Markos 1 - Biblia ande chib Romani

O Juan gua kai kristil

¹ Gia si sar lleli angle e lachi viasta e Jesukristoki, e Devleko Chavo.

² Gia sar si pisime ando lil katar o profeta o Isaias: Me vichalav me profeta angla tu, te lacharel chuke o drom.

³ Iek lleno urkil po pusto: Lacharen o drom e Gazdako, putaren leke iek drom orta.

⁴ Ande gola llivesa o Juan gua kai kristila, sikadilo po pusto ta phenela e llenenge kai saia te irinpe katar pe bilache droma ta te kristinpe, te sai avel prostime lengo bilachipe.

⁵ Ta avena lete sa e llene katar e phuv e Judeaki ta katar o Jerusalem te asunen le, ta phenena sa po bilachipe, ta o Juan kristila len ando pai katar e len kai ikhardol Jordan.

⁶ E Juaneke patave sea cherde katar e bal e devake, ta saia le iek kavisi morchako truial katar leke zea, ta jala langoste ta aullin kai malavela pe burdura.

⁷ Ta phenela: Mapalal mandar avel iek kai si mai zuralo neko me, kai ni sem lacho ni te bangivav te putarav o kavisi katar leke sinele.

⁸ Me kristisardem tumen e paiea, a vou ka kristil tumen e Santone Duoia.

O kristope e Jesuseko

⁹ Ande gola llivesa, o Jesus avilo katar o Nazaret kai achela ande phuv katar e Galilea, ta o Juan kristisarda le ando Jordan.

¹⁰ Ta kana likisto katar o pai, o Jesus dikhla sar putailo o miloso, ta dikhla kai o Duo fuliela upral pe lete sargo iek gulubo.

¹¹ Ta asundilo iek avazi katar o miloso kai phenela: Tu san mo Chavo gole kai voliv, ande tu si man veselia.

O Jesus po pusto

¹² Mapalal o Duo e Devleko inllarda e Jesuse po pusto.

¹³ Kote achilo saranda llive, ta o Satanas zumavela le, ta o Jesus saia maskar e zivirinie dive, ta e suechura arakhena le.

O Jesus phenel e lachi viasta ande Galilea

¹⁴ Kana phangle e Juane, o Jesus llelotar ande Galilea ta phenela e lachi viasta katar e Devleki charoina,

¹⁵ ta phenela: Avilo o vreme ta e charoina e Devleki si pase. Irin tumen karing o Del ta pachan ande lachi viasta.

O Jesus pasa e mora katar e Galilea

¹⁶ O Jesus nakhela pasa e mora katar e Galilea ta dikhla e Simono ta leke phlale e Andrese. Von sea macharia ta chudena e mreza ande mora.

¹⁷ Ta o Jesus phenda lenge: Aven pala ma ta ka cherav tumen macharia manusenge.

¹⁸ Ondaka von mukle isto kote pe mreze, ta lleletar lea.

¹⁹ O Jesus llelo mai angle ta dikhla e Santiago ta e Juane chave e Zebedeoke, von sea ande iek llimia ta lacharena pe mreze.

²⁰ Kana o Jesus ikharda len, von mukle ande llimia pe dade e llenenchar kai radina leke, ta llele pala le.

Iek lleno kai saia ande le iek duo bilacho

²¹ O Jesus ta leke disipulura avile ando Kafarnaum, ta ando llive sabado o Jesus dia ande khanlliri e judionengi ta sikavela.

²² E llene chudinape sar sikavela len, soke dela lenge orba gazdarimaia, a na sargo e kovacha e zakonoke.

²³ Ande lengi khanlliri saia iek murus kai saia ande le iek duo bilacho kai urkila ta phenela:

²⁴ ¡Ioi! ¿So si chuke amenchar Jesus katar o Nazaret? ¿Avilan te zatrisare amen? me llanav ko san, tu san o Santo e Devleko.

²⁵ A o Jesus silnosailo pe lete ta phenda leke: ¡Phande cho mui ta like letar!

²⁶ Ondaka o duo bilacho, dermosarda gole llene, ta urkisarda bare avazea, ta o duo bilacho likisto letar.

²⁷ Gia baro saia e llenengo chudo kai denape orba, ta phenena: ¿So si gava? ¿Savo nevipe sikavel kai gazdaril llik pe duura bilache, ta kanden le?

²⁸ Ta but oma cherdilo pinllardo ande sa e phuv katar e Galilea.

O Jesus ta e sasui e Simonoki

²⁹ Kana likiste katar e khanlliri e judionengi, o Jesus llelo e Santiagoia ta e Juanea kai o cher e Simonoko ta e Andreseko.

³⁰ Ta e sasui e Simonoki phabola ande postelia nasualimatar. Ta phende e Jesuseke so saia lake.

³¹ Ondaka o Jesus avilo pasa la, istarda lako va, ta cherda la te ustel. Ta isto kote liape latar o nasualipe, ta voi thoda te radil lenge.

O Jesus sastarel bute llenen

³² Kana peli e riat ande sa e nasualen kai o Jesus, ta i golen kai sea ande lende llavolura,

³³ ta sa o foro chidinailo po udar e chereko.

³⁴ Ta sastarda bute llenen kai sea nasuale katar but muke, ta ikanda but llavolura e llenendar, ta ni mukla len te den orba soke e duura pinllarena le.

O Jesus sikavel ande khanllira e judionenge

³⁵ Thiarinako rano, ande kale zore, o Jesus ustilo ta likisto katar o foro, ta llelo te molilpe korkorre pe iek than.

³⁶ O Simono ta e llene kai sea lea llele te roden le.

³⁷ Ta kana malade le phende leke: Sa roden tut.

³⁸ Vou phenda lenge: Aven kai aver forichura kai si pase te phenav i kote e lachi viasta, soke goleke avilem.

³⁹ Ta o Jesus phirda sa e Galilea, ta phenela e lachi viasta ande khanllira e judionenge pe suako rig, ta tradela e llavolonen.

O Jesus sastarel iekhe llene kai saia pe lete e lepra

⁴⁰ Avilo lete iek leproso ta thodape pe pe changa, ta phenda leke: Te mangea, sai sastare man katar mo nasualipe.

⁴¹ E Jesuseke avila but zalba letar, dodisarda le pe vastea, ta phenda leke: Mangav. ¡Sastiv!

⁴² Ta kana vou phenda gua, isto kote sastilo.

⁴³ Ondaka o Jesus phenda leke so te cherel, ta kana llalatar, o Jesus phenda leke:

⁴⁴ Na phen nikake so avilape tuia, lla ta sikado e popoke, ta de kurbano pala cho sastipe gia sar phenda o Moises te cheren, te sai dikhen e popura kai sastilan.

⁴⁵ A samo llelotar, thoda te phenel saurrenge so vou nakhla, goleke o Jesus nasti dela ande forura, ta achela avri ande thana puste, ta avena lete llene katar suako rig.