Лукатар 20 - Biblia ande chib Romani

O gazdaripe e Jesuseko

¹ Iek llive, kana o Jesus saia ando cher e Devleko ta sikavela e llenen ta phenela e lachi viasta, avile e gazda e poponenge ta e kovacha e zakonoke, e phurenchar,

² ta phende leke: ¿Save gazdarimaia chere gava? ¿Ko dia tut gua gazdaripe?

³ O Jesus phenda lenge: I me ka puchau tumen iek ezgoda. Phenen mange:

⁴ ¿Ko bichalda e Juane te kristil, o Del o e manusa?

⁵ Von diepe orba maskar pete ta phenena: Te phendam kai bichalda le o Del, vou ka phenel: ¿Soke ni pachaien le?

⁶ A nasti phena kai bichalde le e manusa, soke sai mundaren amen e barrenchar soke sa e llene pachan kai o Juan saia iek profeta.

⁷ Goleke von phende kai ni llanena ko bichalda e Juane te kristil.

⁸ Ondaka o Jesus phenda lenge: Ni me ni ka phenav tumenge save gazdarimaia cherav gava.

E paramichi katar e llene bilache kai radin e phuv

⁹ Mapalal o Jesus dia orba e llenenge, ta phenda gaia paramichi: Iek manus thoda te bariol e drak ande pi umal, chinadala iekhe llenenge kai radin e phuv ta llelotar but dur.

¹⁰ Kana avilo o vreme, bichalda iekhe sluga te mangel katar e llene kai radina e phuv o chari kai perela le katar e drak, a von marde le ta bichalde le chuche vastengo.

¹¹ Ondaka o gazda bichalda avere sluga. A i gole kusle le, chalade le ta bichalde le chuche vastengo.

¹² Bichalda avere, a e llene kai radin e phuv i gole ranisarde le ta chudie le avri.

¹³ O gazda e phuviako phenda: ¿So ka cherav? Ka bichalav me chave kai voliv. Le ka kanden.

¹⁴ A kana e llene kai radin e phuv dikhle le, phende iek avereke: Gava si o lleno kai ka achel leke sa gaia phuv, mundara le ta gia e phuv ka achel amenge.

¹⁵ Ta ikande le katar e phuv e drakhengi ta mundarde le. ¿A tumen so mislin kai ka cherel o gazda katar e phuv e drakhengi?

¹⁶ Ka llal ta ka mundarel gole llenen kai radin e phuv. Kana asunde gua, phende: ¡Gua ni ka avelpe nikada!

¹⁷ A o Jesus dikhla pe lende ta phenda: ¿A soke ando Pisipe phenel gia?: O barr kai ni thode leke sama e llene kai vazden chera cherdilo o barr mai preche. Gava cherda o Del, ta amen chudi amen.

¹⁸ Vareko te perel pe gua barr, ka cherdol sa ande kotora. A o barr te perel upral pe varesavo lleno, ka cherel le prajo.

¹⁹ E gazda e poponenge ta e kovacha e zakonoke mangena te phanden e Jesuse isto kote, soke acharde kai gole paramichaia dela orba lendar. A darana e llenendar.

Puchen e Jesuse katar e love kai denpe e foro

²⁰ Bichalde iekhe llenen kai cherenape lache manusa, samo te cheren e Jesuse te kojadol ande pe alava ta gia te avel len varesavi dos te sai thoven le ando va e lleneko kai gazdaril e rromanonen.

²¹ Gala llene puchle le: Kovachi, llana kai so phene ta so sikave si o chachipe, ta kai ni rode te ave lenge drago. Tu sikave chachimaia o drom e Devleko.

²² ¿Si sukar te da amare love kai o lleno kai gazdaril pe rromanura, o iok?

²³ A o Jesus, sar pinllerela lengo kojaipe, phenda lenge:

²⁴ Sikaven mange iek tolari. ¿Kako si o mui ta kako anav si pisime po tolari? Von phende: E Sesareko.

²⁵ O Jesus phenda lenge: Den e Sesare so si e Sesareko, ta den e Devle so si e Devleko.

²⁶ Ta ande sa so vou phenda angla e llene ni malade ni iek dos te sai phanden le, ta chudisaile letar ta ni phende niso.

Puchen sar ka avel kana e manusa ka usten katar o meripe

²⁷ Mapalal nesave saduseura llele te dikhen e Jesuse. E saduseura ni pachan kai e manusa ka usten katar o meripe, goleke phende leke gia:

²⁸ Kovachi, o Moises mukla amenge pisime kai kana iek murus zinime merel ta ni avile le minone pe rromiaia, o phlal gole lleneko kai mulo morabi te zinilpe e phivliaia te del minonen pe phlale kai mulo.

²⁹ Ondaka e saduseura phende gia e Jesuseke: Sea efta phlal, o purvo lendar zinisailo, ta mulo ta ni mukla porodo.

³⁰ O duito zinisailo e phivliaia ta i vov mulo ta ni avila le chaurre.

³¹ Ta i o trito zinisaile laia, ta i ogola zinisaile laia, a e li efta mule ta ni avila le porodo.

³² Mapalal muli i e rromi.

³³ Kana ka usten katar o meripe, ¿save phlaleki rromi ka avel voi, kana e efta sea zinime laia?

³⁴ O Jesus phenda lenge: Ande gava zivoto, e murusa ta e diskinia zininpe,

³⁵ a gola kai o Del ka chinavel lenge te usten katar o meripe, ta kana ka avel gua vreme avena murusa o diskinie, ni ka zininpe ios

³⁶ ta ni ka meren. Soke von ka aven sargo e suechura, ta ka aven chave e Devleke soke ustile katar o meripe.

³⁷ Isto o Moises, kana pisisarda katar e karrne kai phabona, phenel amenge kai e mule ka usten katar o meripe. Kote phenel kai o Gazda si o Del katar o Abraam, katar o Isaak ta i katar o Jakob.

³⁸ ¡Ta vou inai Del e mulengo, vou si Del e llundengo, soke e Devleke saurre si llunde!

³⁹ Ondaka nesave kovacha e zakonoke phende: Sukar phendan, kovachi.

⁴⁰ Ta ni tromana te puchen le niso ios.

¿Katar savi vicha si o Mesias?

⁴¹ O Jesus puchla len: ¿Soke phenen kai o Mesias avel katar e vicha e Davideki?

⁴² A isto o David, ande Salmura, phenel: O Gazda phenda me Gazdake: Bes pe mi chachi,

⁴³ lligo ni ka thovav che dusmanonen telal tala che porrne.

⁴⁴ ¿Sar ka avel o Mesias katar e vicha e Davideki kana isto o David ikharel le Gazda?

O Jesus phukavel e kovachen katar o zakono

⁴⁵ Sa e llene asunena, ta o Jesus phenda pe disipulonenge:

⁴⁶ Arakhen tumen katar e kovacha e zakonoke, soke drago lenge te thoven pe pete e bare fistanura, ta mangen te den lenchar orba liubaimaia kana llan ando foro. Roden e estoliche mai barikane ande khanllira e judionenge ta e mai lache thana kana si varesavo jape,

⁴⁷ ta len katar e phivlia so si len, ta te na llanel le niko molinpe but. Von ka len mai bari duk.