Лукатар 8 - Biblia ande chib Romani

E diskinie kai pomozin e Jesuse

¹ Mapalal, o Jesus llelo ande but forura ta forichura minone ta phenela e lachi viasta katar e charoina e Devleki. E desudui apostolura llana lea,

² ta i nesave diskinie kai vou sastardaia katar e duura bilache ta katar o nasualipe. Lenchar llala e Maria, kai phenena lake Magdalena,

³ ta i e Juana, kai saia pala o Kusa, kai radila e Erodeseke. Ta e Susana, ta aver but diskinie kai pomozina le e lovenchar kai saia len.

E paramichi katar o simichari

⁴ But llene likiste katar e forura te dikhen e Jesuse, ta chidiniaona but llene. Ondaka phenda lenge gaia paramichi:

⁵ Iek simichari llelo te thovel e simiche ande phuv. Ta kana thovela e simiche, nesave simiche peletar po drom, ta ustadelen ta jalelen e chiriklia.

⁶ Nesave peletar maskar e barra. Ta kana lie te barion, sukile soke ni saia len pai.

⁷ Aver simiche peletar maskar e karrne. Ta bariona lenchar, ta e karrne tasade len.

⁸ A nesave peletar pe lachi phuv ta barile, ta die petar but lliu, stotina katar iek. Gava phenda o Jesus ando baro avazi: ¡Ka si len kan te asunen!

⁹ E disipulura puchle e Jesuse so mangela te phenel gole paramichaia.

¹⁰ Vou phenda lenge: Tumenge sikadol so si gurudino katar e charoina e Devleki, a ogole llenenge dav orba ande paramiche, gia mai te dikhen, ni ka dikhen, ta mai te asunen, ni ka acharen.

O Jesus sikavel lenge so phenel e paramichi

¹¹ Gava si so phenel e paramichi: E simicha si o alav e Devleko.

¹² A e simiche kai peletar po drom si e llene kai asunen o alav, a avel o llavolo ta ikanel o alav katar lengo lio te na pachan ta te na braduinpe.

¹³ E simicha kai peli maskar e barra si sargo gola llene kai asunen e lachi viasta ta len la veselimaia, a inai len but zile. Pachan nesavo vreme, a kana avel o zumadipe jasaon.

¹⁴ E simiche kai peletar maskar e karrne si e llene kai asunen, a sa poloke muken te tason pala e brige, o barvalipe ta o lachipe e zivotoko, ta ni resen te den septelie.

¹⁵ A e simiche kai peletar pe lachi phuv, si e llene kai iekhe lache liea mangen te asunen ta cheren so phenel o alav ta llan orta, ta den petar lache septelie.

E paramichi e memeliaki

¹⁶ Niko ni phaberel iek memeli te uchare la varesoia o te thovel la telal tala o kerveto, kai morabi te thodol si upre te kletosarel, ta gola kai ka den andre ka dikhen o villelo.

¹⁷ Isto gia, sogo si uchardo ka sikadol, ta sogo si gurudino, ka avel pinllardo ta ka sikadol.

¹⁸ Goleke, asunen, soke gole kai si le ka avel le dino mai but, a gole kai inai le, so mislil kai si le ka avel letar ikando.

E dei ta e phlal e Jesuseke

¹⁹ E dei ta e phlal e Jesuseke llele kote kai vou saia, a nasti avile pasa le soke sea but llene.

²⁰ Vareko phenda e Jesuseke: Chi dei ta che phlal etalen avri ta mangen te dikhen tut.

²¹ Vou phenda: Gola kai asunen ta cheren so phenen e Devleke alava, gola si mi dei ta me phlal.

O Jesus achavel o bursin

²² Iek llive o Jesus likisto ande iek llimia pe disipulonenchar, ta phenda lenge: Aven pe o goia rig e paieki. Ta lleletar,

²³ ta kana nakhena o pai, o Jesus sovtotar. Ta avilo iek baro bursin po pai, ta o pai dela andre ande llimia ta e disipulura mislina kai ka tason.

²⁴ Ondaka llele te llungaven e Jesuse, ta phenena: ¡Kovachi! ¡Kovachi! ¡Ka tasiva! O Jesus ustilo ta dia pe balav ta pe valura, ta sa achilo esmiro.

²⁵ Mapalal phenda e disipulonenge: ¿A tumaro pachape kai talo? A von, daraile ta chudinape, ta phenena iek avereke: ¿Ko si gava lleno, kai del pe balav ta po pai, ta kanden le?

Iek lleno katar e Gerasa kai saia ande le llavolura

²⁶ Avile ando foro katar e Gerasa, kai si pe o goia rig e paieki, angla e Galilea.

²⁷ Kana o Jesus fulisto pe phuv, likisto katar o foro iek lleno kai ande le sea llavolura, ta avilo pasa le. Cherela but vreme kai gua lleno llala bi patavengo ta ni zivila ande iek cher, vou zivila maskar e limoria.

²⁸ Kana dikhla e Jesuse, pelotar pe pe changa angla le, ta urkila: ¡Na amisao manchar, Jesus, Chavo katar o Del e milosoko! ¡Mangav tutar te na pati man!

²⁹ Vou phenda gua soke o Jesus phendaia e bilache duoke te likel letar. A but droma o llavolo gazdarisardaia pe gua lleno a llene phandena leke va ta i leke porrne lanchonenchar te istaren le, a vou chinela e lanchura ta o llavolo cherela le te nasel ta te llal pe iek thana puste.

³⁰ O Jesus puchla le: ¿Sar ikhardo? Ta vou phenda: Mo anav si Lejion. Vou phenda gua soke sea but e llavolura kai diea ande le,

³¹ ta mangle letar te na chudel len ande bari jar

³² Sar sea but bale kai jana po burdo, e duura mangle letar te den ande gola bale ta o Jesus mukla len.

³³ Ondaka e llavolura likiste katar gua lleno ta die ande bale, ta e bale prastie katar o burdo tele llik kai o pai, ta kote tasile.

³⁴ E llene kai arakhena e balen, kana dikhle so nakhla kote, nasle kotar ta llele ando foro ta ando vos ta phende sa so nakhle.

³⁵ E llene likiste avri te dikhen so saia. Ta kana avile kote kai saia o Jesus, dikhle kai besela pasa e Jesuseke porrne o lleno kai likistea letar e llavolura, furiado ta ande pi golli. Ta daraile.

³⁶ Ta e llene kai dikhlea so nakhlaia, phende sa e llenenge sar sastiloia o lleno kai saia ande le e llavolura.

³⁷ Ondaka sa e llene katar e Gerasa mangle katar o Jesus te llaltar kotar, soke darana but. Ondaka o Jesus likisto ande llimia ta llelotar.

³⁸ O lleno kai likistea letar e llavolura mangla letar te llal lea, a o Jesus phenda leke te achel, ta phenda leke:

³⁹ Lla kai cho cher ta phen sa so cherda o Del pala tu. Gua manus llelo ta phenda sa e foroke so cherda o Jesus pala le.

E diskinia nasuali ta e chorri e Jairoki

⁴⁰ Kana o Jesus irisailo pe o goia rig e paieki, e llene sea pachivale lea ta vesele soke sa aduricharena le.

⁴¹ Ondaka avilo iek lleno kai ikhardola Jairo, kai saia gazda katar e khanlliri e judionengi. Gava lleno dia changa kai e porrne e Jesuseke ta mangla letar te llal kai leko cher,

⁴² soke leki edini chorri desuduie bursengi saia po meripe. Ta kana o Jesus llala, but sueto kai llala pala lete chidinailo truial lete ta chichidena le.

⁴³ Maskar e llene saia iek diskinia kai cherela desudui burs kai saia nasuali ta peravela rat, ta sa pe love diaialen ande doktoria, ta ni iek katar gola doktoria nasti sastarda la.

⁴⁴ Gaia diskinia avili pase pala o Jesus ta dodisarda leko gertachi, ta isto kote o rat achilo.

⁴⁵ Ondaka o Jesus puchla: ¿Ko dodisarda man? Ta sar niko ni phenela kai dodisarda le, o Pedro phenda: Kovachi, e llene chichiden tut ta espiden tut katar suako rig.

⁴⁶ A o Jesus pale phenda: Vareko dodisarda man, soke achardem kai likista mandar zor.

⁴⁷ Kana e diskinia dikhla kai nasti gurudola, izdrala ta lleli te del changa kai e Jesuseke porrne. Ta phenda leke angla sa e llene soke dodisarda le, ta sar sastili isto kote.

⁴⁸ O Jesus phenda lake: Chorrie, pala cho pachape sastilan. Llatar esmiro.

⁴⁹ Ta kana o Jesus dela orba, avilo iek lleno bichaldo ta phenda e gazdake katar e khanlliri e judionengi: Chi chorri muli. Na joliar ios e Kovache.

⁵⁰ A o Jesus asunda le ta phenda leke: Na dara samo pacha, ta chi chorri ka braduilpe.

⁵¹ Kana avilo kai o cher, ni mukla te del andre nika samo e Pedro, e Santiago ta e Juane, ta die andre lenchar o dad ta e dei e minonake.

⁵² Sa rovena ta kukina cheres e minoni, a o Jesus phenda lenge: Na roven, e chorri inai muli, voi sovel.

⁵³ Sa asaie letar, soke llanena kai e minoni mulia.

⁵⁴ Ondaka o Jesus istarda lako va ta phenda zurale: ¡Chorrie, uste!

⁵⁵ Ta voi zivisarda pale, ta isto kote ustili. Ta o Jesus phenda te den la te jal.

⁵⁶ Lako dad ta laki dei chudisaile but, a o Jesus phenda lenge te na phenen nikake so nakhla.