Лукатар 21 - Biblia ande chib Romani

E love kai dia e phivli chorri

¹ O Jesus dikhela sar e llene barvale thovena love ande baulicha kote kai llan e love dine,

² ta i dikhla kai iek phivli chorri thovela dui tolaricha jarkune.

³ Ondaka phenda: Chachimaia phenav tumenge kai gaia phivli dia mai but neko sa e llene,

⁴ soke sa die katar so ni trubula len, a voi, ande po chorripe, dia sa so saia la te zivil.

O Jeus phenel kai o cher e Devleko ka avel peradino

⁵ Nesave llene dena orba katar o cher e Devleko, katar o sukaripe katar leke barra ta katar e ezgode dine kai sea pe lende. O Jesus phenda:

⁶ Ka aven llivesa kai sa gava kai tumen dikhen ni ka achel iek barr upral pe aver. Sa ka avel zatrime.

E ezgode kai nakhel e phuv ka phenen kai o son si pase.

⁷ Ondaka puchle le: Kovachi, ¿kana ka aven gala ezgode ta save ezgode ka sikaven kai sa gava si pase te avelpe?

⁸ O Jesus phenda: Arakhen tumen te na kojadon. Soke ka aven but llene kai ka phenen kai sem me. Ta ka phenen: Me sem ta akana si o vreme. Tumen morabi te na llan pala lende.

⁹ Ta kana ka asunen kai e phuvia marenpe ta si burkania, na daran, soke gala ezgode trubul te nakhen mai anglal, a ni ios ni ka avel o son.

¹⁰ Phenda lenge: Iek charoina ka marelpe averiaia ta iek phuv ka marelpe avere phuviaia.

¹¹ E phuv ka dermolpe but zurale, ka avel bok ta nasualipe pe suako rig, ta ando miloso ka dikhon bare ezgode darane.

¹² A mai anglal, ka thoven o va pe tumende ta ka roden te maren tumen. Ka chinen kris pe tumende ande khanllira e judionenge, ka thoven tumen ande rubie ta cheres ma ka inllaren tumen kai e charura ta kai e llene kai gazdarin.

¹³ Ta gia tumen ka den e orba chachi mandar.

¹⁴ Na mislin tumen so ka phenen,

¹⁵ soke me ka dav tumen alava gia pherde bizaipe kai ni iek katar tumare dusmanura ni ka terpin len ta nasti ka phenen kai tumen kojaven.

¹⁶ A ka phukaven tumen isto tumare dada, tumare phlal, tumari familia ta tumare amale. Nesave tumendar ka aven mundarde,

¹⁷ ta sa o sueto ka murzil pe tumende pala mo anav.

¹⁸ A ni ka jasaol ni iek bal katar tumaro soro.

¹⁹ ¡Goleke morabi te aven zurale, te sai braduin tumen!

²⁰ Kana ka dikhen kai truial o Jerusalem si e boñikura, llanen kai oma ka avel peradini.

²¹ Ondaka, gola kai ka aven ande Judea, morabi te nasen pe burdura. A gola kai ka aven ando Jerusalem, morabi te liken katar o foro, ta gola kai ka aven ando vos, te na irinpe ando foro.

²² Soke gola llivesa ka aven patniake, ta ka cherdol sa so si pisime ando Pisipe.

²³ ¡Tesko gole diskinienge kai ande gola llivesa ka aven khamne o ka avel len minone kai den len kolin! Soke ka avel but duk ande phuv, ta iek patnia but bari gale foroke.

²⁴ Nesave ka aven mundarde e jarnienchar a averen ka inllaren len phangle phuv phuviate, ta e llene kai inai judiura ka len peke o Jerusalem lligo ni ka getolpe o vreme kai si chinado e llenenge kai inai judiura.

O Chavo e Manuseko irilpe

²⁵ Ka dikhon bare ezgode ando kham, ando chon ta ande cheraia. Ta pe phuv o sueto ni ka llanel so te cherel ta ka daran katar e mora ta e valura kai ka basen zurale.

²⁶ E llene ka baldinpe daratar kana ka mislinpe so ka avelpe e suetotar, soke llik e zor e milosoki ka izdral.

²⁷ Ondaka ka dikhol o Chavo e Manuseko kai avel ande iek oblako bare zoriaia ta barimaia.

²⁸ Kana gala ezgode ka aven, den tumen zor ta dikhen upre, soke but oma ka aven tumaro braduipe.

²⁹ Ta i phenda lenge gia: Dikhen po kas e simochinengo, o pe varesavo aver kas.

³⁰ Kana dikhen kai liken e patra, tumen acharen kai o milai si pase.

³¹ Isto gia, kana tumen ka dikhen sa gala ezgode, ka llanen kai e charoina e Devleki si pase.

³² Chachimaia phenav tumenge kai sa gala ezgode ka avenpe bi te nakhel gaia vicha.

³³ O miloso ta e phuv ni ka aven ios, a me alava si te cherdon.

³⁴ Arakhen tumen ta na muken te zuriaon tumare lie pala e ezgode bilache kai nasti mukenpe, pala o matipe ta e brige gale zivotoke, te na perel pe tumende gua llive kana tumen ni ka mislin

³⁵ sargo iek prevarka. Soke ka avel pe sa o sueto.

³⁶ Prezosaren, ta molintumen sa o vreme, te nasen katar sa gala ezgode kai ka avenpe ta te sai aven angla o Chavo e Manuseko.

³⁷ O Jesus sikavela ollivesea ando cher e Devleko, ta o riat achela po burdo kai phenen leke katar e Maslinke.

³⁸ Ta sa e llene llana rano ando cher e Devleko.