Лукатар 24 - Biblia ande chib Romani

O Jesus ustel katar o meripe

¹ A o purvo llive katar e efta irisaile kai o limori but rano, ta inllarena e merisura kai cherdea.

² Kana avile, dikhle o barr kai ni saia pe po than,

³ ta die andre, a ni malade e esnaga e Jesuseki.

⁴ Ni llanena so ka cheren. Ta dikhle duie llenen pe porrne pasa lende, ta lenge patave kai klichina.

⁵ E diskinie gia daraile kai die changa ta lengo chikat dodisarda e phuv, a gola dui llene phende lenge: ¿Soke tumen roden maskar e mule gole kai si llundo?

⁶ Inai kate, vou ustilo katar o meripe. Den tumen golli so phenda tumenge kana saia ande Galilea:

⁷ kai o Chavo e Manuseko ka avel dino ande va e bilachenge, kai ka mundaren le ta kai pala e trin llive ka ustel katar o meripe.

⁸ Ondaka von die pe golli katar so phenda lenge o Jesus,

⁹ ta kana irisaile kotar phende sa e desuiekhe apostolenge ta sa ogolenge.

¹⁰ Gola kai inllarde e viasta e apostolenge sea e Maria Magdalena, e Juana, e Maria e dei e Santiagoki, ta ogola diskinie,

¹¹ A e apostolura mislina kai so phenena saia dilipe, ta ni kamena te pachan len.

¹² A o Pedro llelo prastindo kai o limori. Ta kana dikhla andre, dikhla samo o chiti. Ondaka irisailo chere, ta chudisailo katar gala ezgode kai nakhle.

Po drom kai llal karing o Emaus

¹³ Isto gua llive, dui katar e disipulura llana karing o Emaus, des kilometrura katar o Jerusalem.

¹⁴ Dena orba katar sa so avilape.

¹⁵ Ta kana dena orba, isto o Jesus avilo pasa lende ta phirda lenchar.

¹⁶ A makar dikhena le, vareso ni mukela te llanen ko saia vou.

¹⁷ O Jesus puchla len: ¿Savi orba si tumen e dromea? Zalbaia achile,

¹⁸ ta iek lendar, kai ikhardola Kleofas, phenda leke: ¿Samo tu san ando Jerusalem kai ni llanel so avilape kote ande gala llivesa?

¹⁹ Vou puchla len: ¿So avilape? Von phende leke: So nakhla o Jesus katar o Nazaret, kai saia iek profeta zuralo ande so cherela ta ande so phenela angla o Del ta angla sa o foro.

²⁰ Ta sar e gazda e zakonoke ta amare sudura chinde leke pe kris te krustosaren le ta te merel.

²¹ A amen uzdisailam kai vou ka mukliarel e foro katar o Israel. A cherel trin llive kai sa gala ezgode nakhle.

²² A nesave diskinie kai si amenchar darade amen, soke llelea thiarinako rano kai o limori,

²³ ta sar ni malade e esnaga, irisaile chere. Ta phenen kai iek suechura avile lende ta phende lenge kai o Jesus zivil.

²⁴ Nesave llene amare llele mapalal kai o limori ta malade isto gia sar phendea e diskinie, a e Jesuse ni dikhle le.

²⁵ Ondaka o Jesus phenda lenge: ¡Inai tumen bizaipe ta gia poloke pachan ande sa so phende e poraukura!

²⁶ ¿A ni saia te nakhel gala ezgode o Mesias ta mapalal te avel blagosime ando miloso?

²⁷ Mapalal phenda lenge sa so phenena letar e alava e Devleke, katar o Moises llik kai sa e poraukura.

²⁸ Kana avile ando foro kai llana, o Jesus cherda sargo kana llala ios e dromea.

²⁹ A von pe zor cherde le te achel, ta phende leke: Achi amenchar, soke nakhle but saiata. Ta lel te perel e riat. O Jesus dia andre, te achel lenchar.

³⁰ Kana besle pe sinia, lia ande pe va o marrno, dia fala e Devle, ta diale lende

³¹ Ondaka putaile lenge akha ta llangle kai saia o Jesus, a vou sumbisailo.

³² Ta phende iek avereke: ¿Ni phabola amaro lio kana dela amenge orba e dromea ta kana sikavela amenge so phenel ando Pisipe?

³³ Ni aduricharde ios ta irisaile ando Jerusalem, ta malade e desuiekhe apostolonen ta ogole llenen kai sea lenchar,

³⁴ kai phende lenge: De istina o Gazda ustilo katar o meripe, ta sikadilo e Simonoke.

³⁵ Ondaka von phende so nakhle e dromea, ta sar llangle kai saia o Jesus kana phagla o marrno.

O Jesus sikadol e disipulonenge

³⁶ Von dena orba katar gola ezgode, kana o Jesus thoda pe po maskaral lendar ta phenda lenge: Pas tumenge.

³⁷ Von daraile but, soke mislina kai iavilape.

³⁸ A o Jesus phenda lenge: ¿Soke daran? ¿Soke inai tumen pachape ande tumare lie?

³⁹ dikhen pe me va ta pe me porrne. Isto me sem. Dodisaren man ta dikhen: Iek duo inai le mas ni kokala, sa tumen dikhen kai si man.

⁴⁰ Kana phenda gua, sikada lenge pe va ta pe porrne.

⁴¹ A sar von ni pachana, katar e veselia ta o chudo kai saia lenge, o Jesus puchla len: ¿Si tumen kate vareso te jalpe?

⁴² Von phende leke iek kotor macho peko,

⁴³ vou liale ta jalale angla lende.

⁴⁴ Mapalal phenda lenge: So avilape manchar si so phenava tumenge kana sema tumenchar: Kai saia te cherdol sa so si pisime mandar ando zakono e Moiseseko, ando pisipe e profetonengo ta ande salmura.

⁴⁵ Ondaka cherda te acharen e alava e Devleke,

⁴⁶ ta phenda lenge: Pisime si kai o Mesias saia te merel, ta kai saia te ustel katar o meripe pala e trin llive,

⁴⁷ ta kai ande leko anav ka phendol pe sa e suetoke te irinpe kai o Del, te prostil lengo bilachipe. Katar o Jerusalem ta kotar angle,

⁴⁸ tumen morabi te phenen gala ezgode.

⁴⁹ Ta me ka bichalav pe tumende so phenda tumenge mo Dad. A tumen ka achen kate ando foro katar o Jerusalem, lligo ni ka len e zor kai avel katar o miloso.

O Jesus llal upre ando miloso

⁵⁰ Mapalal o Jesus inllarda len avri katar o foro, llik ande Betania, ta pe vastenchar upre blagosisarda len.

⁵¹ Ta kana blagosila len, durilo lendar ta avilo inllardo ando miloso.

⁵² Blagosisarde le ta mapalal, irisaile ando Jerusalem but vesele.

⁵³ Ta von sea sa o vreme ando cher e Devleko, ta blagosina e Devle.