Лукатар 2 - Biblia ande chib Romani

Sar biandilo o Jesus

¹ Ande gola llivesa o charo o Augusto Sesar bichalda te llinen sa e manusen.

² Gava purvo llindipe cherde le kana o Sirenio gazdarila ande Siria.

³ Sa e llene saia te llantar isto ande pe forura te llinen len.

⁴ Goleke o Jose likisto katar o foro o Nazaret, kai achel ande Galilea ta llelo ande Judea, ando foro o Belen kote kai biandiloia o David, soke o Jose saia katar e vicha e Davideki.

⁵ Llelo ando Belen pe rromiaia e Mariaia te llinen le.

⁶ Ta kana sea ando Belen, avilo o vreme te maladol e Mariake.

⁷ Kote maladilo lako purvo minono, ta ulisarda le ande pelene ta inzarda le andre ando cher kote kai thovena e bakren soke ni saia kai te nakhen e riat.

E suechura ta e chobanura

⁸ Kotar pase sea nesave chobanura kai nakhena e riat ando vos ta arakhena pe bakren.

⁹ Ta sikadilo lenge iek suecho e Devleko, ta o blagosipe e Devleko klichisarda truial lende, ta daraile but.

¹⁰ A o suecho phenda lenge: Na daran soke anav tumenge iek lachi viasta, kai ka anel but veselia saurrenge:

¹¹ Allive biandilo ando foro e Davideko iek Braduimari, kai si o Kristo, o Gazda.

¹² Ka malaven e minone pachardo ande pelene, inzardo kote kai thoven e bakren, kote ka llanen kai vou si.

¹³ Ondaka sikadile but suechura katar o miloso, kai blagosina e Devle ta phenena:

¹⁴ Blagosime o Del ando miloso ¡ta pas e llenenge kai o Del volil!

¹⁵ Kana e suechura irisaile ando miloso, e chobanura thode te phenen iek avereke: Aven ando Belen te dikha gaia ezgoda kai o Gazda phenda amenge kai si te avelpe.

¹⁶ Sigarde ta malade e Maria ta e Josee ta e minone inzardo kote kai guruvena e bakren.

¹⁷ Kana dikhle le, phende so phenda lenge o suecho katar o minono,

¹⁸ ta sa gola kai asunde e chobanonen chudisaile katar so phenena.

¹⁹ A e Maria chudisali but, ta suako llive mislilape ande goia ezgoda.

²⁰ E chobanura irisaile ta blagosina e Devle pala sa so asunde ta so dikhle, soke sa e ezgode nakhle isto gia sar phendilo lenge.

O minono o Jesus sikaven le ando cher e Devleko

²¹ Pala e ojto llive cherde leke e sirkunsision ta thode leko anav Jesus, isto gua anav kai phendaia lake o suecho kana voi ni saia khamni.

²² Kana nakhle e llivesa kai von saia te chistonpe prema o zakono e Moiseseko, inllarde e minone ando Israel te sikaven le e Devleke.

²³ Von cherde gava soke ando zakono e Devleko si pisime kai o purvo murus kai biandola ka avel chinado e Devleke.

²⁴ Llele te cheren iek kurbano sar phenel o zakono e Devleko: Dui tortole o dui gulubura.

²⁵ Ande gola llivesa saia ando Jerusalem iek lleno kai ikhardola Simeon. Vou saia iek manus but lacho, kai blagosila e Devle ta adurichare la te avel braduime o Israel. O Santo Duo saia lea,

²⁶ ta phendaia leke kai ni ka resel kai o meripe lligo ni ka dikhel e Kristo, gole kai o Gazda saia te bichalel.

²⁷ O Santo Duo cherda le te llal ando cher e Devleko, ta kana e dada katar o minono Jesus die ando cher e Devleko te cheren lea sar phenela o zakono,

²⁸ O Simeon istarda le ande pe va blagosisarda e Devle ta phenda:

²⁹ Akana, Gazda, cherdilo so phendan, sai muke man te merav ande pas:

³⁰ Soke dikhlem me akhenchar e manuse kai ka braduil amen

³¹ gole kai tu bichaldan ta sa e forura ka dikhen le,

³² vou si o villelo kai si te kletosarel po sueto, ta ka avel o baripe katar o Israel.

³³ O Jose ta e Maria chudisaile katar so phenda o Simeon e minonetar.

³⁴ Ondaka o Simeon blagosisarda len, ta phenda e Mariake e dei e Jesuseki: Gale minoneke si chinado te cherel te peren o te usten bute llenen ando Israel. Vou ka avel iek señal kai but llene ni ka mangen,

³⁵ ta gia ka llangliolpe so mislinpe suako lleno ande po lio.

³⁶ I kote saia iek porauka kai ikhardola Ana, lako dad saia o Penuel katar e vicha e Asereki. Voi saia but phuri ta zinisalia but terni, ta zivisarda pala po rrom efta burs,

³⁷ cherena ojtovardes ta star burs kai achilia phivli. Ni likela katar o cher e Devleko soke radila ollivesea ta i o riat e Devleke, allunina ta molilape.

³⁸ E Ana avili isto ondaka, dia fala e Devle ta lia te del orba katar o Jesus sa e llenenge kai aduricharena te avel braduime o Jerusalem.

Kana irisaile ando Nazaret

³⁹ Ondaka kana cherde sa so phenel o zakono e Gazdako, irisaile ande Galilea, kai po foro o Nazaret.

⁴⁰ Ta o minono bariola ta cherdola mai zuralo, ta saia but bizai ta o Del blagosila le.

O minono Jesus malaven le ando cher e Devleko

⁴¹ Leke dada llana suako burs ando Jerusalem kana saia e eslava e Paskuaki.

⁴² Kana o Jesus reslo kai e desudui burs, sa llele pe goia eslava ando Jerusalem sar sea sikade.

⁴³ A kana nakhle gola llivesa, von irisaile kai po cher, a o minono Jesus achilo ando Jerusalem, a leke dada ni thode sama.

⁴⁴ Mislina kai o Jesus avela maskar sa e llene, ta gia phirde sorro llive. A kana rodie le maskar pi familia ta maskar pe pinllarde,

⁴⁵ ni malade le. Ondaka irisaile ando Jerusalem te roden le kote.

⁴⁶ Nakhle trin llive kotar ta malade le ando cher e Devleko, besindo maskar e kovacha e zakonoke, asunela len ta puchela len.

⁴⁷ Ta sa gola kai asunena le chudinape katar leko bizaipe ta katar so phenela lenge.

⁴⁸ Kana dikhle le leke dada, chudisaile ta leki dei phenda leke: Chaurrea, ¿soke cherdan amenge gava? Cho dad ta me saia amenge but briga ta rodaia tut.

⁴⁹ Ondaka o Jesus phenda lenge: ¿Soke rodena man? ¿Ni llanen kai si te avav ando cher me Dadeko?

⁵⁰ A von ni acharde so phenela lenge.

⁵¹ Ondaka irisailo lenchar ando Nazaret, ta cherela sa so phenena leke. A leki dei mislilape ande sa gala ezgode kai nakhlela.

⁵² A o Jesus bariola ios ande esnaga ta i ando bizaipe, ta blagosila le o Del ta i e manusa.