Markos 14 - Biblia ande chib Romani

Phanden e Jesuse

¹ Achena dui llive te avel e Paskua, kana jalpe o marrno kai inai le levadura. Ta e gazda e poponenge ta e kovacha e zakonoke rodena sar te phanden e Jesuse kojaimaia, ta te mundaren le.

² Soke nesave llene phenena: Cherale kana ka nakhel e Paskua, te na avelpe burkania maskar e llene.

Iek diskinia thovel meriso po Jesus

³ O Jesus lleloia ande Betania, kai o cher e Simonoko, gua kai phenena leke o leproso. Kana beslo pe sinia, avili iek diskinia kai inllarela iek taso alabastroko pherdo meriso kai molale but, phagla o taso ta mukla te perel o meriso pe Jesuseko soro.

⁴ Nesave llene kai sea kote jolaile, ta phenena iek avereke: ¿Soke chudiniaol gava meriso?

⁵ Sai bichindiloia pe so mol o rado iekhe burseko ta te pomozilpe gole lovenchar e llenen kai si chorre. A von jolaile laia ta dena laki orba.

⁶ A o Jesus phenda lenge: Muken la. ¿Soke den la joli? Voi cherda manchar iek lachi ezgoda.

⁷ Soke e chorre ka aven tumenchar suako llive ta sai ka pomozin len kana tumen mangena, a me ni ka avav tumenchar sa o vreme.

⁸ Gaia diskinia cherda sa so sai cherel, soke sigarda te thovel pe ma o meriso me limoreke.

⁹ Chachimaia phenav tumenge kai ande varesavi phuv kana ka phenen e lachi viasta, ka den orba i katar so cherda gaia diskinia, ta gia ka denpe golli latar.

O Judas phukavel e Jesuse

¹⁰ O Judas Iskariote, iek katar e desudui disipulura, llelo kai e gazda e zakonoke te phukavel e Jesuse

¹¹ Kana asunde le, veselisaile ta diele po alav kai ka den le love e Judase, ta o Judas kotar angle rodela te sai phandel e Jesuse.

E sinia e Gazdaki

¹² O purvo llive katar e Paskua kana jalpe o marrno kai inai le levadura, ta kana mundardol o bakro katar e Paskua, e disipulura puchle e Jesuse: ¿Kai mange te chera o jape katar e Paskua?

¹³ Ondaka bichalda duien katar pe disipulura, ta phenda lenge: Llan ando foro. Kote ka malaven iekhe llene kai inllarel iek bure paieko. Llan pala le,

¹⁴ ta kote kai ka del, phenen e lleneke kai si gazda katar gua cher, kai o Kovachi phenel gia: ¿Savi si e soba kai ka jau me disipulonenchar o jape katar e Paskua?

¹⁵ Vou ka sikavel tumenge iek soba bari kai si upre ando cher, kai si lachardi. Kote cheren o jape.

¹⁶ E disipulura llele ando foro. Ta malade sa sar phendaia lenge o Jesus, ta cherde o jape katar e Paskua.

¹⁷ Kana peli e riat o Jesus avilo pe disipulonenchar.

¹⁸ Ta kana besle pe sinia ta jana, o Jesus phenda lenge: Chachimaia phenav tumenge kai iek lleno tumendar, kai jal manchar, ka phukavel man.

¹⁹ Von tristosaile, ta thode te puchen le iek po iek: ¿Sem me gua lleno?

²⁰ O Jesus phenda lenge: Si iek katar e desudui kai chingarel o marrno isto ande gua charo kai me chingarav.

²¹ O Chavo e Manuseko morabi te llal po drom kai phenel o Pisipe. A tesko goleke kai bichinel le. Mai sukar avilaia leke te na biandiloia.

²² Kana jana, o Jesus lia o marrno ande pe va ta dia fala e Devle, phaglale ta diale kai pe disipulura ta phenda: Len, gaia si mi esnaga.

²³ Mapalal lia iek taso, dia fala e Devle, diale lende, ta saurre pile.

²⁴ O Jesus phenda lenge: Gava si mo rat katar o nevo alav, kai chordol pala but llene te sai aven braduime.

²⁵ Chachimaia phenav tumenge kai ni ka piau ios katar so del e drak lligo ni ka avel o llive kai ka piau e nevi mol ande charoina e Devleki.

O Jesus phenel kai o Pedro ka phenel kai ni pinllarel le

²⁶ Kana von llilabie e salmura, lleletar kai o burdo e Maslinkengo.

²⁷ Ondaka o Jesus phenda lenge: Sa tumen ka jasaren tumaro pachape ande mande. Gia phenen o Pisipe: Ka mundarav e chobano, ta e bakre ka rispinpe.

²⁸ A kana me ka ustav katar o meripe, ka chidau tumen pale ande Galilea.

²⁹ O Pedro phenda leke: I te jasarena sa po pachape, me ni ka jasarav le.

³⁰ O Jesus phenda leke: Chachimaia phenav chuke kai mai anglal te basel o basno pale o duito, tu ka phene kai ni pinllare man trin droma.

³¹ A vou pale phenela leke: I te trubula te merav tuia, ni ka phenav kai ni pinllarav tut. Ta saurre phenena leke isto gola alava.

O Jesus molilpe ando Getsemani

³² Mapalal llele pe iek than kai ikhardol Jetsemani, ta o Jesus phenda pe disipulonenge: Besen kate, so me llau te moliv man.

³³ Ta inllarda e Pedro, e Santiago ta e Juane, ta avila leke but bari zalba.

³⁴ Ondaka o Jesus phenda lenge: Si ande mo zivoto iek zalba merimaki. Achen tumen kate, ta achen llungade.

³⁵ Ondaka o Jesus llelo mai angle, bangilo llik te thovel po chikat pe phuv, ta mangla e Devletar te na nakhel goia patnia.

³⁶ Ta kana molilape phenela: Abba, Dade, tu sa sai chere. Le mandar gaia buka cherki, a te na cherdol so me mangav, te cherdol so tu mange.

³⁷ Mapalal irisailo lende, ta malada len kai sovena, ondaka phenda e Pedroke: Simono, ¿sove? ¿nasti achilan llungado ni iek saiato?

³⁸ Achen llungade ta molintumen, te na peren ando zumadipe. Tumen mangen, a e esnaga inai la zor.

³⁹ Ondaka o Jesus pale llelo, ta molisailo isto gole alavenchar.

⁴⁰ Kana irisailo, malada pale kai e disipulura sovena, soke lenge akha phangliona lindratar. Ta ni llanena so ka phenen leke.

⁴¹ Kana avilo pale o trito drom, phenda lenge: ¿Pale inzon ta soven? Dosta, avilo o vreme kai o Chavo e Manuseko ka avel dino ande va e bilachenge.

⁴² Usten, aven, soke avel gua kai ka phukavel man.

Phanden e Jesuse

⁴³ O Jesus dela orba kana o Judas, iek katar e desudui disipulura, avilo bute llenenchar kai avena jarnienchar ta kastenchar. Von sea bichalde katar e mai preche popura, e gazda katar e kovacha e zakonoke, ta e phure.

⁴⁴ O Judas, gua kai phukavela le, phendaia lenge gia: Gole kai ka chumidau, gua si. Phanden le ta arakhen le te na nasel.

⁴⁵ Kana avilo o Judas llelo pasa o Jesus ta phenda leke: ¡Kovachi! Ta chumidia le.

⁴⁶ Ondaka istarde e Jesuse, ta inllarde le phanglo.

⁴⁷ A iek katar e llene kai sea kote, ikanda po jarni ta chinda o kan katar o sluga e mai bare popoko.

⁴⁸ Ondaka o Jesus puchla e llenen: ¿Soke avilen jarnienchar ta kastenchar te phanden man, sargo kana me sema iek kochkari?

⁴⁹ Suako llive sema maskar tumende ta sikavava ando cher e Devleko, ta nikada ni inllarden man phanglo. A sa gala ezgode nakhen te sai cherdol so si pisime ando Pisipe.

⁵⁰ Sa e disipulura mukle e Jesuse korkorre, ta nasle.

⁵¹ A iek lleno terno llala pala lende uchardo samo iekhe chitea. Gole llene istarde le,

⁵² a vou mukla o chiti ta naslo nango.

Chinen kris e Jesuseke

⁵³ Ondaka inllarde e Jesuse kai o mai baro popo, ta chidinaile sa e gazda e poponenge, ta e phure ta i e kovacha e zakonoke.

⁵⁴ O Pedro llelo pala le duratar llik andre ande bar katar o cher e mai bare popoko, ta achilo besindo e llenenchar kai arakhena o cher e Devleko, ta thodepe pasa e iag te lelpe lendar o sil.

⁵⁵ E gazda e poponenge ta sa e mai bari kris rodela varesavi dos ando Jesus te sai mundaren le, a ni malavena niso.

⁵⁶ Soke but llene ikanena bune pe lete, ta isto von kojadona ande pe orbe kai dena iek averea.

⁵⁷ Ondaka nesave llene ustile pe porrne ta dosarena le kojaimaia, ta phenena:

⁵⁸ Amen asundam le kai phenela: Me ka peravav gava cher e Devleko kai cherde e manusa, ta ande trin llive ka vazdau aver kai inai cherdo e manusendar.

⁵⁹ A gola kai dosarena e Jesuse nasti lacharena pe orbe maskar pete pe so phenena.

⁶⁰ Ondaka o mai baro popo ustilo po maskaral katar sa e llene, ta puchla e Jesuse: ¿Ni phene niso? ¿So si gava kai phenen tutar?

⁶¹ A o Jesus ni phenda niso. O mai baro popo puchla le pale ta phenda: ¿San tu o Mesias, o Chavo katar o Del o blagosime?

⁶² O Jesus phenda leke: Ea, me sem. Ta tumen ka dikhen sar o Chavo e Manuseko besel pe rig e chachi katar o Del kai si le sa e zor, ta ka dikhen le sar ka avel pe oblakura e milosoke.

⁶³ Ondaka o mai baro popo pharrada pe patave te sai llanen kai saia joliariko, ta phenda: Ni trubul amen ios te asuna avere llenen.

⁶⁴ Tumen asunden sar kusla e Devle gole alavenchar. ¿So phenen tumen? Sa phende kai saia dosalo ta kai saia te merel.

⁶⁵ Nesave llene thode te chungarden le, ta phandena leke akha ta chalavena le dumukhenchar ta phenena leke: ¡Apogodisar ko chalada tut! Ta gola kai arakhen o cher e Devleko chalade le pe leko mui.

O Pedro phenel kai ni pinllarel e Jesuse

⁶⁶ O Pedro saia tele ande bar, ta avili iek katar e sluge e mai bare popoke,

⁶⁷ ta kana dikhla e Pedro kai tatola pe iag, dikhla pe lete ta phenda leke: I tu llaia e Jesusea, gua lleno katar o Nazaret.

⁶⁸ O Pedro phenda: Iok, ta phenda: Ni pinllarav le, ta ni llanav savi orba de. Ta likisto avri po udar. Ondaka baslo iek basno

⁶⁹ E sluga pale dikhla e Pedro ta thoda te phenel e llenenge kai sea kote: Gava si iek lendar.

⁷⁰ A o Pedro pale phenda kai ni pinllarel e Jesuse. Mapalal, e llene kai sea kote pale phende e Pedroke: Chachimaia tu san iek lendar, soke i tu san katar e Galilea.

⁷¹ Ondaka o Pedro thoda te jal sovel ta phenela: ¡Me ni pinllarav gole llene kai tumen den leki orba!

⁷² Ondaka isto kote baslo pale o duito o basno, ta o Pedro diape golli kana o Jesus phendaia leke: Trin droma ka phene kai ni pinllare man, ta mapalal ka basel o basno pale o duito. Ta vou thoda te rovel.