Markos 11 - Biblia ande chib Romani

O Jesus del ando Jerusalem

¹ Kana avile pasa o Jerusalem, pasa e forura katar o Betfage ta e Betania, po burdo e Maslinkengo, o Jesus bichalda duien katar pe disipulura,

² ta phenda lenge: Llan ando forichi kai si anglal, ta kana ka aven ka malaven iek magarcho phanglo, kai niko ni likisto pe lete. Putaren le ta anen le.

³ A te puchla tumen vareko soke cheren gua, phenen leke kai trubul e Gazda, ta kai ka iril le oma.

⁴ Von llele, ta malade e magarcho phanglo avri po drom pasa iek udar, ta purtarde le.

⁵ Nesave llene kai sea kote phende lenge: ¿So cheren? ¿Soke putaren e magarcho?

⁶ Ondaka von phende isto gia sar phendaia lenge o Jesus. Ta mukle len te llantar.

⁷ Von inllarde e magarcho kai o Jesus, ta thode pe gertacha upral po magarcho ta o Jesus likisto upral.

⁸ Ta but llene inzarde pe gertacha po drom, a aver llene chinde krangura katar e kasta ta thode len po drom.

⁹ E llene kai llana anglal ta i e llene kai llana palal, thode te urkin: ¡Blagosime gua kai avel ando anav e Devleko!

¹⁰ ¡Blagosime e charoina kai avel, e charoina katar amaro dad o David! ¡Blagosime te avel o Del!

¹¹ O Jesus dia ando Jerusalem, ta i ando cher e Devleko dikhla pe suako rig ta mapalal llelotar e desuduie disipulonenchar ande Betania, soke lela te perel e riat.

O Jesus del armaia iekhe kaste simochinengo

¹² Thiarinako, kana likena katar e Betania, o Jesus bokhailo.

¹³ Dikhla duratar iek kas simochinengo kai saia le patra, ta avilo pase te dikhel dal saia le simochine, a malada samo e patra, soke ni saia o vreme e simochinengo.

¹⁴ Ondaka o Jesus phenda e kasteke: ¡Daboida te na jal niko nikada che simochine! Leke disipulura asunde so phenda.

O Jesus chistol o cher e Devleko

¹⁵ Kana avile ando Jerusalem, o Jesus dia ando cher e Devleko ta thoda te tradel sa e llenen kai chinena ta bichinena ta dia tele moia e stalia golenge kai pharruvena e love e suetoke, ta i e thana golenge kai bichinena e gulubura,

¹⁶ ta ni mukela nika te nakhel katar o cher e Devleko ezgodenchar,

¹⁷ Ta thodape te sikavel, ta phenela: Ando Pisipe phenel gia: Mo cher ka ikhardol cher e molimako sa e phuvienge a tumen cherden letar iek than kai gurudon e chorane.

¹⁸ A e gazda e poponenge ta e kovacha e zakonoke asunde e Jesuse ta thode te roden sar te mundaren le, pala e dar kai saia lenge letar, soke sa e llene chudisailea katar leko sikadipe.

¹⁹ Kana peli e riat o Jesus ta leke disipulura lleletar katar o foro.

O kas e simochinengo sukol

²⁰ Thiarinako rano, nakhle pasa o kas e simochinengo ta dikhle kai sukiloia sa llik leke zile.

²¹ Ondaka o Pedro diape golli, ta phenda e Jesuseke: Kovachi, dik, o kas kai dian le armaia, sukilo.

²² O Jesus phenda lenge: Pachan ando Del.

²³ Soke chachimaia phenav tumenge, kai varesavo lleno te phenela gale burdoke: Le tut kotar, ta chude tut ande mora, ta te pachala ande po lio kai gua sai avelpe, ta pachala kai so phenda ka cherdol, ondaka gia ka avelpe.

²⁴ Goleke phenav tumenge kai sogo tumen mangena ando molipe, pachan kai ia si tumenge dino, ta gia ka avelpe.

²⁵ Ta kana ka molintumen, ta te si tumen varesavi joli pe vareka, prostisaren le, te prostil i tumaro bilachipe tumaro Dad kai si ando miloso.

²⁶ Soke tumen te na prostisaren, ni tumaro Dad kai si ando miloso ni ka prostil tumenge tumaro bilachipe.

O gazdaripe e Jesuseko

²⁷ Mapalal katar gala ezgode irisaile ando Jerusalem. Ta kana o Jesus phirela ando cher e Devleko, avile lete e gazda e poponenge, e kovacha e zakonoke ta e phure,

²⁸ ta puchle le: ¿Save gazdarimaia chere gala ezgode? ¿Ta ko dia tut o gazdaripe te cherele?

²⁹ O Jesus phenda lenge: I me ka puchau tumen iek ezgoda: Ta te phenden mange, i me ka phenav tumenge save gazdarimaia cherav gala ezgode.

³⁰ ¿Ko bichalda e Juane te kristil, o Del, o e manusa? phenen mange.

³¹ Von thode te den orba iek averea ta phenena: Te phendam kai bichalda le o Del, vou ka phenel: ¿A soke ni pachaien le?

³² ¿A sar ka phena kai bichalde le e manusa? Von phenena gua soke darana katar o foro, soke sa pachana kai o Juan saia iek profeta.

³³ Goleke von phende e Jesuseke: Ni llana. Ondaka o Jesus phenda lenge: Ni me ni ka phenav tumenge save gazdarimaia cherav gala ezgode.