Лукатар 4 - Biblia ande chib Romani

O llavolo zumavel e Jesuse

¹ O Jesus pherdo katar o Santo Duo, irisailo katar o Jordan, ta o Santo Duo inllarda le po pusto.

² Kote achilo saranda llive, ta o llavolo zumavela le. Ni jala niso gola llivesa, ta bokhailo.

³ Ondaka o llavolo phenda leke: Te san chachimaia o Chavo e Devleko, phen gale barreke te cherdol marrno.

⁴ O Jesus phenda leke: Ando Pisipe phenel: Na samo e marnetar ka zivil o manus.

⁵ Mapalal o llavolo inllarda le pe iek baro burdo, ta sikada leke sa e phuvia e suetoke.

⁶ Ta phenda leke: Me ka dav tut sa gala phuvia ta sa lengo barvalipe. Soke me liem sa gala ezgode ta daulen kake me mangava te daulen.

⁷ Te dea changa ta te blagosia man, sa ka avel chiro.

⁸ A o Jesus phenda leke: Llatar mandar, Satanas, soke ando Pisipe phenel: Blagosisar e Gazda cho Del, ta radisar samo leke.

⁹ Mapalal o llavolo inllarda le ando Jerusalem, thoda le upral po than mai vazdino katar o cher e Devleko ta phenda leke: Te san chachimaia o Chavo e Devleko, chude tut tele,

¹⁰ soke ando Pisipe phenel gia: O Del ka bichalel pe suechonen te arakhen tut.

¹¹ Ka vazden tut pe vastenchar, te na eskombal cho porrno pe ni iek barr.

¹² A o Jesus phenda leke: Ta i ando Pisipe phenel gia: Na thov ando zumadipe e Gazda kai si cho Del.

¹³ Ta sar o llavolo nasti thoda e Jesuse ios ando zumadipe, llelotar letar nesavo vreme.

E Jesuseko rado llal angle ande Galilea

¹⁴ O Jesus irisailo ande Galilea pherdo katar e zor e Santone Duoki, ta dena leki orba ande sa e forura kai sea truial.

¹⁵ Sikavela ande khanllira e judionenge katar suako rig ta sa blagosina le.

O Jesus ando Nazaret

¹⁶ Ondaka o Jesus llelo ando Nazaret, kote kai barilo. Ando llive o sabado dia ando cher e Devleko, sar saia sikado, ta thodape pe porrne te chitil e Devleke alava.

¹⁷ Die lete te chitil o lil katar o profeta o Isaias, ta kana putardale, malada kote kai phenela gia:

¹⁸ O Duo e Devleko si upral pe mande, soke blagosisarda man te dav lache viaste e chorren. Bichalda man te sastarav e llenen kai si lenge zalba ando lio, te phenav e phanglenge kai ka liken katar o phandipe ta te cherav te dikhen e korre, te ikanav e llenen katar o bilachipe kai nakhen,

¹⁹ te phenav o lacho vreme e Devleko kai avel.

²⁰ Ondaka o Jesus phangla e Devleke alava, dialen kai o lleno kai pomozil ando cher e Devleko ta beslo. Sar sa e llene dikhena pe lete,

²¹ vou dia lenge orba ta phenda: Isto allive cherdilo so si pisime angla tumende.

²² Saurre dena lache orbe e Jesuseke, ta saia lenge chudo katar e sukar alava kai phenela lenge. Ta puchena pe: ¿Inai gava o chavo e Joseeko?

²³ O Jesus phenda lenge: Akana tumen ka phenen mange so phenen but llene: Doktori, sastar isto tu tut. Ta ka phenen mange: So asundam kai cherdan ando Kafarnaum cher le i kate isto ande chi phuv.

²⁴ Ondaka pale dia orba ta phenda lenge: Chachimaia phenav tumenge, kai ni iekhe profetaia inai lea pachivale isto ande leki phuv.

²⁵ Chachimaia phenav tumenge kai sea but phivlia ando foro o Israel kana o profeta o Elias saia llundo, kana ni dia peke trin burs ta dopas ta saia but bok ande sa o foro,

²⁶ a o Elias ni saia bichaldo kai ni iek katar gola phivle kai zivina ando Israel, a pomozisarda iekha kai zivila ande Sarepta pasa o foro o Sidon.

²⁷ Ta i ando Israel sea but nasuale katar e lepra kana o profeta o Elias saia llundo, a ni iek lendar ni avila sastardo, samo o Naaman, kai saia katar e Siria.

²⁸ Kana asunde gala ezgode sa e llene kai sea ando cher e Devleko jolaile but.

²⁹ Ustile ta chudie e Jesuse avri katar o foro, ta inllarde le llik upre po burdo kote kai saia o foro te chuden le tele.

³⁰ A o Jesus nakhlo maskar lende ta llelotar.

Iek manus kai ande le saia o llavolo

³¹ Ondaka o Jesus llelo ando Kafarnaum, iek foro katar e Galilea, ta kote thodape te sikavel e llenen ando llive o sabado.

³² Ta e llene chudinape sar sikavela len, soke dela lenge orba gazdarimaia.

³³ Ande khanlliri e judionengi saia iek manus kai saia ande le iek duo bilacho kai urkisarda ta phenda:

³⁴ ¡Muk amen! ¿Soke ami tut amenchar, Jesus katar o Nazaret? ¿Ave te zatri amen? Me pinllarav tut, ta llanav kai san o Santo e Devleko.

³⁵ O Jesus dia po duo bilacho ta phenda leke: ¡Achi, ta muk gale manuse! Ondaka o duo bilacho chudia e manuse pe phuv angla lende, ta likisto letar ta ni cherda leke nisavo bilachipe.

³⁶ Sa daraile, ta phenena iek avereke: ¿Save alava si gala? Gava manus del orba gazdarimaia ta zoriaia e bilache duonenge, ¡ta e duura llantar!

³⁷ Ta lleli e Jesuseki viasta pe suako rig katar gola forura.

O Jesus sastarel sasuia katar o Simon Pedro

³⁸ O Jesus likisto katar e khanlliri e judionengi ta dia ando cher e Simonoko. Ta e sasui e Simonoki phabola but nasualimatar ta mangena letar te sastarel la.

³⁹ O Jesus bangilo late ta phenda e nasualimake te llaltar, ta o nasualipe liape latar. Isto kote voi ustili ta thoda te radil leke.

O Jesus sastarel bute nasualen

⁴⁰ Kana peli e riat, sa e llene kai sea len nasuale katar suako nasualipe, inllarde len kai o Jesus, ta vou thoda pe va pe suako iek lendar, ta gia sastarda len.

⁴¹ Katar but nasuale likiste duura bilache, kai urkina ta phenena: ¡Tu san o Chavo e Devleko! A o Jesus dia pe duura bilache ta ni mukela len te phenen niso, soke llanena kai vou saia o Kristo.

O Jesus del orba ande Galilea

⁴² Thiarinako, o Jesus likisto avri katar o foro, pe iek rig korkorre. A e llene rodie le, ta avile kote kai saia vou. Mangena te achaven le, te na llaltar,

⁴³ a o Jesus phenda lenge: Morabi te inllarav e viasta katar e charoina Devleki i ande ogola forura, soke goleke sem bichaldo.

⁴⁴ Ta gia llala o Jesus ta phenela e lachi viasta ande khanllira e judionenge katar e phuv katar e Galilea.