Лукатар 23 - Biblia ande chib Romani

Inllaren e Jesuse kai o Pilato

¹ Sa ustile, ta inllarde e Jesuse kai o Pilato.

² Angla o Pilato thode te phenen: Dikhlam gale llene kana divola e llenen katar amari phuv. Ta phenel te na da love kai o kralio, ta i phenel kai vou si o Mesias, o Charo.

³ O Pilato puchla le: ¿San tu o Charo e Judionengo? Tu phendanle.

⁴ Ondaka o Pilato phenda e gazdenge katar e zakonura ta e llenenge: Ni malavav niso ande gava lleno te dosarav le.

⁵ A von ios mai but orbe dena ta phenena: Pe sikadimaia divol sa e foro. Cherda le ande Galilea, ta akana cherel le kate, ande Judea.

Inllaren e Jesuse kai o Erodes

⁶ Kana asunda gua, o Pilato puchla dal gua manus saia katar e Galilea.

⁷ Ta kana asunda kai o Jesus avela kotar katar gazdarila o Erodes, bichalda le lete, soke o Erodes ande gola llivesa saia ando Jerusalem.

⁸ Kana dikhla e Jesuse, o Erodes veselisailo but, soke cherela but vreme kai mangela te dikhel le, soke asundaia kai den leke orbe ta mangela te dikhel sar cherel varesavi bari ezgoda Devlikani.

⁹ Puchla le but ezgode a vou ni phenda leke niso.

¹⁰ Kote saia i o gazda e poponengo ta e gazda e zakonoke, ta dosarena le but.

¹¹ Ondaka o Erodes ta leke boñikura avile lea bilache, ta te maren letar espurnia thode pe lete patave barikane, sargo charoke. Mapalal o Erodes bichalda le pale kai o Pilato.

¹² Gua llive o Pilato ta o Erodes cherdile amal, soke omanglal jaleape.

E kris phenel kai o Jesus si te merel

¹³ O Pilato chidia e gazden katar e popura, e sudonen ta e foro,

¹⁴ ta phenda lenge: Tumen anden gale llene, ta phenen kai divol e foro, a me andem le angla tumende ta ni maladem le dosalo ande ni iek ezgoda kai phenen letar.

¹⁵ Ta ni o Erodes, soke irisarda le amende. Ni cherda niso te mundaren le.

¹⁶ Ka phenav te chalaven le ta mapalal ka mukliarav le.

¹⁷ O Pilato phenda gua, soke pe suako Paskua saia te mukliarel iekhe phangle.

¹⁸ A sa e llene urkisarde: ¡Nikama gole! ¡Mukliaren amenge e Barrabase!

¹⁹ Gale Barrabase phanglea le soke mardaiape ando foro e llenenchar kai gazdarina e foro, ta soke mundardaia iekhe llene

²⁰ O Pilato, mangela te mukliarel e Jesuse, ta dia lenchar orba pale.

²¹ A von urkisarde ios mai zurale: ¡Krustosaren le! ¡Krustosaren le!

²² Pale e trito drom o Pilato phenda lenge: ¿Savo bilachipe cherda? Me ni dikhav niso bilacho ande gava lleno te sai avel mundardo. Ka phenav te chalaven le ta mapalal ka mukliarav le.

²³ A von pale urkina, ta mangena te krustosaren le, ta pe gachin urkisarde kai cherde pe piro.

²⁴ O Pilato mangla te cherel so mangle letar.

²⁵ Mukliarda gole llene kai von esvirisarde, gua kai saia ande rubie soke mardaiape ta mundarda, ta mukla e llenen te cheren so von mangena e Jesusea.

Krustosaren e Jesuse

²⁶ Kana inllarde e Jesuse te krustosaren le, istarde iekhe llene kai saia katar o foro Sirene kai ikhardola Simon, kai avela katar o vos, ta cherde te inllarel o krusto palal pala o Jesus.

²⁷ But llene ta but diskinie llana pala le, rovena ta urkina zalbatar pala so vou nakhela.

²⁸ A o Jesus dikhla pe lende ta phenda lenge: Diskinie katar o Jerusalem, na roven pala ma, roven isto pala tumende ta pala tumare minone.

²⁹ Soke ka aven llivesa kai ka phendolpe: Blagosime e diskinie kai nasti avel len minone, gola kai ni biande ni gola kai ni bariarde minonen.

³⁰ Ondaka e llene ka phenen e burdonenge: ¡Peren upral pe amende ta guruven amen!

³¹ Soke te cheren gava e zelene kastea, ¿So ni ka cheren e suke kastea?

³² Ta i inllarena duie bilache llenen, te krustosaren len e Jesusea.

³³ Kana avile kote kai ikhardol o than e kokalengo, krustosarde e Jesuse ta duie bilache llenen, iek pe leki chachi ta ogole pe leko estingo.

³⁴ O Jesus phenda: Dade, prostisar len soke ni llanen so cheren. Ta e boñikura fulade maskar pete leke patave, ta chelenape te dikhen ko ka achel leke patavenchar.

³⁵ E llene kai sea kote dikhena peke. Ta llik e sudura marena letar espurnia, ta phenena: Braduisarda averen, te braduil isto vou pe akana, te si chachimaia o Mesias e Devleko esvirime.

³⁶ I e boñikura marena espurnia katar o Jesus. Avena pasa le ta dena le te piel mol cherki,

³⁷ ta phenena leke: ¡Te san tu o Charo e Judionengo, braduisar tu tut!

³⁸ Ta upral po krusto saia pisime: Gava si o Charo e Judionengo.

³⁹ Iek katar e dui llene bilache kai saia krustome kusela le ta phenela: ¡Te san tu o Mesias, braduisar tu tut ta braduisar i amen!

⁴⁰ A o gua lleno dia pe lete, ta phenda leke: ¿Ni dara e Devletar, tu kai san isto ande goia patnia?

⁴¹ Amen nakha gaia duk, soke chachimaia pochina so cherdam, a gava lleno ni cherda nisavo bilachipe.

⁴² Ta phenda: Jesus, de tut golli mandar kana ka gazdari ande chi charoina.

⁴³ O Jesus phenda leke: Chachimaia phenav chuke kai allive ka ave manchar ando paraiso.

O meripe e Jesuseko

⁴⁴ Kana nakhle e desudui e lliveseke llik kai e trin e lliveseke, sa e phuv achili ando truniariko.

⁴⁵ O kham ni kletosarda, ta o chiti kai si ando cher e Devleko chindilo po dopas.

⁴⁶ O Jesus urkisarda zurale ta phenda: ¡Dade, ande che va mukau mo duo! Ta kana phenda gua, mulo.

⁴⁷ Kana o boñiko rromano dikhla so avilape, blagosisarda e Devle, ta phenda: Chachimaia, gava manus saia chacho.

⁴⁸ Sa o sueto kai saia kote kai dikhle so avilape, lleletar kotar ta chalavenape ande po kolin.

⁴⁹ Sa e llene kai pinllarena e Jesuse sea dur letar, ta i e diskinie kai llelea pala le katar e Galilea sea kote ta dikhena.

Prajon e Jesuse

⁵⁰ Saia iek manus lacho ta chacho kai ikhardola Jose, vou saia katar e Arimatea, iek foro katar e Judea kai i vou saia iek lleno katar e kris e judionengi.

⁵¹ Gava Jose, adurichare la e charoina e Devleki ta ni saia leke drago so cherda lengi kris,

⁵² llelo kai o Pilato ta mangla letar e esnaga e Jesuseki.

⁵³ Kana fuliarda le katar o krusto, ulisarda le ande iek chiti ta thoda le ande iek limori kai saia anado ande iek pechina, ande gua limori nikada ni prajosardea nika.

⁵⁴ Gua llive lacharena sa soke ia dena ando sabado.

⁵⁵ E diskinie kai llelea pasa o Jesus katar e Galilea, llele te dikhen o limori, ta dikhle sar thode leki esnaga.

⁵⁶ Kana irisaile chere, cherde merisura. E diskinie ni radisarde o llive sabado, gia sar phenel o zakono.