Лукатар 3 - Biblia ande chib Romani

O Juan gua kai kristil del orba po pusto

¹ Ando burs desupanllengo katar o gazdaripe e charoko o Tiberio, o Ponsio Pilato gazdarila ande Judea, o Erodes gazdarila ande Galilea, leko phlal o Felipe gazdarila ande Iturea katar e Trakonitide, ta o Lisanias gazdarila ande Abilinia.

² O Anas ta o Kaifas sea e mai bare popura. Ande gola llivesa o Del dia orba po pusto e Juaneke o chavo e Zakariaseko,

³ ta o Juan nakhlo katar sa e thana kai si pasa e Jordaneki len, ta phenela e llenenge kai saia te irinpe katar pe bilache droma ta te kristinpe, te sai avel prostime lengo bilachipe.

⁴ Ta sa gola ezgode nakhle isto sar pisisarda o profeta o Isaias: iek lleno urkil po pusto: Lacharen o drom e Gazdako, putaren leke iek drom orta.

⁵ Suako jar ka avel pherdi, suako burdo ka avel ortome, e droma bange ka aven ortome, e droma krupne ka aven ortome

⁶ Sa o sueto ka dikhel o braduipe kai bichalel o Del.

⁷ Kana e llene likena te kristil len o Juan, vou phenela lenge: ¡Vicha sapengi! ¿Ko phenda tumenge kai ka kurtulin tumen katar e bari patnia kai avel?

⁸ Cheren ezgode te sai dikhol bristomaia kai irisailen kai o Gazda, ta na phenen maskar tumende: Amen sam katar e vicha e Abraameki. Soke chachimaia phenav tumenge kai llik katar gala barra o Del sai cherel llenen katar e vicha e Abraameki.

⁹ O tover si gotovo te chindol lea e kasta katar lenge zile. Suako kas kai ni del lache septelie chindol ta chudiniaol ande iag.

¹⁰ Ondaka e llene puchle le: ¿So morabi te chera?

¹¹ O Juan phenda leke: Gole kai si le dui gada, si te del gole kai inai le ni iek, ta gole kai si le jape, morabi te del gole kai inai le.

¹² Avile nesave publikanura te kristinpe, ta puchle e Juane: Kovachi, ¿so si te chera amen?

¹³ O Juan phenda lenge: Na len mai but love katar so si te len.

¹⁴ Ta i nesave boñikura puchle le: A amen, ¿so si te chera? Vou phenda lenge: Na len nikatar niso pezor, ta na dosaren nika katar so ni cherda. Ta veselin tumen gole lovenchar kai len.

¹⁵ E llene mangena te llanen, ta mislina kai o Juan saia o Kristo,

¹⁶ a o Juan phenda saurrenge: Me chachimaia kristiv tumen e paiea, a avel pala ma iek kai ka kristil tumen e Duoia ta e iagaia. Le si mai but zor neko man, a me ni sem lacho ni te putarav o kavisi katar leke sinele.

¹⁷ Ande leko va si o kas kai chudel lea upre o lliu te chistol le, ta ka fulavel le katar e char suki. Ka guruvel o lliu ande po cher kai gurudol o lliu, a e char suki ka phabarel la ande iek iag kai nikada ni merel.

¹⁸ Ta gia sikavela o Juan e llenenge e lachi viasta, ta i avere orbenchar.

¹⁹ Ta i dia po charo o Erodes, soke zinisailoa pala e Erodias kai saia zinime e Felipea, leko phlal, ta i pala aver ezgode bilache kai cherdaia.

²⁰ A o Erodes ni thoda leke sama ta cherda aver ezgoda bilachi: Phangla e Juane ande rubie.

O kristope e Jesuseko

²¹ Kana o Juan kristisarela sa e llenen, i o Jesus kristisailo ta kana vou molilape, o miloso putailo

²² ta o Santo Duo fuliela upral pe lete sargo iek gulubo, ta asundilo iek avazi katar o miloso kai phenenela: Tu san mo Chavo kai voliv, ande tu si man veselia.

E vicha e Jesukristoki

²³ E Jesuseke sea preko tranda burs kana lia te cherel pi buchi. Prema so phenena, saia chavo e Joseeko. O Jose saia chavo e Elieko,

²⁴ kai saia chavo e Matateko, kai saia chavo e Levieko, kai saia chavo e Melkieko, kai saia chavo e Janaeko, kai saia chavo e Joseeko,

²⁵ kai saia chavo e Matateko, kai saia chavo e Amoseko, kai saia chavo e Najumeko, kai saia chavo e Eslieoko, kai saia chavo e Nagaieko,

²⁶ kai saia chavo e Maateko, kai saia chavo e Matatiaseko, kai saia chavo e Semeiteko, kai saia chavo e Joseeko, kai saia chavo e Joiadaeko,

²⁷ kai saia chavo e Joanaeko, kai saia chavo e Resaeko, kai saia chavo e Zorobabeleko, kai saia chavo e Salatieleko, kai saia chavo e Nerieko,

²⁸ kai saia chavo e Melkieko, kai saia chavo e Adieko kai saia chavo e Kosameko, kai saia chavo e Elmadameko, kai saia chavo e Ereko,

²⁹ kai saia chavo e Josueeko, kai saia chavo e Eliesereko, kai saia chavo e Jorimeko, kai saia chavo e Matateko,

³⁰ kai saia chavo e Levieko, kai saia chavo e Simeoneko, kai saia chavo e Judaeko, kai saia chavo e Joseeko, kai saia chavo e Jonaseko, kai saia chavo e Eliakimeko,

³¹ kai saia chavo e Meleaeko, kai saia chavo e Menaeko, kai saia chavo e Matataeko, kai saia chavo e Nataneko,

³² kai saia chavo e Davideko, kai saia chavo e Nataneko, kai saia chavo e Isaieko, kai saia chavo e Obedeko, kai saia chavo e Booseko, kai saia chavo e Selaeko, kai saia chavo e Naasoneko,

³³ kai saia chavo e Aminadabeko, kai saia chavo e Ersoneko, kai saia chavo e Esromeko, kai saia chavo e Fareseko, kai saia chavo e Judaeko,

³⁴ kai saia chavo e Jakobeko, kai saia chavo e Isakeko, kai saia chavo e Abraameko, kai saia chavo e Teraeko, kai saia chavo e Nakoreko,

³⁵ kai saia chavo e Serugeko, kai saia chavo e Ragaueko, kai saia chavo e Pelegeko, kai saia chavo e Ebereko, kai saia chavo e Salaeko,

³⁶ kai saia chavo e Kainaneko, kai saia chavo e Arfaksadeko, kai saia chavo e Semeeko, kai saia chavo e Noeeko, kai saia chavo e Lamekeko,

³⁷ Matusalemeko, kai saia chavo e Enokeko, kai saia chavo e Jaredeko, kai saia chavo e Majalaleeleko, kai saia chavo e Kainaneko,

³⁸ kai saia chavo e Enoseko, kai saia chavo e Seteko, kai saia chavo e Adaneko, kai saia chavo e Devleko.