Лукатар 6 - Biblia ande chib Romani

E disipulura ikanen lliu ando llive sabado

¹ Iek llive sabado o Jesus phirela maskar o lliu. Ta leke disipulura ikanena lliu ta jana e kuchorra.

² Ondaka nesave fariseura puchle len: ¿Soke cheren so nasti cherdol ando llive sabado?

³ O Jesus phenda lenge: ¿Tumen ni chitisarden so cherda o David kana vou ta leke amale sea bokhale?

⁴ Dia ando cher e Devleko ta lia e marrne kai sea chinade e Devleke ta jala ta dia i pe amalen te jan, kana gola marrne saia te jan len samo e popura.

⁵ Ta i phenda: O Chavo e Manuseko si Gazda i po llive sabado.

O Jesus sastarel iekhe nasuale ando llive sabado

⁶ Aver llive sabado, o Jesus dia ande khanlliri e judiononengi ta sikavela. Ta andre saia iek manus kai leko va o chacho saia suko ta bango,

⁷ ta e kovacha e zakonoke ta i e fariseura prezona e Jesuse te dikhen dal ka sastarel le ando llive sabado, ta gia te avel len vareso te dosaren le.

⁸ A vou, sar llanela so mislinpe, phenda e lleneke kai saia leko va bango: Uste ta thov tut po maskaral. O nasualo ustilo ta thodape pe porrne,

⁹ ondaka o Jesus phenda ogole llenenge: Ka puchau tumen iek ezgoda: ¿So sai cherdol ando llive sabado: O lachipe o o bilachipe? ¿Te bradui iek zivoto o te zatri le?

¹⁰ Dikhla pe sa e llene kai sea truial, ta phenda gole manuseke: Inzar cho va. Ta gua manus inzarda po va, ta leko va sastilo.

¹¹ A ogola llene jolaile but ta thode te denpe orba te sai cheren vareso bilacho e Jesuseke.

O Jesus esviril e desuduie apostolen

¹² Ande gola llivesa, o Jesus llelo pe iek burdo te molilpe, ta molisailo e Devleke sorro riat.

¹³ Kana llivosaila, ikharda pe disipulonen ta esvirisarda desuduien lendar, ta thoda lengo anav apostolura.

¹⁴ Gola llene sea: O Simon, kai thoda leko anav i Pedro, o Andres, o phlal e Simonoko, o Santiago, o Juan, o Felipe, o Bartolome,

¹⁵ o Mateo, o Tomas, o Santiago chavo e Alfeoko, o Simon, gua kai phenena leke Selote.

¹⁶ O Judas, chavo e Santiagoko, ta o Judas Iskariote, gua kai phukada e Jesuse.

O Jesus sikavel bute llenen

¹⁷ O Jesus fulisto katar o burdo lenchar ta achilo pe iek bari umal. Chidinailea but llene kai llana pala le ta but llene katar sa e forura e judeake, katar o Jerusalem ta katar o Tiro ta o Sidon kai si pasa e mora.

¹⁸ Avilea te asunen e Jesuse ta te sastarel len katar lengo nasualipe. Ta i gola kai sea ande lende duura bilache sastona.

¹⁹ Ta sa e llene mangena te dodin e Jesuse, soke suako lleno kai dodila le sastola pala e zor kai likela letar.

So mol chachimaia angla o Del

²⁰ O Jesus dikhla pe disipulura ta phenda lenge: Blagosime tumen e chorre, soke tumari si e charoina e Devleki.

²¹ Blagosime tumen kai akana sen bokhale, soke ka achen chalie. Blagosime tumen kai akana roven, soke mapalal ka asan.

²² Blagosime te aven tumen kana e llene ka murzin pe tumende, kana ka traden tumen, kana ka kusen tumen kana ka murzin pe tumaro anav sargo kana si iek ezgoda bilachi, pala o Chavo e Manuseko.

²³ Veselin tumen but, ande gua llive pherdon veselia, soke so si te dobin ando miloso si baro, soke isto gia cherde e profetonenchar lenge phure.

²⁴ A ¡tesko tumenge barvalalen, soke ia saia tumen tumari veselia!

²⁵ ¡Tesko tumenge kai akana sen chalie, soke ka avel tumenge bok! ¡Tesko tumenge kai akana asan, soke ka roven zalbatar!

²⁶ ¡Tesko tumenge kana sa e llene ka blagosin tumen, soke isto gia cherena tumare purane e llenenchar kai sea poraukura kojamne!

O volipe pe dusmanura

²⁷ A tumenge kai asunen phenav: Volisaren tumare dusmanonen, cheren o lachipe golenge kai murzin pe tumende,

²⁸ blagosisaren golen kai phenen tumenge bilache alava, molintumen pala gola kai kusen tumen.

²⁹ Te chalavela tut vareko pe chi cham, thov te chalavel tut i pe o goia. A vareko te lela tutar cho gertachi, muk te inllarel i cho gad.

³⁰ A vareko te mangela tutar vareso, de le leke, ta ko lela tutar so si chiro, na mangle letar.

³¹ Cheren e llenenchar isto gia sar mangen te cheren tumenchar.

³² Te volina tumen samo e llenen kai si len volipe pala tumende, ¿savi bari ezgoda cheren? I e llene bilache cheren gia.

³³ A te cheren o lachipe samo e llenenge kai i von cheren o lachipe tumenchar, ¿savi bari ezgoda cheren? I e llene bilache cheren gia.

³⁴ A te den unllile samo golen kai mange te le lendar i tu vareso, ¿savi bari ezgoda cheren? I e bilache den pe unllile maskar pete, te len chari iek averetar.

³⁵ Tumen morabi te volisaren tumare dusmanonen, ta te cheren o lachipe, ta te na mangen chari kana den unllile, ta gia ka avel baro tumaro chari, ta tumen ka aven chave katar o Del e milosoko, kai si lacho i e llenenchar kai ni den fala ta e bilachenchar.

³⁶ Si te avel tumen zalba, sargo i tumaro Dad kai si leke zalba tumendar.

Na chin kris nikake

³⁷ Na krisin averen, ta ni o Del ni ka krisil tumen, na dosaren averen, ta o Del ni ka dosarel tumen. Prostin, ta o Del ka prostil tumen.

³⁸ Den averen, ta o Del ka del tumen. Ka del tumen so trubul tumen. Isto gia sar tumen den averen, o Del ka del i tumen.

³⁹ O Jesus phenda lenge iek paramichi: Iek korro nasti inllarel avere korre, soke e dui ka peren ande iek jar.

⁴⁰ Ni iek disipulo ni llanel mai but neko leko kovachi: Kana ka getol po sikadipe ka avel sargo po kovachi.

⁴¹ ¿Soke dikhe e truña kai si ande che phlaleki iak, a ni dikhe o kas kai si ande chiri iak?

⁴² A te na acharea kai si iek kas ande chi iak, ¿sar phene che phlaleke: Phlala, muk te ikanav e truña kai si ande chi iak? ¡Manus kojamno san! mai anglal ikan o kas kai si ande chiri iak, ta ondaka ka dikhe sukar te ikane e truña katar e iak che phlaleki.

O kas pinllardol pala pe septelie

⁴³ Ni iek kas lacho ni del bilache septelie, ni o kas bilacho ni del lache septelie.

⁴⁴ Suako kas pinllardol pala pe septelie, ni ikandon simochine katar e kasta karrnale, ni drakha katar e karrne.

⁴⁵ O manus lacho del orbe lache soke o lachipe si ande leko lio, a o manus bilacho del orbe bilache soke o bilachipe si ande leko lio. Soke o manus del orba katar so mai but si ande leko lio.

E dui chera

⁴⁶ ¿Soke phenen mange tumen, Gazda, Gazda, a ni cheren so phenav tumenge?

⁴⁷ Ka phenav tumenge sar si o lleno kai avel mande ta asunel man a ni cherel so phenav:

⁴⁸ gua lleno si sargo iek manus kai mai anglal anada but te vazdel po cher, ta vazdiale po barr. Kana barili e len, o pai chalada zurale pe gua cher, a ni miskosarda le, soke vazdieale po barr.

⁴⁹ A vareko kai asunel me alava ta ni cherel so phenav, si sargo iek manus kai cherda po cher pe chisai ta ni anada te malavel e phuv zurali. Ta kana e len barili ta chalada zurale ando cher, pelotar ta achilo sa pe kotora.