Лукатар 22 - Biblia ande chib Romani

Sar phangle e Jesuse

¹ Saia pase e eslava kai jalpe o marrno kai inai le levadura, e eslava e Paskuaki.

² E gazda e poponenge ta e kovacha e zakonoke, darana katar e llene, ta rodena sar ka mundaren e Jesuse.

³ Ondaka o Satanas dia ando Judas, iek katar e desudui disipulura kai phenena leke Iskariote.

⁴ Vou llelo kai e gazda e poponenge ta kai e llene kai arakhena o cher e Devleko, te achel lenchar pe orba te sai phukavel e Jesuse.

⁵ Von veselisaile ta diele po alav kai ka den le love e Judase.

⁶ Ta vou mangla ta thodape te rodel o vreme, kana ni ka aven llene, te del lende e Jesuse.

E sinia e Gazdaki

⁷ O llive katar e eslava kana jalape o marrno kai inai le levadura, kana mundardola o bakro e Paskuako.

⁸ O Jesus bichalda e Pedro ta e Juane, ta phenda lenge: Llan te lacharen e sinia e Paskuaki.

⁹ Von puchle le: ¿Kai mange te thova e sinia?

¹⁰ O Jesus phenda lenge: Kana tumen ka den ando foro, ka malaven iekhe muruse kai inllarel iek bardako e paieke. Llan pala le llik ando cher kai ka del,

¹¹ ta phenen e lleneke katar o cher: O Gazda puchel: ¿Savi si e soba kai ka jau me disipulonenchar o jape e Paskuako?

¹² Vou ka sikavel tumenge iek soba bari kai si upre ando cher ta lachardi e jamake. Cheren kote so trubul.

¹³ Von llele ta malade isto sar phendaia lenge o Jesus, ta cherde o jape katar e Paskua.

¹⁴ Kana avilo o vreme, o Jesus ta e apostolura besle pe sinia.

¹⁵ O Jesus phenda lenge: ¡Gia zeliva te cherav tumenchar gava jape e paskuako mai anglal katar mo meripe!

¹⁶ Soke phenav tumenge kai ni ka cherav le pale lligo ni ka cherdol ande charoina e Devleki.

¹⁷ Ondaka lia ande pe va o taso, dia fala e Devle, ta phenda: Len gava ta fulaven le maskar tumende.

¹⁸ Soke phenav tumenge kai ni ka piau pale katar so del e drak, lligo ni ka avel e charoina e Devleki.

¹⁹ Mapalal lia ande pe va o marrno dia fala e Devle, phagla le diale lende ta phenda: Gava si mi esnaga, dini pala tumende. Cheren gava ande mo anav.

²⁰ Kana jale pale cherda isto gua e tasoia, ta phenda: Gava taso si o nevo alav chachardo me ratea, rat kai chordol pala tumende.

²¹ A akana mo va ta o va goleko kai ka pukhavel man, si upral pe sinia.

²² Chachimaia o Chavo e Manuseko ka phirel po drom kai si leke chinado, a ¡tesko goleke kai ka phukavel le!

²³ Ondaka thode te puchen iek avere ko si gua kai ka phukavel.

Ko si o mai baro

²⁴ E disipulura denape orba ta mangena te llanen ko si mai baro lendar.

²⁵ O Jesus phenda lenge: Maskar e llene kai ni pachan, e charura gazdarin silnomaia pe llene kai zivin ande gola phuvia, ta e llene kai gazdarin phenen e llenenge kai von si lache lenchar.

²⁶ Tumen morabi te na aven gia. Soke o mai baro maskar tumende si te cherdol sargo o mai terno, ta gua kai gazdaril si te cherdol sargo gua kai radil tumenge.

²⁷ Soke ¿ko si o mai baro, gua kai besel pe sinia te jal o gua kai thovel o jape angla lete? ¿Inai mai baro gua kai besel? A me sem maskar tumende sargo o lleno kai radil tumenge.

²⁸ Tumen sena manchar suako drom ande mo zumadipe.

²⁹ Goleke, me dav tumen iek charoina, gia sar mo Dad dia la mange,

³⁰ ta tumen ka jan ta ka pien pe mi sinia ande mi charoina, ta ka besen pe tronura barimake te chinen e kris pe desudui viche katar o Israel.

O Jesus phenel kai o Pedro ni ka pinllarel le

³¹ Ta i phenda o Gazda: Pedro, Pedro, o llavolo mangla tumen te chinol tumen sargo kana tumen sena lliu,

³² a me manglem pala tu, te avel tut pachape. A tu kana ka iri tut mande, pomozisar che phlalen te na jasaren po pachape.

³³ O Pedro phenda leke: Gazda, te si te llau tuia ande rubie, ta i te merav tuia ka merav.

³⁴ O Jesus phenda leke: Pedro, phenav chuke kai isto allive, mai anglal te basel o basno, tu ka phene trin droma kai ni pinllare man.

Avel o zumadipe

³⁵ Mapalal o Jesus puchla len: Kana bichaldem tumen bi lovenchar bi jamaia ta bi minienchar ¿trubusarda tumen vareso? Von phende: Niso.

³⁶ Ondaka phenda lenge: A akana, ka si love, te anel len, ta te anel i jape. Ta gole kai inai le jarni, te bichinel po gertachi ta te chinel peke iek.

³⁷ Soke phenav tumenge kai si te cherdol manchar so phenel o Pisipe: Ta saia llindo sargo iek bilacho manus. Soke sa so si pisime mandar, si te cherdol.

³⁸ Ondaka von phende: Gazda, kate si dui jarnia. A vou phenda: Na de orba ios.

O Jesus molilpe po Getsemani

³⁹ Mapalal o Jesus likisto kotar ta llelo po burdo e Maslinkengo sar cherela suako drom, ta e disipulura llele pala le.

⁴⁰ Kana avilo kote, phenda lenge: Molintumen, te na peren ando zumadipe.

⁴¹ O Jesus durilo lendar, ta dia changa te molilpe.

⁴² Ta phenda: Dade, te kamea, na muk te nakhav gaia patnia, a mai lache si te cherdol chiri volia a na murni.

⁴³ Ondaka avilo lete iek suecho e milosoko, te del le zor.

⁴⁴ Ande leki bari patnia, o Jesus molilape ios mai but, ta leko esniovo perela pe phuv sargo rat.

⁴⁵ Kana ustilo katar po molipe, ta irisailo kai e disipulura, malada len kai sovena, chinie katar e zalba.

⁴⁶ O Jesus phenda lenge: ¿Soke soven? Usten ta molintumen, te na peren ando zumadipe.

Phanden e Jesuse

⁴⁷ O Jesus dela orba, kana avile but llene. Gua kai ikhardola Judas, kai saia iek katar e disipulura, llala angla lende. Avilo pasa o Jesus te chumidel le,

⁴⁸ A o Jesus phenda leke: Judas, ¿ande iek chumidipe pukhave e Chave e Manuseke?

⁴⁹ E llene kai sea e Jesusea, kana dikhle so llalape kote, puchle le: Gazda, ¿ka chalava len e jarnienchar?

⁵⁰ Ta iek lendar chinda o kan o chacho katar o sluga e mai bare popoko.

⁵¹ O Jesus phenda: Muken len, dosta. Ta dodisarda e slugako kan, ta sastarda le.

⁵² Mapalal phenda e gazdenge katar e zakonura, e llenenge kai arakhen o cher e Devleko ta e phurenge, kai avilea te inllaren le: ¿Soke avilen jarnienchar ta kastenchar sargo kana me sema iek kochkari?

⁵³ Suako llive sema tumenchar ando cher e Devleko, ta ni phanglen man. A akana si tumaro vreme, o vreme kana gazdaril o truniariko.

O Pedro phenel kai ni pinllarel e Jesuse

⁵⁴ Phangle e Jesuse ta inllarde le ando cher e mai bare popoko. O Pedro llala pala lende duratar.

⁵⁵ Kote, po dopas katar e bar e chereki cherdea iag ta e llene beslea truial, ta i o Pedro beslo lenchar.

⁵⁶ Avili iek sluga diskinia, ta kana dikhla le kai besela pasa e iag, dikhla ios pe lete ta phenda: I gava saia lea.

⁵⁷ A o Pedro phenda: Chei, me ni pinllarav le.

⁵⁸ Ni nakhla but kotar, ta aver lleno dikhla le ta phenda: I tu san iek lendar. O Pedro phenda: Iok, bre, me ni sem.

⁵⁹ Nakhla iek saiato ta aver lleno phenda: Chachimaia i gava saia lea, soke vou si katar e Galilea.

⁶⁰ A vou phenda: Bre, me ni llanav savi orba de. Isto kote, kana o Pedro dela orba, baslo o basno.

⁶¹ Ondaka o Jesus boldinailo ta dikhla po Pedro, ta o Pedro diape golli kai o Jesus phendaia leke: Allive, mai anglal te basel o basno tu ka phene trin droma kai ni pinllare man.

⁶² Ta o Pedro llelotar kotar ta rovda but zalbaia.

Maren espurnia katar o Jesus

⁶³ E llene kai dikhena so cherel o Jesus marena letar espurnia ta chalavena le.

⁶⁴ Ucharena leke akha, ta puchena le. ¡Apogodisar ko chalada tut!

⁶⁵ Ta kusena le bute alavenchar.

Chinen kris e Jesuseke

⁶⁶ Kana peli e riat, chidinaile e phure e Judionenge, e gazda e poponenge ta e kovacha e zakonoke, ta inllarde e Jesuse kai e kris. Kote puchle le:

⁶⁷ Phen amenge, ¿san tu o Mesias? Vou phenda lenge: Te phenden tumenge kai ea, ni ka pachan man.

⁶⁸ Ta te puchlem tumen vareso, ni ka phenen mange.

⁶⁹ A katar angle o Chavo e Manuseko ka besel pe rig e chachi katar o Del o zuralo.

⁷⁰ Mapalal sa puchle le: ¿Tu san e Devleko Chavo? O Jesus phenda lenge: Isto tumen phenden kai me sem.

⁷¹ Ondaka von phende: Ni trubul amen ios llene te asunen. Isto amen asundam le isto katar leko mui.