Markos 10 - Biblia ande chib Romani

O Jesus sikavel te sai putaren o drom kana mukenpe

¹ O Jesus likisto katar o Kafarnaum, ta llelo karing e phuv katar e Judea ta pe phuv kai si pe o goia rig katar o Jordan. Ta kote pale chidinailo o sueto te asunel le, ta sikavela len sar cherela suako drom.

² Ondaka nesave fariseura avile pasa o Jesus ta te zumaven le puchle le dal o rrom sai mukelpe katar pi rromi.

³ Vou phenda lenge: ¿So phenda o Moises te cheren?

⁴ Von phende: O Moises mukla te chinen kris, ta gia te del la iek lil kai mukelpe latar.

⁵ Ondaka o Jesus phenda lenge: Soke tumaro lio si zuralo tumenge pisisarda gua alav.

⁶ A kana o Del iakom cherela e sueto cherda len murus ta diskinia.

⁷ Pala gaia ezgoda o murus ka mukel pe dade ta pe da te avel pe rromiaia,

⁸ ta e dui ka aven sargo iek manus. Goleke von inai dui, akana von si iek.

⁹ Goleke o manus morabi te na fulavel so o Del thoda ande iek than.

¹⁰ Kana avile ando cher, e disipulura pale puchle le katar goia orba.

¹¹ Ondaka o Jesus phenda lenge: Gua kai mukelpe katar pi rromi ta zinilpe averiaia, cherel kurvaluko golake kai saia leki rromi mai anglal,

¹² a e rromi te mukel pe rrome ta te zinilpe averea, i voi cherel kurvaluko.

O Jesus blagosil e minonen

¹³ Ondaka ande kai o Jesus nesave minonen te thovel pe va pe lengo soro ta te blagosil len, a e disipulura die pe llene kai anena e minonen.

¹⁴ Kana o Jesus dikhla so cherena, jolailo ta phenda lenge: Muken e minonen te aven mande, ta na achaven len, soke e charoina e Devleki si golengi kai si sargo minone.

¹⁵ Chachimaia phenav tumenge, kai kogo ni lel e charoina e Devleki sargo iek minono, ni ka del andre.

¹⁶ Ta lia e mimonen ande pe va ta thoda upral pe lende pe va ta blagosisarda len.

Iek terno barvalo del orba e Jesusea

¹⁷ Kana o Jesus llalatar kotar, avilo lete iek lleno prastindo ta dia changa angla le ta puchla le: Kovachi lachea, ¿so morabi te cherav te lau o zivoto ostade?

¹⁸ O Jesus phenda leke: ¿Soke ikhare man lacho? Samo iek si lacho, o Del.

¹⁹ Tu llane e zakonura: Na mundar, na cher kurvaluko, na chor, na ikan bune, na kojau, de liubao che dade ta che da.

²⁰ Gua lleno phenda leke gia: Kovachi, sa gola ezgode cherdemlen sar kana sema ternorro.

²¹ O Jesus dikhla pe lete volimaia, ta phenda leke: Iek ezgoda trubul tut te chere: Lla, ta bichin sa so si tut ta dele e chorrenge. Gia ka avel tut barvalipe ando miloso. Ondaka aide ta lla pala ma.

²² Gua manus tristosailo kana asunda gaia orba ta llelotar zalbaia, soke saia but barvalo.

²³ O Jesus ondaka dikhla truialpe, ta phenda pe disipulonenge: ¡Gia trudno ka avel e barvalenge te den ande charoina e Devleki!

²⁴ Gala alava cherde te chudinpe e disipulura, a o Jesus pale phenda lenge: Chavalen, ¡gia trudno si te den ande charoina e Devleki sa gola kai uzdinpe ande love!

²⁵ Mai lesno si iekhe devake te nakhel katar e iak iekhe suviaki, neko te del iek barvalo ande charoina e Devleki.

²⁶ Kana asunde le, chudisaile ios mai but, ta puchena iek avere: ¿A ko ka avel braduime?

²⁷ O Jesus dikhla pe lende ta phenda lenge: E manusa nasti cheren gaia ezgoda, a o Del sai, soke o Del sa sai cherel.

²⁸ O Pedro thoda te phenel e Jesuseke: Amen muklam sa so saia amen, ta llelam pala tu.

²⁹ O Jesus phenda lenge: Chachimaia phenav tumenge kai varesavo lleno kai pala ma ta pala e lachi viasta mukla cher, o phlalen, o phiorren, o dea, o dade, o chaurren, o phuvia,

³⁰ ka len akana ande gava zivoto stotina droma mai but chera, phlal, phiorra, dea, chaurre ta phuvia, makar nakhena patnia pe dusmanonenchar. Ta ando zivoto kai si te avel ka len o zivoto ostade.

³¹ A but llene kai akana si mai anglal, ka aven e mai palal, a but llene kai akana si mai palal, ka aven e mai anglal.

Pale o trito o Jesus phenel kai si te merel

³² E disipulura phirena karing o Jerusalem, ta o Jesus phirela angla lende. Lenge saia chudo, ta ogola kai avena palal darana. O Jesus pale ikharda pe iek rig e desuduie disipulonen, ta thoda te phenel lenge so saia te nakhel vou ta phenda gia:

³³ Gia sar tumen dikhen, akana lla ando Jerusalem, kote kai o Chavo e Manuseko ka avel dino kai e gazda e poponenge ta kai e kovacha e zakonoke, ta ka chinaven leke o meripe ta ka den le kai e llene kai inai judiura.

³⁴ Ka maren letar espurnia, ka chungarden le, ka chalaven le ta ka mundaren le. A pala e trin llive ka ustel katar o meripe.

O Jesus del orba e Santiagoia ta e Juanea

³⁵ O Santiago ta o Juan, chave e Zebedeoke, avile pasa o Jesus ta phende leke: Kovachi, manga tutar te chere amenge o sebapi kai ka manga tutar.

³⁶ Vou phenda lenge: ¿So mangen te cherav tumenge?

³⁷ Von phende leke: Cher te besa ande chi charoina e bari iek pe chi rig e chachi ta aver pe cho estingo.

³⁸ Ondaka o Jesus phenda lenge: Tumen ni llanen so mangen. ¿Sai pien o cherkipe kai si te piau me, ta te len o kristope kai si te lau me?

³⁹ Von phende: Sai. O Jesus phenda lenge: Tumen ka pien gava cherkipe, ta ka len o kristope kai me ka lau

⁴⁰ a te besen pe mi chachi ta pe mo estingo inai ande mo va te dav le, gua ka delpe e llenenge kai si lachardo te delpe.

⁴¹ Kana ogola des disipulura asunde goia orba, jolaile e Santiagoia ta e Juanea

⁴² A o Jesus ikharda len, ta phenda lenge: Tumen llanen kai maskar e llene kai ni pachan ando Del si gazda kai misin kai sai gazdarin silnomaia pe llene kai zivin ande gola phuvia ta e bare cheren sogo mangen lenchar.

⁴³ A maskar tumende nasti avelpe gia. A ko mangela te cherdol baro maskar tumende, morabi te avel tumaro sluga,

⁴⁴ a kogo mangela te avel mai anglal maskar tumende, morabi te avel sluga saurengo.

⁴⁵ Soke llik o Chavo e Manuseko ni avilo te radin leke, vou avilo te radil, ta te del po zivoto, ta pe zivotoia te sai pochinel amen.

O Jesus sastarel iekhe korre kai ikhardola Bartimeo

⁴⁶ O Jesus ta leke disipulura avile ando Jeriko. Ta kana o Jesus likela katar gua foro pe disipulonenchar ta bute llenenchar, iek lleno kai mangela esmola vou saia korro ta ikhardola Bartimeo chavo e Timeoko, ta besela pasa o drom.

⁴⁷ Kana asunda kai avela o Jesus o Nazareno, o korro thoda te urkil: ¡Jesus, Chavo e Davideko, te avel chuke zalba mandar!

⁴⁸ A but llene dena po korro te achel, a vou urkila ios mai zurale: ¡Chavo e Davideko, te avel chuke zalba mandar!

⁴⁹ Ondaka o Jesus achilo, ta phenda: Ikharen le. Ikharde e korre ta phende leke: Cher chuke zor, uste, ikharel tut.

⁵⁰ Ondaka o korro chudia pe patave ta, jutlo ta llelo pasa o Jesus.

⁵¹ O Jesus puchla le: ¿So mange te cherav pala tu? O korro phenda leke: Kovachi, mangav te dikhav.

⁵² O Jesus phenda leke: Sai llatar, pala cho pachape avilan sastardo. Ondaka o korro dikhla, ta llelo e dromea pala o Jesus.