Лукатар 5 - Biblia ande chib Romani

Ikanen but mache

¹ Iek drom o Jesus saia pasa e mora katar o Jenesaret, ta avile pe gachin llene kai chichidena le soke mangena te asunen e Devleke alava.

² O Jesus dikhla dui llimie ando pai. E macharia fulistea andral te jalaven pe mreze.

³ O Jesus likisto ande iek llimia, kai saia e Simonoki, ta mangla letar te duriavel la katar e phuv. Mapalal beslo ande llimia, ta andral sikavela e llenen.

⁴ Kana getosarda pi orba, phenda e Simonoke: Inllar e llimia kote kai si mai but pai, ta kote chuden tumare mreze, te ikanen machen.

⁵ O Simon phenda leke: Kovachi, radisardam sorro riat ta ni istardam ni iek macho, a soke tu mange amendar te cherale, ka chudau e mreza.

⁶ Kana chudie e mreze, istarde pe gachin mache kai e mreze chindona.

⁷ Ondaka ikharde e vastenchar e llenen kai radina lea zanio kai sea ande o goia llimia, te pomozin len. Ogola llele, ta pherde pe gachin e dui llimie kai lela te del o pai andre.

⁸ Kana o Simono Pedro dikhla gua, dia changa angla o Jesus ta phenda leke: ¡Le tut mandar, Gazda, soke sem iek bilacho!

⁹ Gua saia soke o Simon ta sa ogola darailea soke istarde but mache.

¹⁰ Ta daraile i o Santiago ta o Juan, chave e Zebedeoke, kai radina zanio e Simonoia. A o Jesus phenda e Simonoke: Na dara. Katar angle ka ikane manusen.

¹¹ Ondaka inllarde e llimie pe phuv, mukle sa ta lleletar lea.

O Jesus sastarel iekhe llene kai saia pe lete e lepra

¹² Iek llive, o Jesus saia ande iek foro, ta avilo lete iek lleno kai saia pe lete e lepra. Kana dikhla e Jesuse, chudiape tele moia pe phuv ta molisailo leke: Gazda, te mangea, sai sastare man katar mo nasualipe.

¹³ O Jesus dodisarda le pe vastea ta phenda: Mangav. ¡Sastiv! Ta isto kote o nasualo sastilo katar e lepra,

¹⁴ ta o Jesus phenda leke: Na phen le nikake. Lla ta sikado samo e popoke, ta inllar pala cho chistope so phenda o Moises te inllare, te dikhen e popura.

¹⁵ Ta o Jesus cherdola ios mai pinllardo, ta but llene chidiniaona te asunen le ta te sastarel lengo nasualipe.

¹⁶ A o Jesus llala te molilpe kote kai ni saia niko.

O Jesus prostil ta sastarel iekhe llene kai nasti phirela

¹⁷ Iek llive kana o Jesus sikavela, besena kote nesave fariseura ta i nesave kovacha e zakonoke kai avena katar suako rig e Galileaki, ta i katar e Judea ta katar o Jerusalem. Ta e zor e Gazdaki sikadola ando Jesus kana sastarela e nasualen.

¹⁸ Ondaka avile nesave llene kai anena ande iek postelia iekhe llene kai nasti phirela. Mangena te thoven le andre ando cher angla o Jesus,

¹⁹ a ni malade katar te den andre, soke sea but llene. Likiste upral po cher, cherde iek putardipe ta kotar fuliarde gole bange ande iek postelia, ta thode le maskar e llene, angla o Jesus.

²⁰ Kana o Jesus dikhla lengo pachape, phenda e bangeke: Amala, cho bilachipe si prostime.

²¹ Ondaka e kovacha e zakonoke ta e fariseura mislisaile: ¿Ko si gava kai phenel gola bilache alava? Gava lleno kusel e Devle gole alavenchar. Samo o Del sai prostil o bilachipe.

²² A o Jesus llangla so mislina, ta puchla len: ¿Soke mislin tumen gia?

²³ ¿So si mai lesno, te phendol: Cho bilachipe si prostime, o te phendol: Uste ta phir?

²⁴ Goleke ka sikavav tumenge kai o Chavo e Manuseko si le e zor pe phuv te prostil o bilachipe. Ondaka phenda e bangeke: Uste, le chi postelia ta llatar kai cho cher.

²⁵ Ondaka, o lleno kai nasti phirela ustilo angla sa e llene, lia e postelia kai vou inzola pe late, ta llelotar kai po cher ta blagosila e Devle.

²⁶ Sa e llene chudisaile ta daraile ta blagosina e Devle ta phenena: Gia bare ezgode dikhlam allive.

O Jesus ikhar e Levieke

²⁷ Mapalal o Jesus, llelotar kotar ta dikhla iekhe publikano. Gua lleno ikhardola Levi, ta besela po stali, kote kai pochindol e love e phuviake. O Jesus phenda leke: Aide pala ma.

²⁸ Ondaka o Levi ustilo, mukla sa ta llelo pala le.

²⁹ Isto gua llive ande po cher, o Levi cherda pachiu e Jesuseke. Ta but publikanura ta i aver llene, besena lenchar pe sinia.

³⁰ A e fariseura ta e gazda e zakonoke dena lenge orbe ta phenena: ¿Soke tumen jan ta pien e publikanonenchar ta e bilache llenenchar?

³¹ O Jesus phenda lenge: E saste ni trubul len doktori, ka trubul o doktori si e nasualen.

³² Me ni avilem te ikharav e chachen, me avilem te ikharav e bilachen, te irinpe kai o Del.

So si te cherdol kana cheren o alluno

³³ Phende e Jesuseke: E disipulura e Juaneke ta i katar e fariseura allunin ta molinpe but, a che disipulura jan ta pien.

³⁴ O Jesus phenda lenge: ¿Sai cheren tumen te allunin e llene kai si ikharde pe iek biau kana o chavo kai zinilpe si lenchar?

³⁵ A ka avel o llive kana ka len lendar gole kai zinilpe, ondaka von ka allunin.

³⁶ Ta i phenda lenge gaia paramichi: Niko ni chinel iek kotor chiti katar iek fistano nevo te lacharel iek fistano purano. Soke te cherdol gia, murilpe o fistano nevo ta o kotor nevo ni ka achel sukar po fistano purano.

³⁷ Ta ni thodol e mol nevi ande morcha purane, soke e mol nevi cherel te pharron e morcha, ta gia e mol ta i e morcha jasaon.

³⁸ Goleke morabi te thodol e mol nevi ande morcha neve.

³⁹ Ta niko ni kamel e mol nevi kana piel e mol e purani, soke suako lleno kai piel mol purani mapalal ni kamel te piel e mol nevi soke phenel gia: E mol purani si mai sukar.