamuko ande mol cherki, phanglala pe iek kas ta resadale kai o Jesus te piel, ta phenda: Muken le te dikha dal o Elias ka fuliarel le katar o krusto.

³⁷ A o Jesus urkisarda ando baro avazi, ta mulo.

³⁸ Ta o chiti kai si andre ando cher e Devleko chindilo po dopas, upral tele.

³⁹ Ta kana o sudo rromano kai saia angla o Jesus dikhla kai mulo, phenda: Gava manus chachimaia saia e Devleko Chavo.

⁴⁰ Ta i kote sea nesave diskinie kai dikhena duratar, maskar lende saia e Maria Magdalena, e Maria e dei e Santiagoki o mai terno ta i e Joseeki, ta e Salome.

⁴¹ Gala diskinie llelea pala o Jesus ta pomozisardea le kana vou saia ande Galilea. Ta i sea kote but aver diskinie kai llelea lea ando Jerusalem.

Thoven e Jesuse ando limori

⁴² Gua llive saia iek llive palal katar o sabado pasa e riat ta lacharena sa e ezgode soke saia pase o sabado.

⁴³ O Jose katar e Arimatea kai vou saia but glamno ande lengi kris, ta i vou adurichare la e charoina e Devleki, llelo tromanimaia kai o Pilato ta mangla e esnaga e Jesuseki.

⁴⁴ O Pilato, chudisailo kai gia oma muloa o Jesus, ta ikharda e sudo te puchel le gachin cherela kai muloa.

⁴⁵ Ta kana o sudo phenda leke, o Pilato dia e esnaga e Jesuseki kai o Jose.

⁴⁶ Ondaka o Jose chinda iek chiti parno, fuliarda e Jesuse katar o krusto, ta ulisarda le ando chiti. Mapalal thoda le ande iek limori kai saia anado ande iek pechina, mapalal phangla o limori iekhe barrea.

⁴⁷ E Maria Magdalena ta e Maria e dei e Joseeki, dikhena kai thovena le.