Лукатар 7 - Biblia ande chib Romani

O Jesus sastarel iekhe sudoko sluga

¹ Kana o Jesus dia orba e llenenge, llelo ando Kafarnaum.

² Ande gua foro zivila iek sudo rromano kai saia le iek sluga kai vou volila but, ta saia nasualo po meripe.

³ Kana o sudo asunda kai dena e Jesuseki orba, bichalda nesave phuren katar e judiura te molinpe leke te llal te sastarel leke sluga.

⁴ Von llele kai o Jesus ta molisaile leke but ta phenena: Gale sudoke blazil te pomozi le,

⁵ soke volil amare phuvia ta cherda amenge iek khanlliri.

⁶ O Jesus llelo lenchar, ta kana sea pasa o cher, o sudo bichalda nesave amalen te phenen leke: Gazda, na brigisao, soke ni sem lacho te de ande mo cher.

⁷ Ni kamlem ni te avav te maladivav tuia. Samo phen te sastol mo sluga.

⁸ Soke i me sem manus kai si man zor, ta si tala mo va boñikura, ta phenav goleke: Lla, ta vou llal, a ogoleke: Aide, ta vou avel. Ta kana me phenav me slugake: Cher gaia ezgoda, vou cherel la.

⁹ O Jesus chudisailo kana asunda gaia orba, ta dikhla pe llene kai llana pala le ta phenda: Chachimaia phenav tumenge ka ni ando Israel ni maladem pe gachin pachape sargo ande gava manus.

¹⁰ Kana irisaile kai o cher e llene kai o sudo bichaldaia, dikhle kai o sluga ia sastiloia.

O Jesus cherel te ustel katar o meripe iekhe phivliake chaurre

¹¹ Mapalal, o Jesus llelo karing o foro o Nain. Llana lea leke disipulura ta but llene.

¹² Kana avile pasa o foro, dikhla kai inllarena te prajon iekhe llene, edino chavo pe dako, kai saia phivli. Ta but llene katar o foro avena laia.

¹³ Ta kana o Jesus dikhla la, avila leke zalba latar ta phenda lake: Na rou.

¹⁴ Avilo pase ta istarda e postelia kote kai inllarena e mule, ta e llene kai inllarena le achile. Ondaka o Jesus phenda e lleneke kai muloa: Ternea, chuke phenav: ¡Uste!

¹⁵ Ondaka o lleno kai saia mulo beslo ta dia orba, ta o Jesus diale kai leki dei.

¹⁶ Sa e llene kai sea kote daraile ta blagosina e Devle, ta phenena: Avilo iek baro profeta maskar amende. Ta i phenena: O Del avilo te pomozil pe foro.

¹⁷ Ta ande sa e Judea ta ande forura kai sea truial llangle so cherda o Jesus.

E bichalde e Juaneke

¹⁸ O Juan llangla katar sa gola ezgode, soke e llene kai llana pala le phenena leke so cherela o Jesus, goleke Ikharda duien katar pe disipulura

¹⁹ ta bichalda len kai o Gazda, te puchen le: ¿San tu gua kai saia te avel o si te adurichara avere?

²⁰ E llene kai bichaldaia o Juan avile pasa o Jesus ta phende leke: O Juan gua kai kristil bichalda amen te pucha tut dal san tu gua kai saia te avel o si te adurichara avere.

²¹ Isto kote o Jesus sastarda bute llenen katar lengo nasualipe ta katar lengi patnia, ta katar e duura bilache, ta cherda bute korren te dikhen.

²² Ta phenda lenge: Llan ta phenen e Juaneke so dikhlen ta so asunden. Phenen leke kai e korre dikhen, e bange phiren, e leprosura saston, e kasuke asunen, e mule llundinpe ta e chorrenge phendol e lachi viasta.

²³ ¡Ta blagosime gua kai ni jasarel po pachape ande ma!

²⁴ Kana lleletar e llene kai bichalda o Juan, o Jesus dia orba e llenenge katar o Juan, ta phenela: ¿So llelen tumen te dikhen po pusto? ¿Iek ran chinome e balaviatar?

²⁵ A te inai gia ¿So llelen te dikhen? ¿Iekhe manuse furiado barimaia? Tumen llanen kai e llene kai furiadon gia ta si ande dragostia zivin samo ande chera e charoke.

²⁶ A ¿So llelen te dikhen? ¿Iekhe profeta? Ea, chachimaia, ta mai but neko iek profeta.

²⁷ Soke o Juan si kai si pisime letar: Me bichalav me profeta angla tu, te lacharel chuke o drom.

²⁸ Phenav tumenge kai maskar sa e manusa, ni iek ni saia mai baro neko o Juan. A o mai minono ande charoina e Devleki si mai baro neko vou.

²⁹ Sa e llene kai asunde e Juane ta i e publikanura, kristisarda len vou, ta cherena so mangela lendar o Del,

³⁰ a e fariseura ta e kovacha e zakonoke ni kamle te kristil len o Juan ta ni kamle te cheren so mangela lendar o Del.

³¹ ¿A pe ka ka phenav kai si chuti gaia vicha? ¿Pe so mizil?

³² Von si sargo e minone kai besen po maskar katar o foro ta urkin ogole minonenge kai llan lenchar ta phenen lenge. Basaldan tumenge ande firura ta ni chelden, llilabiam tumenge llilia zalbake ta ni rovden.

³³ Soke avilo o Juan gua kai kristil kai ni jal marrno ta ni piel mol, a tumen phenen kai ande le si iek llavolo.

³⁴ Mapalal avilo o Chavo e Manuseko kai jal ta piel ta phenen letar, gava si iek lleno kai samo jal ta piel mol ta kai si amal e llenenchar kai si publikanura ta e manusenchar kai si bilache.

³⁵ A o chachipe e Devleko dikhol ande leke chave.

O Jesus ande Simonoko cher

³⁶ Iek fariseo ikharda e Jesuse te jal, ta o Jesus llelo ande leko cher. Ta beslo pe sinia,

³⁷ ondaka avili iek diskinia kai zivila isto ande gua foro ta llanglaia kai o Jesus lleloia te jal ando cher e fariseoko, anda pea iek taso alabastroko pherdo meriso.

³⁸ Rovindo thodape kai e porrne e Jesuseke, pegachin rovela kai lake ausa perena pe jesuseke porrne. Ta mapalal sukarda len pe balenchar, chumidia len ta thoda pe lende meriso.

³⁹ O fariseo kai ikhardaia e Jesuse te jal, kana dikhla gua, mislisailo: Gava lleno te aviloia chachimaia iek profeta, llanglaia savi diskinia bilachi si gaia kai dodil le.

⁴⁰ Ondaka o Jesus phenda e fariseoke: Simon, si te dav tuia iek orba. O fariseo phenda leke: Phen mange, Kovachi.

⁴¹ O Jesus phenda leke: Dui llene sea unllile iekhe lleneke kai dela unllile ta pe gua radila. Iek saia leke unllile panch stotine denariura, a o gua pinda,

⁴² ta sar nasti pochinena leke, o lleno kai dela unllile prostisarda e duienge lengo dugo. Akana phen mange tu: ¿Savo katar e dui ka del le mai but fala?

⁴³ O Simon phenda leke: Me acharav kai gua kai saia leke unllile mai but. O Jesus phenda leke: O chachipe phendan.

⁴⁴ Ondaka, o Jesus dikhla pe diskinia ta phenda e Simonoke: ¿Dikhe gale diskinia? Kana diem ande cho cher tu ni diam man pai me porrnenge, a gaia diskinia jalada me porrne pe ausenchar ta sukarda len pe balenchar.

⁴⁵ A tu ni phendan mange sar san ta ni chumidian man, a voi sar kai diem ande cho cher, ni achile te chumidel me porrne.

⁴⁶ Ni thodan pe mo soro zeitino, a voi thoda meriso pe me porrne.

⁴⁷ Goleke phenav chuke kai lako bilachipe kai si but si prostime, soke dia mai but fala. A o manus kai inai but prostime ni del but fala.

⁴⁸ Mapalal phenda e diskiniake: Cho bilachipe si prostime.

⁴⁹ Ogola llene kai sea gostura kote, phenena iek avereke: ¿Ko si gava, kai llik o bilachipe prostil?

⁵⁰ A o Jesus phenda e diskiniake: Tu avilan braduime soke pachaian. Lla esmiro.