Лукатар 9 - Biblia ande chib Romani

O Jesus bichalel e disipulonen te phenen e charoina e Devleki

¹ O Jesus chidia pe desuduie disipulonen, ta dia len zor ta o gazdaripe te traden suako llavolonen ta i te sastaren suako nasualipe.

² Bichalda len te phenen e lachi viasta katar e charoina e Devleki ta te sastaren e nasualen.

³ Ta phenda lenge: Na inllaren niso e dromeke. Ni rovli, ni galavo ni marrno ni love, ni premena.

⁴ Kana ka aven ande varesavo cher, achen kote lligo ni ka llantar katar gua than.

⁵ A ande varesavo foro te na mukle tumen te achen, liken letar ta chinosaren o prajo katar tumare porrne, te dikhen kai ni avila tumenge drago so cherde tumenchar.

⁶ Von likiste ta llele kai sa e forichura, ta phenena e lachi viasta ta sastarena e nasualen.

O Erodes ni llanel ko si o Jesus

⁷ O charo o Erodes asunda kai dena orba katar sa so cherela o Jesus ta ni llanela so ka mislil, soke nesave llene phenena kai o Juan ustiloia katar o meripe,

⁸ aver llene phenena kai avilo o profeta o Elias, a aver llene phenena kai saia iek katar e purane poraukura kai ustiloia katar o meripe.

⁹ A o Erodes phenda: Isto me bichaldem te chinen e Juaneko soro. ¿Ko si gava lleno? Goleke o Erodes mangela te dikhel e Jesuse.

O Jesus del te jal iekhe bare sueto

¹⁰ Kana e apostolura irisaile ta phende e Jesuseke sa so von cherde. Vou, ikharda len pe iek rig, inllarda len ande iek foro kai ikhardol Betsaida.

¹¹ A kana e llene llangle, llele pala le. Ta o Jesus avila lenchar pachivalo ta dia lenge orba katar e charoina e Devleki ta sastarda e nasualen.

¹² Kana lela te perel e riat, avile e desudui disipulura pasa o Jesus ta phende leke: Phen e llenenge te llantar, te roden kai te nakhen e riat ta te roden so te jan ande forichura ta pe droma kai si pase, soke kate inai niso.

¹³ O Jesus phenda lenge: Den len tumen te jan: Von phende leke: Samo panch marrne ta dui mache si amen, a te jan sa gala llene morabi te lla te china.

¹⁴ A kote sea preko panch milie murusa. A o Jesus phenda pe disipulonenge: Thoven len te besen po pinda llene.

¹⁵ Von cherde so phenda o Jesus, ta cherde te besen sa e llene.

¹⁶ Ta o Jesus lia ande pe va e panch marrne ta e dui mache, dikhla ando miloso, molisailo pe lende, phagla len ta dia len kai pe disipulura te fulaven len maskar e llene.

¹⁷ Saurre jale ta chalile, ta chidie ande desudui kotariche e kotora kai achile.

O Pedro phenel kai o Jesus si o Mesias

¹⁸ Iek llive kana o Jesus molilape korkorre ta leke disipulura sea lea, puchla len: ¿Ko phenen e llene kai sem me?

¹⁹ Von phende: Nesave llene phenen kai tu san o Juan gua kai kristil, aver llene phenen kai san o Elias, a aver llene phenen kai san iek katar e purane poraukura, kai ustilo katar o meripe.

²⁰ A tumen, ¿ko phenen kai sem me? O Pedro phenda leke: Tu san o Mesias e Devleko.

O Jesus phenel kai si te merel

²¹ A o Jesus mangla lendar te na phenen gua nikake.

²² Ta phenda lenge: O Chavo e Manuseko si te nakhel but patnia, ta e phure, ta e gazda e poponenge ta e kovacha e zakonoke ni ka mangen le. Ta ka mundaren le, a pala e trin llive ka ustel katar o meripe.

²³ Mapalal phenda saurrenge: Vareko te mangela te avel mo disipulo, si te bristarelpe vou petar, ta te inllarel po krusto suako llive ta te llal pala ma.

²⁴ Soke o lleno kai mangela te braduil po zivoto, ka jasarel le. A o lleno kai jasarel po zivoto pala ma, ka braduil le.

²⁵ ¿So blazil e manuseke te dobil sogo si po sueto, ta te jasaol ta te zatril isto vou pe?

²⁶ Vareko te avel leke lallao mandar ta katar me alava, i o Chavo e Manuseko ka avel leke lallao letar kana ka avel ande po blagosipe ta ando blagosipe leke Dadeko ta e santone suechonengo.

²⁷ Chachimaia phenav tumenge kai nesave llene kai si kate, mai anglal te meren ka dikhen e charoina e Devleki.

E Jesuseki esnaga cherdol aver

²⁸ Nakhle preko ojto llive katar goia orba, ta o Jesus likisto pe iek burdo te molilpe, llelo e Pedroia, e Santiagoia ta e Juanea.

²⁹ Kana molilape, leko mui cherdilo aver, ta leke patave cherdile but parrne ta klichina,

³⁰ ta dui llene dena orba lea, gola sea o Moises ta o Elias,

³¹ ta truial lendar saia iek villelo blagosime ta phenena kai o Jesus ka llaltar katar gava sueto, ta goia ezgoda saia te avelpe ando Jerusalem.

³² O Pedro ta leke amal saia lenge but lindri, a achile llungade, ta dikhle o blagosipe e Jesuseko ta e duie llenen kai sea lea.

³³ Kana gala llene llanatar katar o Jesus, o Pedro phenda leke: Kovachi, ¡Gia sukar kai sam kate! Ka chera trin cherorra e patrenchar: Iek chuke, aver e Moiseseke ta aver e Eliaseke. A o Pedro dela orba ta ni llanela so phenel.

³⁴ Kana dela orba iek oblako ucharda len, ta kana dikhle kai i von sea andre ando oblako daraile.

³⁵ Ondaka katar o oblako likisto iek avazi kai phenda: Gava si mo Chavo, kai me esvirisardem: Asunen le.

³⁶ Kana asundilo gua avazi, o Jesus achilo korkorre. A von mukle maskar pete sa gala ezgode, ta ande gola llivesa ni phende nikake so von dikhlea.

O Jesus sastarel iekhe terne kai saia ande le iek duo bilacho

³⁷ Thiarinako, kana fuliste katar o burdo, but sueto likisto te maladol e Jesusea.

³⁸ Ta iek manus maskar e llene bare avazea phenda: Kovachi, me moliv man chuke, dik pe mo chaurro kai si o edino kai si man,

³⁹ iek duo istarel le ta cherel le te urkil ta te perel bengendar ta te chudel katar po mui o chungar, chalavel le ta ni kamel mukel le.

⁴⁰ Manglem but katar che disipulura te traden letar gole duo, a von nasti cherde le.

⁴¹ O Jesus phenda: ¡Ioi manusalen kai inai tumen pachape ta sen bilache! ¿Pe gachin ios si te avav tumenchar ta te terpiu tumen? An kate che chaurre.

⁴² Kana o terno avela pasa le, o llavolo perada le pe phuv ta cherda pale te perel bengendar, a o Jesus dia po duo bilacho, sastarda e terne ta diale kai leko dad.

⁴³ Ta sa chudisaile katar e Devleki zor. Kana sa chudinape katar so cherela o Jesus, vou phenda pe disipulonenge:

O Jesus pale phenel kai ka merel

⁴⁴ Asunen so ka phenav ta na bristaren tumen: O Chavo e Manuseko si te avel dino ande va e manusenge.

⁴⁵ A von ni acharena so phenela lenge, soke ni ios ni putailoa lengo mislo te acharen le, ta darana te mangen letar te phenel lenge so saia gua.

¿Ko si o mai baro?

⁴⁶ Ondaka e disipulura thode te den pe orba te llanen ko ka avel o mai baro maskar lende.

⁴⁷ O Jesus kana thoda sama so mislinape, lia pasa pe iekhe minone

⁴⁸ ta phenda: Ko lela gale minone ande mo anav, lel man. Ta ko lel man lel i gole kai bichalda man. Goleke o mai minono tumendar, gua si o mai baro.

Ko ni marelpe amenchar si amenchar

⁴⁹ O Juan phenda leke: Kovachi, dikhlam iekhe llene kai tradela e llavolonen ande cho anav, ta amen achavaia le, soke gua lleno inai iek amarendar.

⁵⁰ O Jesus phenda leke: Na achaven le, soke ko ni marelpe amenchar, si amenchar.

O Jesus del po Santiago ta po Juan

⁵¹ Kana avela pase o vreme kai o Jesus saia te llal ando miloso, llelo karing o Jerusalem tromanimaia.

⁵² Ta bichalda llenen te llan ande iek forichi katar e Samaria samo te roden kai te nakhel e riat.

⁵³ A e Samaritanura ni kamle te avel lende soke llanena kai llala karing o Jerusalem.

⁵⁴ Kana phende leke gua o Santiago ta o Juan kai sea leke disipulura dikhle so nakhlaia, phende leke: Gazda. ¿Mange te phene te fuliel iag katar o miloso, ta te mundarel len gia sar cherda o Elias?

⁵⁵ A o Jesus boldinailo ta dia pe lende.

⁵⁶ Mapalal llele ande aver forichi.

Te lla pala o Jesus

⁵⁷ Kana llana e dromea, iek lleno phenda e Jesuseke: Gazda, mangav te llau pala tu kaigo te llaia.

⁵⁸ O Jesus phenda leke: E lisiche si len kai te gurudon, ta i e chiriklia e milosoke si len kuibura, a o Chavo e Manuseko inai le kai te thovel po soro.

⁵⁹ O Jesus phenda avereke: Aide pala ma. A vou phenda leke: Gazda, muk man mai anglal te prajou me dade.

⁶⁰ O Jesus phenda leke: Muk e llenen kai si mule te prajon pire mulen, a tu lla ta de orba katar e charoina e Devleki.

⁶¹ Aver lleno phenda leke: Gazda, mangav te llau pala tu, muk te llau mai anglal kai mi familia te phenav lenge kai ka llautar.

⁶² O Jesus phenda leke: Gua kai lel o kas te putarel lea e phuv ta dikhel pala pe, inai letar e charoina e Devleki.